Home Cultural View History Promotion Tribal Christianity Literature News Download Tutorial Members Area Touch It

 

कुँड़ुख़र गही कोहा पबनी परब

सय रामकिशुन उराँव, सुनसरी, नेपाल

 

पबनी-तिहार आःलारिन सभ्य कमई। आःलर सामाजिक प्राणी हिकनर औंगे समाजन मिलरआकी रआगे समे-समे नू भिने-भिने खल्लही सामाजिक रीति रिवाज, पबनी-तिहार गुट्ठी मनआ पड़ारई। आदिबासी जनजातिरही समुदायन हुरमी ती बग्गे पबनी-तिहार गुट्ठी मनी। आद हूँ भिने-भिने जनजातिर नू भिने-भिने पबनी-तिहार गुट्ठी।

     कुँड़ुख समाज हूँ सालभर नू सन्नी कोहा खरा बग्गे पबनी-तिहार गुट्ठी रई। अबड़न कुँड़ुख़र मन्नुम बरचका रअनर। कुँड़ुख़रही कोहा पबनी करम ही बारे नू भोकहा-7 और भोकहा-8 नम्मरता कदमलाल उराँव, मन्तलाल उराँव, रतिलाल उराँव, राजकमार उराँव, चन्द्रमान उराँव़ बाबुलाल उराँव, दुःखा उराँव, दिपेन्द्र उराँव लगायत आःलर संग्गे सामूहिक रूप नू उराँव भाषा संयोजक रामकिशुन उराँव जीस संग्गे नंज्जका कत्था गुट्ठीन ई करम कत्थन प्रस्तुत नंज्जका रई। इबड़ा कत्था गुट्ठी टेप नू नंज्जका रेकाड ही आधार नू लिखचका हिके।

1. कुँड़ुख़र करम इकलाती मन्नर?  कुँड़ुख़र ही कोहा पबनी करम हिके। करमन होमरा कुँड़ुख़र मन्नर। कुँड़ुख़र करम इकलाती मन्नर इदी गही इतिहास नू लिखरका मल्ला। मतर एम्है अज्जो बगर बआ लगियर ई करम तो एंग अज्जो बगर ही पाला ती पहलेतिम मनआ लगियर।

2. कुँड़ुख़र एन्देर गे करम मन्नर?  कुँड़ुख़र करम मन्नर एन्देर गे की ईद बबा पुरर्खारती मन्ते बरचका रई। ईद कुँड़ुख़र ही संस्कृति हिके और अपना संस्कृति जोगाबआ गे नाम कुँड़ुख़त करम गड़दत। नम्है कुँड़ुख़ारीन कोहा कोहा समस्या और अनिकाल ती करम बबास बछाबाचस और रकक्षा नन्जास औंगे कुँड़ुख़र करमन कोहा पबनी ही रूप नू मन्नर।

3. ई करम पबनीन् कुँड़ुख़र कुना मन्नर का दोसरा जइतर हूँ मन्नर?  ई करम पबनी वास्तव नू बआ होले नम्है कुँड़ुख़र ही मल्ली। ई करम पबनी खास नू बआ होले मुसलमानर ही रहचा और नम्है कुँड़ुख़र ही खास पबनी बआ होले मुसलमानर जे अक्कुन मन्नर मुहर्रम आद रहचा। अदिन कुँड़ुख़र दाहाँ बआ लगियर और साबिकता कुँड़ुख़र डन्डा भंज्जना नू बहादूर रहचर। मतर ई कत्थन अक्कुन नाम ननोत होले उचित मा मनो एन्देर गे कि नाम करमन नम्है कोहा रूप नू मन्नुम बरआ लगदत।

     करम पबनी कुँड़ुख़र ही संग्गे-संग्गे और जइतर हूँ मन्नर। आदिबासी जनजातिर जेना मुड़ार, खड़ियर, किसानर, सतारार गुट्ठी हूँ करम मन्नम बरआ लगियर। अक्कुन अबड़र करम मन्नन अम्बियर चिच्चर। करम मा मन्नर।

       करम बबास ही सक्तिन् बिस्वास ननु एकऑम जइतर हूँ करम गड़नर। निपुतर आःलर गछरनर कि हे करम बबा! एंग्गा गे कुक्को ख़द्द मन्जा होले एन करम गड़ओन। और गछुवा करम गड़नर। ईदी ही उदाहरण समाज नू बिद्यमान रई।

4. कुँड़ुख़र करम इकला मन्नर?  कुँड़ुख़र करम खास बआ होले भदो पुरन्वाँ नू मनी, और ईदिन दसमी गुट्ठी हूँ एसन एसन मन्नर।

5. जब करम ओन्टेम पबनी हिके होले ईद एन्देर गे भिने-भिने जगहा नू भिने-भिने समे नू गड़रई? करम विभिन्न खल्लही मनी - राजी करम, डिड्डो करम, जितिया करम और दसहरा करम। भदो पुरन्वाँ नू गड़रऊ करमन नेग करम बअनर और ईदिन नैगर कुना गड़आ ओंगनर, दोसरार गे गड़आ गे मा मिलरई। औंगे एका आःलार ही गछुवा करम मनी अब्ड़र हूँ समे मिलाबअनर की करम गड़नर। और एका पद्दा नू नैगर गड़आ पोल्लार होले आ पद्दा ता आःलर जोंख़ करम गड़नर की करम बबासीन पुजनर और बेचनर नलनर।

