Home Portray Encouragement Literature News Download Learning Members Area Tools Touch It

 

तोलोङ सिकिः मूःली सड़ा अरा टूड़ऊ चिन्हाँ(लिपि)

 

कुँड़ुख़ कत्थन टूड़ा-बंचआ गे हिन्दी गही बेवहार उर्मीन्ती बग्गे मनी। एन्देरगे का देवनागरी चिन्हाँन ओर्मर अख़नर; जेनू टूड़ना सेब्बा मनी अरा टूड़्कन खुर्चआना हूँ सहजेम ओंगतारई काली। देवनागरी अछड़ा अरा कुँड़ख़ अछड़ा नू अजगढ़ ओरासरी(समानता) रई। पहें जोक हिन्दी अछड़ा गही खुर्चआना कुँड़ख़ बक् नू मल्ला। एकासे का, "ऐ, औ, ऋ, श, ष, ज्ञ, क्ष, त्र, श्र।" अन्नु हूँ हिन्दी ती हेभेरका गुने इबड़न हूँ बेवहार नू ओन्दोरतारई; तोलोङ सिकि नू श, ष और क्ष हिन्दी भखा ती ओन्दोरतारकी  रई। एन्नेम कुँड़ख़ अछड़ा "ख़" अरा "ञ़" हिन्दी बक् नू मल ख़क्खरई, पहें एकसन-एकसन हिन्दी नू हूँ "ख़" घी बेवहार नंना एःरतार'ई।

डॉ.नारायण उराँव, डॉ.निर्मल मिंज, मुँजुरका डॉ. फ्राँसिस एक्का अरा डॉ. रामदयाल मुण्डास गही संगरा नंज्ज नखरना अरा गयराही चिंहुट ती पुना कुँड़ुख़ चिन्हाँ(लिपि) कमतारकी रई, इदिन तोलोङ सिकि गही नामे चीरकी रई। ई चिन्हाँ ओरे नू 15 मई 1999 नू आलर मुन्दभारे बेवहार नना गे चिपतअर दहदर नंनतारा तोलोङ सिकि बरिनका(वर्णात्मक) चिन्हाँ तली। इदिन खंड़ा-खंडा ननर टूड़नर-बंचनर अरा बक् नू ओन्टे-ओन्टे चिन्हाँन उयनुम कानर। अक्षड़न् टूड़ो बीरी हिन्दी लेखा हलंत गही बेवहार इन्नु मल नंनर; एन्देर गे का उर्मी तलन तोड़(व्यंजन)तंगआ नू अदहम रई अरा एवंदा गूटी अन्नू "अ" गही संघ्रा मल चिओय आद अदहम रई। ई लेखा बक् गही फुर्चआना लेखम एकसन-एकसन अदहा अक्षड़ा गही चाड़ मनी असन-असन अक्षड़ा संगे "अ" गही संघ्रा मल चिअना मनी। तोलोङ सिकि नू टूड़ो बीरी बक् गही मुञ्जा अक्षड़ा "अ" नुख़ुरका रई। तोलोङ चिन्हाँ नू हिन्दी लेखआ मात्रा गही बेवहार मल्ला मन्ना। अँवगे टूःड़ो बीरी तिरहा नंना चाही का एकअम तलन तोड़ गही ख़ोख़ा अंगर "अ" ताल बरओ, अदि ख़ोख़ा नंना ताल तोड़ बरओ होले अदिन मूःली ताल बेसेम फुर्चआना चाही, मलता मात्रा बेसे फुर्चआना चाही। इदिन हूँ अख़ना चाड़ रई का हिन्दी नू मात्रा गही बेवहार इकला तलन तोड़(व्यंजन) संगे मनी। ई लेखम तोलोङ सिकि नू हूँ ताल तोड़ गही ख़ोख़ा अगर ताल तोड़ दिम बरई होले ख़ोख़ा बरचका तोड़न मूःली ताल बेसेम  फुर्चआना चाही। बक् गही उर्मी खंड़ा नू ताल तोड़ मन्नम चाही, मलता बक् मल पूरा मनी। एकअम खंड़ा नू ओन्टे इकला ताल तोड़(स्वर वर्ण) मना उंगी, पहें खंड़ा नू तलन तोड़(व्यंजन) गही संगे ताल तोड़ मन्नम चाही। एकअम खंड़ा नू ताल तोड़ गही ख़ोख़ा एंड़ तलन तोड़ मना उंगी। अगर एकअम खंड़ा नू मुन्ता(प्रथम) एंड़ अक्षड़ा तलन तोड़ रओ होले एंड़ो अक्षड़ा मेझरा(मिश्रित) मनो दरा ख़ोख़ा बरऊ ताल तोड़ संगे मेसेरओ की फुर्चारओ। एःरा- प्यार।  अगर बक् खंड़ा घी ख़ोख़ा ताल तोड़ रओ चाहे ताल तोड़ ती मुँदिम खंड़ा पूर'आ लगी; एन्ने दशा नू बक् गही खंड़न छिण्डा गे घेतला टुड़ा(Vowel Index) चितारई। एःरा - पर्दो अरा पर्द'ओ। इसन एंड़ो बक् गही माने "बढ़ेगी" अरा "बढ़ायगी" उर्खा लगी।

