Home Cultural View History Promotion Tribal Christianity Literature News Download Tutorial Members Area Touch It

 

धुमकुड़िया एड़पा

सय नेम्हस एक्का

 

नम्है कुँड़ुख़र गही मझी नूँ धुमकुड़िया गही महबा हुल्लोतिम् बरचकी बेई। ईद ओंटा लुरकुड़िया एड़पा तली। नम्है पेल्लर-जोंख़र तंगआ नेगचार, उज्जना-बिज्जना, एकना दरा धरम गही पइत नू लूर हया चिअना एड़पा तली। ई एड़पा नू कुक्को दरा कुकोयर गे नन्ना-नन्ना कोठी छिंडतारई। धुमकुड़िया एड़पा पद्दन्ती तरकोटी गेच्छम कमतीरई। इदी गही बंचतऊ मस्टर नम्है पचगी मंज्जका बंग्गर मन्नर। आर गही एख़ किय्यम रअर की पेल्लर जोंख़र लूर हया सिखिरनर। कुँड़ुख़र गही पत नूँ बिद्दु-ख़ोजू लुरगर आःलस सय सी.डाँल्टनस आनदस का, "कुँड़ुख़र गही एड़पा सन्नी-सन्नी मनी अँवगेम ईर गही पेल्लर-जोंख़र गे एड़पन अम्बर की धुमकुड़िया नूँ बेडरा काना मनी।" ई कत्था ती एन्ने लग्गी का नम्है धुमकुड़िया ती पेल्लर-जोंख़र गे भंड़ुआ नलख नना गे महबा ख़क्खरई। पहें लुरगर आःल सय एच.रिसलेस आनदस, "ओंटा कुकोय गे तंग्है बेंजा गूटी कुकोयदिम रअना अकय चाड़ मनी, ईदी गही आर अजगुत तिहा लगाबअनर।" पहें एकअम कुक्को अरा कुकोय अगर एन्ने गुन्हा नन्नरदिम चिअनर; होले आरिन दण्डे चिआगे खोंड़हा ता इन्दर'इम ओक्कना-इलना नूँ मल मेसनर, अरा आर मैंय्या ढिबा गही जुर्माना लगाबअनर, तले बेंज्जनर चिअनर। आर नन्ना कुक्को दरा कुकोय ती बेंजेरआ पोलनर।

     कुक्को दरा कुकोय एका बीःरी सोय(छः) बखर घी मन्नर, होले आरिन ई धुमकुड़िया एड़पा गही सदस्य कमनर। पुरखा बेड़ा नूँ परिदका कुक्कोर ई परदु कुक्कोस गही डेब्बा ख़ेक्खन धरअर दरा आस गही ख़ेक्खा नूँ बड़ी किय्या ओलदअर दरा पंचे गो गड्डी चिन्हा कमआ लगियर। इती गही ख़ोख़ा आर पत्तआ लगियर का, ईस एकअम अवला ख़ेंख़ेल घी एकअम कोंड़ा नूँ हों खेओस, होले आःलर ऊ चिन्हान् एरार की अख़आ ओंगोर का ईस कुँड़ुख़स तलदस।

    धुमकुड़िया एड़पन्ता एन्देर'इम कत्थन हूँ बहरी ता आःलर रिन मल तेंग्गना गही अइन रई। एकअम आःलर ई अइनन् एसनर होले आरिन सजई चिआगे ढिबा गही दण्डे लगाबअनर। आरिन तम्है खोंड़हन्ता नलना बेचना अरा इन्दिर'इम ओक्कना-इलना नूँ अँव गूटी मल मेसनर, जब गूटी का आर गे क्षेमा मल ख़क्खरई काली।

    एकअम कुक्कोस दरा कुकोय ई एड़पा घी सदस्य मन्नर कानर होले आर तम्है ती कोहा परिदका जोंख़र-पेल्लर गही खूब तेतर-सुसर नन्नर, दरा आर गही ख़ोख़ा एःकर ढेर बग्गे लूर अकिल सिखिरनर। ईर गही बंचना ओक्कना(कलास) हूँ मनी एकदन पचगी मधे आःलर तेंग्गनर दरा सिखिबअनर।

     धुमकुड़िया एड़पा नम्है पुरखर गही कोहा लुर अकिलन दरा उज्जना-बिज्जनन् ईदई। इत्तरू आर तम्है उज्जना-बिज्जना दरा नेत धरम गही नेगचार अउर पुरखा खीःरी गुट्ठीन तेंग्गा लगियर। ई लेखा आर तम्है जई-पुईर नूँ तंगआ कत्थन चाँख़आ लगियर।

    बरा नाम हूँ ई धुमकुड़िया गही महबन परदओत। ई बेड़ा नूँ धुमकुड़िया गही उज्जना मुँजुरकी काला लगी। नाम ईदिन एबसआ लगदत। ढेर बग्गे पद्दा नूँ गा धुमकुड़िया एड़्पा हई दिम मल्ला। एकअम पद्दा नूँ रई हूँ पहें पेल्लर-जोंख़र अइय्या काला ओक्का मल बेद्दनर। आर गे इसन काला गे बेड़ा मलकी। बरा नाम अनइत पद्दा नूँ गा खली धुमकुड़िया एड़पन एःदआ गे सरकार तरती मलता खोंड़हा तरती कमतारकी बेई। इत्तु आर एःदआ बेद्दनर का, कुँड़ुख़र मजही एन्ने उज्जना-बिज्जना मना लगिया। नमागे चाड़ रई का लज्जे-बिज्जेन् अम्बर, इकला एःदआ गे मला पहें मानिम अदि गही मूःली घोख बेसे इदिन बेवहार नंना अरा इदी गही महबन पर्दआना गही चिहुँट ननोत्। होलेम ई पुरखा खुरजिद् नम्है जई-पुईर गुसन् कड़तारआ गे ओंगो।

 

रियारका टूड़ा गही मूःली पाँति

पूजा-बंचना, गिर्जा-निहोरा नंना, धुमकुड़िया ता तिगाबअना, परब-तिहार, कत्था, डण्डी अरा नलना-बेचना बीरी कुँड़ुख़ गही बेवहार नन्ना चाही।