6. एन्ने ए-रा होले कुँड़ुख़र करम पबनी ओंद महिना धक्का अंड़सी। कुँड़ुख़र ही कोहा पबनी नू सरकारी बिदा मना सकई मतर ई सेवा सुविधा ती कुँड़ुख़र एन्देर गे गेच्छा रअनर?  वास्तव नू एःरा होले कुँड़ुख़र ही करम कोहा पबनी हीके। ईदिन कुँड़ुख़र ओंद महिना धक्काम मन्नर। एन्ने ओंद महिना ही करम पबनी ही खतरी सरकार ती कुँड़ुख़र ही खतरी ओंद महिना ही सरकारी बिदा चिआ गे पोल्लो। बग्गे नू बग्गे ऊँदुल या दुई रोज ही बिदा चिआ ओंगो। और ई सुविधान होआ गे कुँड़ुख़र गे करम पबनीन ढंग से ऊँदुल या दुई रोज नुम होमरा कुँड़ुख़र गे मनआ पड़ारओ। भदो पुरन्वाँ नुम होमरा कुँड़ुख़र करम मन्जकाती सरकारी बिदा होआ गे बेस मनो और सरकार हूँ सहजेम बिदा हूँ चिओ। औंगे ईदिन ओन्टेम राष्ट्रिय पबनी कमना जड़ुरी रई।

7. कुँड़ुख़र करम एकासे मन्नर?  करम मन्ना विधि पिच्छेम जोक-जोक फरक मनी। नैगर गुट्ठी तम्है मुड्डा और नाद ही अनुसार  करमन गड़नर।

    ईन्दऊम फरक रई, अन्नु हूँ करम ननागे ओंद हप्ता अगु जवा ख़ोप्पनर। जवा नू मके, जौ, तील, ख़ेस्स गुट्ठी बलु नू मेसाबअनार की सौंसे टोलाबलार गे जवा ख़ट्टनर। ठीक आठ दिन नू करम मनी। करम उल्ला अड़पा  पलिन नत्नर नोड़नर। नैगर ने रम गड़नर अब्ड़र उबुसनर। तीन ती पाँच गोड़े जोंख़र और पेल्लर हूँ उबुसनर। असमा बारनर, बोथाझरा काचका मन्नर। बीड़ी पुत्बारी मर्दर करम खन्डा गे कानर होले पेल्लर ककड़ो पूँप तोक्खा गे कानर। करम खन्डनर की ओन्द्ररनर और नैगास ही अड़पा नू छप्पर मैया उइनर। मला होले एक्के बेर अखड़ा नू होअनर की गड़नर। भइर मांख़ा बेचनर नलनर और पैरी बाकी करमन चड़नर की पद्दा नू तीन या पाँच घर मलता सौंसे पद्दा नू कुत्आनर की पोखारी, नहर या ख़ाड़ नू होअनर की भोसाबअनर चिअनर और करम विधिवत् रूप नू मुँजुरई।

8. करम नू तीन ठो ठल्लीन खन्डनर। आद हूँ ओंद, दुई और तीन डाड़ा मलाहोले ओंद, तीन ओर पाँच डाड़ा ही एन्ने एन्देरगे?  वास्तव नू करम खन्डा कानर होले तीन ठो ठल्लीन खन्डनर। आद हूँ ओंद, दुई और तीन डाड़ा मलाहोले ओंद, तीन ओर पाँच डाड़ा मन्जका।

       अक्कुन खास करके ओंद, दुई और तीन डाड़ा ठल्लीन खन्डनर की ओन्दोरनर की गड़नर। ईदी गही ख़ोख़ा ओन्टा कोहा धार्मिक आस्था और विस्वास रई। तीन डाँड़ा वाला ठल्ली तीन ठुर जनाबई - ब्रह्मा, बिष्णु और महेश। दुई  डाँड़ा वाला ठल्ली ब्रह्मा और बिष्णु जनाबई होले ओंद डाँड़ा वाला ठल्ली महादेव बबासीन जनाबई। करम धार्मिक और धर्मेस ती जोड़रकी रई औगे नमा गे करम मन्दत और धर्मेस ही सेवा नन्दत।

9. करम नू एन्देर खीःरी तेंगनर?  करम नू तेंगना खीःरी फरक रई। तिंगू आःलर अपना मन अनुसार खीःरी तेंगनर। ईया नू कोनो एकरूपता मल्ला। एन्देर गे की अख़ऊ बल्लु एकअम आःलर खीःरी तेंगा गे भिड़ारनर कानर। मतर ई करम खीःरी ओन्टेम मन्ना चाही। एन्देर गे कि करम ही इतिहास और ईदी ही महत्व ही बारे नू जानकारी चिई।

10. करम एकासे चड़नर और इदिन एकासे भोसाबअनर?  करमन पैरी सबेरेम जलखे बीड़ी अगु जड़नर। करम चड़आ गे दुई ठो पेरवाँ, ओंद बोतोल अरखी, पान, सोपाड़ी, केड़ा, लड्डू, धूप अगरबत्ती लग्गी। तम्है बबापुर्खार ही नामे उचारा नन्नर, देबधरम ही नामे नन्नर और इबड़ा चीज गुट्ठीन अर्गआनर की करमन चड़नर और उबुसका पेल्ल ख़द्दारिन धरतआनर और अबड़र अदिन होअनर की पद्दा नू हारार ही अड़पा पली नू कुत्तआनर। अड़पा वालार करमन चुमाबअनर और दानदछिना चिअनर। ताब सांझ तरा करमन होअनर की नहर, पोखारी या ख़ाड़ नू भोसाबअनर। एन्ने नन्नुम करम विधि अनुसार मुँजुरई।

 

रियारका टूड़ा गही मूःली पाँति

एड़पा पल्ली नूँ ख़द्दार गने कुँड़ुख़ कत्था नूं कच्छनखरआ, होलेम आर नम्है कत्थन सिखिरआ गे ओंगोर।