एकअमम कत्था गही उर्मी टूड़ू चिन्हाँ गही थकान् तोड़पून(वर्णमाला) बअनर। कुँड़ुख़ कत्था एंड़ किसिम गही रईः- ताल तोड़(स्वर वर्ण) एकदन सरह तोड़, अरा तलन तोड़(व्यंजन वर्ण) एकदन हरह तोड़ हूँ बअनर।

 

ताल तोड़/हर तोड़(स्वर वर्ण/स्वर अक्षर) - एका तोड़ नू फुर्चओ बीरी कण्ठा ती उर्खना सड़ा सोजहेम बई ती उर्खी अरा एकअम नंना तोड़ गही चाड़ मल मनी, अदिन ताल तोड़(स्वर व्यंजन बअनर।  ताल तोड़ हूं मूँद किसिम गही मनी - सन्नी ताल तोड़(ह्रस्व स्वर), हेचका ताल(सूक्ष्म स्वर) अरा दिगहा ताल(दीर्घ स्वर)। तोलोङ सिकि नू सोय(छः) ताल तोड़(स्वर वर्ण), "इ, ए, उ, ओ, अ, आ" चिच्चका रई। इबड़ा सन्नी ताल तोड़ तली।

ताल तोड़ गही फुटुरना ई लेखआ मनी -   इ - तत्ख़ा, ए - कण्ठा-तत्ख़ा,  उ - लवटे,  ओ - कण्ठा-लवटे, अ, आ - कण्ठा। बक नू चाड़े लेखा इबड़ा सन्नी ताल तोड़ नू सेला ":" चिन्हाँ चिअर की खुर्चआनन दिघहा नंना मनी; सेला चिनहाँ चिआ ख़नेम इबड़ा दिगहा ताल तोड बन'ई काली। मूःली तोड़ ती हूँ बग्गे सन्नी सड़ा ख़कखा खतरी गे तला "।" चिन्हाँ, एकदन हेचका ताल(सड़ा) बअनर, चिअना मनी। एका ताल तोड़ नू सेला ":" चिन्हाँ लक्की रओ, अदिन मूःली सड़ा ती 2 1/2 गुणा दिगहा नतगना मनो, एःरा - "आःली, चोःचा, पेःठ। हिन्दी चिन्हाँ नू हेचका सड़न टूड़ागे "अ" चिअर की, अदि गही मइय्या चन्दो टूड़नर। मुइका तालन एःदआ गे सन्नी अरा दिग्हा ताल गही मइय्या मितला टिका(अनुस्वर बिन्दु) टूड़ना गही अइन रई। एकअम बक् नू मुञ्जा ता ताल(स्वर) अक्षड़ा एकले खंड़ा हीके तो इदिन अरा इदी ती मूँद खंड़न छिण्डा गे मुन्जा ता अक्षड़ा नू नंना ताल(स्वर) घी मात्रा चिअर की छाव(आकृति) बदलआना मनी। एःरा - बक् "कम'ई",  इन्नू "ई" गही अड्डा नू "अ" अरा इ गही मात्रा चिअनर। पहें बक् गही ओरे ता अक्षड़ा ताल रअनू हूँ अदिन अन्नेम रआ चिअनर। एकासे का "उगता"।

