Home Cultural View History Promotion Tribal Christianity Literature News Download Tutorial Members Area Touch It

 

चोन्हा गही निरंग बहना

सय कोमल ख़ेस्स, सीतापूर

 

एकअम कत्था आःलर अरा एकअम खोंड़हा गही अएना, चिन्हाँ अरा उजपर्दा(संस्कृति) गही चिन्हर अरा कोंड़ा नू चिच्चका चाचा लेखा तली। कत्था तिम उजपर्दान चिअना-ख़ट्टना अरा पसरआना मनी। एकअम बेतूड़ खोंड़हा ता उजपर्दा गही बखनी अरा चिन्हरन् ढलना अरा कमना कत्थातिम मना गे ओंगी। आई.एल.ओ. गही ओन्टे सर्वेद्दना लेखे संवसे ख़ेंख़ेल नू 40 गोडिम(करोड़) अदिबासिर रअनर, अरा 5 लोडिम(हजार) भखा कच्छनखरनर। हिन्दुस्तान नू इकला एरोय होले सन्नी कोहा 270 भखा गही बेवहार मनी। झारखण्ड नू उर्मीन्ती बग्गे कुँड़ख़र रअनर, एकसन 34 किसिम गही कत्था अदिबासिर अरा नन्-अदिबासी आःलर गुठियारनर।

   एका खोंड़हा ता अयंङ कत्था नठरई काली, इदातो अदिन कच्छनखरऊर ने हूँ मल रअनर होले आर गही खोंड़हा हूँ बग्गे उल्ला गूटी मल टिकई, आद एबसेरई काली। एन्ने मनी काली होले आ खोंड़हा ता आःलर नंना खोंड़हा नू समसारनर कानर अरा आर गही कत्थानिम तंगआ कत्था कमनर चिअनर। नंना खोंड़हा नू मेसेरना हूँ नेब्बा मल्ला, एन्देर गे का नंना खोड़हा गने लिंडिरना मसकिल मनी काली अरा आ खोंड़हा ता आःलर हूँ नंनारिन चांड़े मल इंजिरआ बेद्दनर।

     कुँड़ुख़ कत्था मूद्धा नू छोटानागपूर अरा हिन्द् बेलखाप गही मजहिन्ता राजी-पाटी नू रऊ-बसऊ कुँड़ुख़ जन-जातियर गही भखा तली। कुँड़ुख़ कत्था द्रविड़ भखा, एकदन ब्रहुई भखा हूँ बअनर ती डाड़ा ख़ूरका-उरखका भखा तली; द्रविड़ भखा नू तमिल, कन्नड़, तेलगू, मलयालम, गोंड़ी, कुँड़ुख़, टुलु, कोई, मल्टो, ब्रहुई, कोड़ागू, कोलारियन(नायकी), कोटा अरा टोडा कत्था गुट्ठी बरई। पहें दखने तरता भखा तमिल अरा पुरखा कन्नरी भखा गने बग्गेम् सटरका एथेरई। कुँड़ख़र सिन्धु घाटी सभ्यता नू 2500 यीशुस मूँद(ईसा पूर्व) नंना आलर गने अजगड़ धनगर मनर रआ बसआ लगियर, ईर गही तंगआ टुड़ू चिन्हाँ हूँ रहचा। इ कत्था असला मोहर, संजगी, टूड़ू चिन्हाँ अरा भखा गुट्ठी ती चिन्हर मंज्जकी बेई। आ बीरी असला आलर ब्रहुई भखा कछनखरआ लगियर। आर बीनकोन "बीनको", पद्दन "पादु", आलिन "आली" अरा आलासिन "आल" दिम बआ लगियर। ख़ोख़ा सिन्धु घाटी सभ्यता ता आलर असता प्राकृत खिलपइत अरा बया-बड़ही गुट्ठिन एरार नंना राजी तरा बोंगा हेल्लरर। द्रविड़ जाइतर 3000 यीशुस मूँदिम असले उर्खर उतरे अरगनी(पुरबे) अरा दखने उटुरनी(पछमे) तरा काला हेल्लर। इ द्रविड़ जइतर तिम कुँड़ख़र उर्खकर बेअनर। ओरे नू ईर दखने तरता कन्नरा राजी नू कालर डेरा नंज्जर। इसन ईर करकल चाहे कड़कई नामे गही अड्डा नू गढ़े कमचर एकदन दोसर गढ़े बअनर। इदिन कुँड़ख़ बेलस नेखअय नामे कनक पाण्य रहचा, कमताचकस रहचस। कुँड़ख़र गही बअना लेखे कुँड़ख़र अरा मल्लर कन्नरा राजिन्ती उर्खर मध्य प्रदेश ता अमरकंटक मन्नुम कुरूश बेलखाप(देश) नू बरचर।  कुरूश बेलखाप नू ईर चान 900-800(जेसुस मूँद) अनइत बग्गे गढ़े कमअर सालना जिया संगे रआ लगियर। रोहतासगढ़ ता गढ़े  हूँ आ मदिका दिम तली। चान 100(जेसुस मूँद) चेरो जईतर लड़ई नंज्जर, आरिन गा कुँड़ुख़र धूलिन टाट्ताचर, पहें चान 1538(जेसुस ख़ोख़ा) नू तुड़ख़र(मुसलमानर) गही बेलस शेरशाह सूरीस गही लड़ई ती हारअर ईर एंड़ता खोंड़हा नू ख़टरर केरर। कोहा खोंड़हा छोटानागपूर नू बरचा अरा नंना खोंड़हा राजमहल ता परता तरा कालर संथाल परगना अरा गंगा दरंगा नू बसा नंजा। लिटिपरा दुमका ता मल्लर अरा सौर्य पहाडिया अदिबासिर इबड़र दिम तलनर। इबड़ा अदिबासिर गही मल्टो भखा अरा कुँड़ुख भखा आपुस नू सटरकी रई अरा बग्गे फाँक मल्ला। इबड़ा इर्ब कत्था गही टूड़ना-बचना कत्थ-खीरी अरा टूड़ऊ चिन्हाँ(लिपि) गुट्ठी मल रहचा। एकअम कत्थन टूड़ना गही चाड़े मना लगिया होले ईर रोमन चाहे देवनागरी लिपि गही मदइत होअनर। पहें ईर गही अजगुत कत्थ-खीरी अरा बरनिका बइता खीरी, बुझवाइर, दोहा, बकनी, नेत-कत्था अरा डण्डी गुट्ठी नू अजगड़ धनगर रई। जोक खीरी अरा नेत कत्था नंना अदिबासिर गही भखा नू हूँ ख़क्खरई।

