Home Cultural View History Promotion Tribal Christianity Literature News Download Tutorial Members Area Touch It

 

ख़द्दी परब

रेभ.ए.ग्रिनगार्ड

 

फग्गु केरका ख़ोखा नूँ कुँड़ुख़र ख़द्दी मन्नर। आ बीःरी उर्मिन्ती कोड़हे झखरा मन्नन् इदातो चाला पच्चोन् ओहमा नन्नर दरा अदिगे दाँड़े अरगनर।

      इकला खद्दी मनआगे ओरे मनी, अउलम नैगस दरा इड़बुस दरा आर गही मुक्कर पैरी बीरिन्तीम उबुसनर। नैगस दरा इड़बुस इर्बारिम पद्दा नूँ एड़पा एड़पन्ती जोक्क-जोक्क तीख़िल ऊःजनर। मुक्कर अदिन आर गुसन ओन्दोरनर, ख़ने नैगस हों आर गे जोक्क किरत्आदस; एन्ने नन्नाती नैगस उर्मी एड़पा ता खुर्जी-पंजा नू दान चिअदस। मुक्कर नैगस गुस्तिले इंदिरका तीख़लन एड़पा ओन्दोरनर, अरा तम्है एड़पा उला चाँख़नर। आर ओड़गनर एन्ने नना ख़ने एड़पन्ता खुर्जी-पंजा बग्गे  मनी।

      कुक्क चप्पो बीःरी नैगस अरा इड़बुस अरा कएनी आःलर नेग गही आलोन चाला पच्चो गही नेम्हा अड्डा नूँ होअनर, इदातो, खैर, आबदा तीख़िल, आबदा मेर, पुना अड़ी, कट्टु, तवा, डबना, अन्ति इसुंग, सिन्दरी, पुना कन्तो, कलछुर, अरा नौर पूँप। ओन्टा केंतेर नूँ आद चान बिड़दन्तिम नैगस गे चिच्चका रई, आस चोक्क आबदा तीख़िल अरा नौर पूँपन उइदस। झरा अरा अरखी अरा जोक्क आबदा तीख़िल गुण्डा, इबड़ा उर्मी आलो गुट्ठिन नैगस सपड़आदस। इड़बुस हों अधी मांख़ा ओन्द चिरखी अम्म पुना अड़ी नूँ निन्दस दरा झखरा गुसन अंड़सत्आदस। माख़ा नूँ अड़िन्ता अम्म बत्ती होले आःलर आन्'नर इदना चेंप जुक्की मनो; मुन्दा  आ अम्म मल बत्ती होले बअनर, इदना बग्गे चेंप पुँइयो।

      अन्तिले पैरी बीःरी नैगस नेग ननागे ओरे नन्दस। उर्मिन्ती मुन्ध आस झखरा मन्न मूःली नूँ आबदा तीख़िल गुण्डन् बींड़दस, अन्तिले आबदा तीख़िलन अड्डा मुन्द जोक्क-जोक्क ख़ट्टदस अरा उइदस। इदिन ख़ोर पिसी मूँख़ी होले खेप्पर कच्छनखरनर; झखरा पत्तारा। ई मन्न नूँ पोंज्जदस(इदातो चाला पच्चोन् पुना किचरी कूरत्आदस) अरा अदिन बेंज्जदस। ख़ोख़ा नूँ तान इसुंग अरा सिन्दरिन तंग्है कपड़े नूँ एँड़ बड़ी दरा एंओख अरा ख़ेबदा गुट्ठी नूँ टूड़दस। अन्ति ख़ेरन् असन एड़बदस अरा गोहरारदस की बअदस, "अनय झखरा पच्चो, नीन कोड़े-कोड़ेम इदना चेंप तइके; पद्दा-ख़ेप, एड़पा-पल्ली, ख़ल्ल-उखड़ी दरा उर्मी खुर्जी-पट्टी नूँ दव चिअके।" अन्ति उर्मी नाद गुट्ठी गे असानिम ख़ेरन् ओन्टा-ओन्टा एड़बदस अरा उर्मिन्ती ख़ोख़ा धर्मेस गे पंडरू कोकरोन् एड़बदस।

      इबड़ा मंज्जका ख़ोख़ा इड़बुस आ पुना अड़िन्ता अम्म ती सुड़ी मंडी बीत्आदस। मंडी अरगी बिअना गूटी नैगस जोक्क खेप्पर गने पद्दन्ता खूडी-खूड़ी कुद्ददस; अस्सनुम, पाड़नुम, केंतेर अरा नौर पूँपन होअर की एड़पा-एड़पा कादस दरा मुक्कर गे ओन्टा-ओन्टा पूँप ख़ट्टदस। ख़ोख़ा नूँ आ चाला गुसन किर्रदस। चाला किर्रका ख़ोख़ा मेतारिन सूड़ी मंडी ओनागे एड़आ फिन हों पद्दा कादस। एन्नेम आस अरा खेप्पर पार-मुन्द कानर कानर-बरनर। कालो बरओ बीःरी एन्ने डंडी पाड़नरः

1.