तलन तोड़/हरह तोड़(व्यंजन वर्ण) - कुँड़ुख़ कत्थन नू एका तोड़न फुरच'ओ बीरी बई उला ती उर्खु ताःका, बई ता नंना पोरेन(अंग) ओंसोड़नुम सर्खी अदिन तलन तोड़/हरह तोड़(व्यंजन वर्ण) बअनर। तलन तोड़(व्यंजन अक्षर) नू मून्दी पंचे(पैंतीस) अक्षड़न उयका रई।  एकदन खुर्चारना अड़्डा गही मूःली लेखा सय डाड़ा थका(समूह) नू फिन ख़ट्टका रई। इबड़ा एन्ने रईः- " लवटे - प फ ब भ म,  पल्ल - त थ द ध न,  मेद्दो - ट ठ ड ढ ण,   तालुवा - च छ ज झ ञ,    कण्ठा - क ख ग घ ङ,    मझला - य र ल व ञ़,    ओःरऊ - स ह ख़ ड़ ढ़।"      लवटे, पल्ल, मेद्दो, तालुवा अरा कण्ठा थका ता तलन तोड़न ओंसोरना तलन गही नामे ती अख़नर। मझला थका नू "य" तालुवा, "र" मेद्दो, "ल" पल्ल, "व" पल्ल-लवटे अरा "ञ़" तालुवा ती खुर्चार'ई। मझला थका नू उयका अक्षड़ा गुट्ठी गही खुर्चारना ताल तोड़ अरा तलन तोड़ गही मजही नू मनी; अवंगे ई थकन मझला थका नू उयका रई। ओर'ऊ थका नू "स" पल्ल, "ह" कण्ठा, "ख़" कण्ठा, "ड़, ढ़" मेद्दो ती खुर्चार'ई। ओर'ऊ थका ता तोड़न खुर्च'ओ बीरी रगड़रना चड्डे ओर'ऊ सांस ताःका उर्खी; अवंगे ई थकन ओर'ऊ थका नू उयका रई।

 

मझला थका नू उयका रई। ओर'ऊ थका नू "स" पल्ल, "ह" कण्ठा, "ख़" कण्ठा, "ड़, ढ़" मेद्दो ती खुर्चार'ई। ओर'ऊ थका ता तोड़न खुर्च'ओ बीरी रगड़रना चड्डे ओर'ऊ सांस ताःका उर्खी; अवंगे ई थकन ओर'ऊ थका नू उयका रई।

     म, न, ण, ञ, ङ अरा ञ़ मुइका सड़ा तली, एन्देरगे का इबड़न खुर्च'ओ बीरी मुँइ गही संघ्रा होअ'ना पड़ारई। लवटे, पल्ल, मेद्दो, तालुवा अरा कण्ठा डाड़ा थका ता एकअम नन्-मुइका(निरनु-नासिक) अक्षड़ा ती मूँद अगर मुइका सड़ा(अनुस्वर अरा अनुनासिक) बरई, होले आ नन-मुइका सड़ा गही थका ता पंचे अक्षड़द मुइका सड़ा गही अड़डऩ लेई होई। एःरा- रम्फ, मेन्त, चेण्ठ, पञ्च, कङक, अयङ गुट्ठी। मझला अरा ओःरऊ थका गूटी ता नन्-मुइका(निरनु-नासिक) अक्षड़ा ती मूँद मुइका सड़ा(अनुनासिक) बरई,  होले खुर्चआना अड्डा लेखे मुइका सड़ा तंग्है अड्डा होई। एकासे का "ल अरा स" गही मूँदभारे मुइका सड़ा बरई होले मुइका तलन(अनुनासिक व्यंजन) "न";  "र, ञ़, ह, ख़, ड़, ढ़" गही मूँदभारे मुइका सड़ा बरई होले मितला चिन्हाँ; अरा एन्देर गे का "य अरा व" अद्हा ताल(अर्द्ध स्वर) तली, अवंगे एंड़ो अछड़ा गही मुन्दभारे मितला चिन्हाँ दिम बरओ।

    