कुँड़ुख़र गही छोटानागपूर नू बरना मंज्जा आ बीरी मुण्डा अदिबासिर, असुरर अरा तूरीर रआ लगियर। मुण्डर कुँड़ुख़र गे रआ बसआ खतरी अड्डा चिच्चर। राँची ती उतरे-उटुरनी चोख तरा कुँड़ुख़र गे अड्डा चिअर, मुण्डर दखने तरा बसचर। अँवगेम अक्कु गूटी जोक कुँड़ुख़ पद्दा गही नामे मुण्डा बक्क नुम रई, अरा एकअम मुण्डस पद्दा नू रअदस होले आसिनिम नैग(पाहन) कमनर। छोटानागपूर नू बिहार ती बरचका हिन्दुर(सदानर) अरा तुड़ख़र कुँड़ुख़ारिन तम्है तबे नू नंज्जर। ईर गही कत्था सादरी/हिन्दी रहचा, एकदा कुँड़ुख़ कत्था गही बक्क गुट्ठीन अरा जोक गा कत्थाइनन् हूँ असर नंज्जा। ख़ोख़ा नू कुँड़ुख़र गोट्टे छोटानागपूर नू पसरारर केरर। एकसआनुम ताम एकले मलता मुण्डर हूँ पद्दा नू रआ हेल्लरर। इंव चड्डे कुँड़ुख़ कत्था फिन हेरफेर मंज्जा। इदि ख़ोख़ो कुँड़ुख़र बंगाल अरा उड़िसा राजी तरा उर्खर केरर, एकसन बंगाली अरा उड़िया कच्छनखरनर। इबड़ा इर्ब कत्था हूँ कुँड़ुख़ कत्था गही बक्कन पर्दआना नू संघ्रा नंज्जा। ई बेड़ा नू कुँड़ुख़र कुँड़ुख़ अरा मुण्डा मलता एकअम नंना कत्था नू गुठयारआ लगियर। कुँड़ुख़र गही पद्दा-ख़ेप्पा नू एकअम सरकारी अरा नन-सरकारी खोंड़हा-खुर्जी पर्दआना गही नलख राजी ता पहटा भखा नू मना लगिया अरा अक्कुन गूटी मन्नुम बरआ लगी। कुँड़ुख़र सरकारी अरा नन-सरकारी ओहदारर अरा खोंड़हा नलख ननुर गने राजी ता पहटा भखा नुम कत्था कमनर। कुँड़ुख़र गही ख़द्दर लूरकुडिया नू बंचआ कानर, एकन्नु बंचना गही गही चेड़ऊ(माध्यम) राजी ता पहटा कत्था दिम तली। नन-जईतर संगे हूँ ईर राजी ता पहटा कत्था नुम कच्छनखरनर। कुँड़ुख़र राजी गही लेक्खा नू मूःली रुपे ती झारखण्ड, छत्तीसगढ़, उड़िसा अरा बंगाल नू बग्गे डेरा-बसा नंज्जकर रअनर। इबड़ा राजी ता पहटा कत्था गही आँच हूँ ईर गही उज्जना-बिज्जना अरा भखा नू पड़ारा। ई चड्डे तंगआ अयङ कत्था ती जोक कुँड़ुख़र झारखण्ड अरा छत्तीसगढ़ नू हिन्दी अरा सादरी, उड़िसा नू उड़िया अरा बंगाल नू बंगाली कत्था कच्छनखरआगे बग्गेम भुड़ियारर केरर। कुँड़ुख़र राजी-पाटी अरा पहटा नू इकला मला पहें एंड़ धरम खोंड़हा नू ख़ट्टरर केरर, एकदन संवसार अरा किरसु बअनर। कुँड़ुख़ कत्था गही पोसोरना-पर्दना इबड़ा इर्ब खोंड़हा गही चिंहुट ती मन्नुम बरआ लगी।

 कुँड़ुख़ कत्थन अरबा-तेभआ गे अनइत आःलर चिंहुट नंज्ज ईरयर, इदी गही सटरका नू अनभनियाँ कत्था गुट्ठी बरचा अरा तंम्है असर नंज्जा, पहें इदी गही मूःली अक्कु गूटी ठिमठिम इज्जकी रई। हाँ, नंना-नंना पहटा नू रऊ कुँड़ुख़र गही फुर्चआना अरा कत्थाइन नू जुक्की फाँक रई। आद अड्डा-अड्डा अरा असला आःलर गही असर गुने एन्ने एथेर'ई।

 

रियारका टूड़ा गही मूःली पाँति

एड़पा पल्ली नूँ ख़द्दार गने कुँड़ुख़ कत्था नूं कच्छनखरआ, होलेम आर नम्है कत्थन सिखिरआ गे ओंगोर।