सारिन्दा गोसाईं सारेम, हरे ख़द्दी ननोत।

हरे फग्गु ननोत, हियो  ही, दलदल, हियो ही।।

2.

सारिन्दा गोसाईं सारेम, इन्ना ख़द्दी केरा,

नेला फग्गु केरा,हियो ही, दलदल, हियो ही।।

सूड़ी मंडी बिच्चका ख़ोख़ा नूँ पंचे चेल्पा गुट्ठियर मुन्ध ओन्नर। आ बीःरी नैगस उर्मी नाद गुट्ठी गे ख़ेर गही उंबलख़ोन् अरा सूड़ी मंडिन अरग्आदस। अन्तिले ओर्मा खेप्पर ओन्नर-मोंख़नर।

       बीःड़ी पुत्ती ख़ने ओर्तोस नैगासिन पाकदस की एड़पा ओन्दोरदस। नैगनी चाली नूँ आस गही ख़ेड्डन नूँड़ी, अन्तिले आस एड़पा कोरदस। आ उल्लम नैगनी हों पद्दन्ता ओर्मा मुक्कर अरा ख़द्दर गे तंग्है एड़पा नूँ मंडी बीत्ई, अरा ओर्मारिन ओन्तई। इदिगेम नैगस गे नैग ख़ल्ल हुल्लोतिम चीतारकी रई। एकत्ती आस पद्दा-खेप्पारिन् ओन्तआदस मोंख़तआदस। आ उल्लम नैगस तंग्है एड़पा नूँ नौर पूँपन केर्रदस।

        नेलन्ता उल्ला पइरी बीःरी आस अरा इड़बुस ओर्मा अद्दियर गही एड़पन्ती ओर ननर गंवरोर गही एड़पा गूटी नौर पूँपन ख़ेर्रनूती कानर। आ बीरिम मुक्कर इर्बर गही ख़ेड्डन् नेड़नर की आरगे ओन्द अउड़का आबदा तीख़िल अरा ओन्टा ढिबा चिअनर। अदिन नैगस पस्ती नूँ इंजिरदस, दरा आ तीख़िलनिम मुक्कर गे जोक्कन् किरत्अर आर गे नौर पूँपन चिअदस। अबड़न आर केंतेर नूँ इंजिरनर। इड़बुस मेसगा मंइय्या अम्म तुंद्ददस। इदिन हों मुक्कर तम्है केंतेर नूँ इंजिरनर अरा एड़पा मंक्खनर। एन्ने नन्नाती अबड़र ओड़ोगनर एम नैगस तरती ले दव ख़क्खदम।

       एन्ने-एन्ने नेगचार नन्नाती कुँड़ुख़र ओड़ोगनर; अक्कु गा उर्मी नाद तंगआ अड्डा नूँ उक्किया।

        ई परबन कुँड़ुख़र ख़ेंख़ेल बेंजा हों बअनर। ख़द्दी मंज्जका ख़ोख़ा आर ख़ल्ल-उखड़ी ननागे ओरे नन्नर अरा बअनर; उया-ख़ोसा, बिहनी चाँख़आ। अक्कु एन्देर एलेचना हों मल्ला। ओना-मोंख़ा, कोड़े-कोड़ेम उल्लन् खेपआ।

      नैगस इबड़ा नेगचार नंज्ज ख़च्चदस की ओन्टा ख़ेर एड़बदस दरा केंतेरन् तंग्है एड़पा उला ओकताआदस। आ केंतेर चान मला बिड़दा गूटी आस गही एड़पानुम रई।

 

रियारका टूड़ा गही मूःली पाँति

तंगआ ख़द्दृ-ख़र्रर, दोकान, एड़पा, पद्दा-ख़ेप्प अरा धतम गुट्ठी गही नामे कुँड़ुख़नुम उयना चाही।