मुइका " न" सोय किसिम गही रूपे नू एःरतीर'ईः-

1.लवटे थका ता तोड़न खुर्च'ओ बीरी थका ता एकअम निरनु-नासिक तोड़ ती मूँद मुइका सड़ा बरई, होले मुइका सड़ा "म" नू बदलारई काली। एःरा - रम्फ, पम्प।

2. ईद ताल तोड़न, मुइका ताल कमई। एका ताल तोड़न मुइका ताल कमना रई, अदि गही मइय्या मितला टुड़ा(अनुस्वर) चाहे चन्दो टिका(हिन्दी लिपि नू) टूड़नर। एःरा - ख़ेंसो, जोंख़, उराँव गुट्ठी।

3. ईद काण्ठा, तलन तोड़(व्यंजन) संगे बरई। अंगेजी अक्षर नू ng(sing) खुर्चार'ई। एःरा - एङहय, तङहय, बङ, तङ, निङहय।

4. ईद तलुवा ती, तलन तोड़ संगे बर'ई। अंग्रजी अक्षर नू nj(Benjna) खुर्चार'ई। एःरा - चिञा, ख़ञना, चुञना गुट्ठी।

5. ईद मेद्दो(दिमाग) ती सटरका तोड़ तली। अंगेजी अक्षर नू an(andra), on(onta) खुर्चार'ई। एःरा - अण्डरा, ओण्टा, पेण्डरे गुट्ठी।

6.ईद हूँ तलुवातिम, तलन तोड़ संगेम बर'ई। अंग्रेजी नू nj लेखा खुर्चार'ई, पहें इदि गही खुर्चआना नू "ज़"(गज़ल) खुर्चआना बेसेम खुर्चआना उर्खी। एःरा - गाञ़(गांज)।

 

बइका ताल अरा मुइका ताल गही सन्नी अरी दिगहा सड़न सेला चिन्हाँ अरा मितला टिका चिअर ई लेखा टूड़नरः-

 

      "ख़" काण्ठा ता सड़ा तली अरा कुँड़ख़ बक् अरा कच्छनखरना नू "ख़" गही बेवहार अजगढ़ मनी। "य" अक्षड़ा ती अनइत जुक्की बक् ओरे मनी। "ण, ञ, ङ, ञ़, ड़, अरा ढ़" ती कुँड़ख़ गही एकअम बक् ओरे मल मनी; पहें बक् गही मजही अरा मुंजा नू एःरतारई।

कुँड़ुख़ कत्था  नू जोक नंना कत्था गही प्रभाव मंज्जा, ईगे नंना कत्था गही अक्षड़ा बेवहार हूँ मना हेल्लरा। तोलोङ सिकि नू इबड़ा अक्षड़न खट्टा अक्षड़ा(देश्ज एवं विदेश्ज्) गही रूपे नू ईंजिरका रई।

तोलोङ सिकि नू इबड़ा अक्षड़ा एन्ने रईः-

 

तोलोङ सिकि नू दोय नाख़(14) मेझरा ताल(मिश्रित स्वर) इबड़ा रईः-

 

तोलोङ सिकि नू मेझरा तलन(व्यंजन वर्ण) मल मनी, पहें एका-एका बीरी "क्ष"  तलन गही चाड़े मनी अवँगे इदिन बहरी ती होच्चका रई। तोलोङ सिकि नू उर्मी तलन गही रोटओ सय(सात) गोटंग पण्डी(बरतनी) मनी। एकासे का "प" गही पण्डी एन्ने रईः-

 

      तोलोङ सिकि गही लेखना(गिनती) नू शुन्य गे "निदि", दस गे "दोय", बीस गे "एन्दी", तीस गे "मून्दी", चालिस गे "नख़दी", पच्चास गे "पन्दी", साठ गे "सोयदी", अस्सी गे "अख़दी", नब्बे गे "नयदी" अरा एक सौ गे दयदोय गही अड्डा नू "ओड्डी"  नामे उयका रई। एक ती दस गूटी गही लेखना एन्ने रई - ओन्द, एंड़ मून्द, नाख़, पंचे, सोय, सय, अख़, नय, दोय।

    

 

 

सरियारका टूड़का मूँली पाँति

एड़पा पल्ली नूँ ख़द्दार गने कुँड़ुख़ कत्था नूं कच्छनखरआ, होलेम आर नम्है कत्थन सिखिरआ गे ओंगोर।