Home Cultural View History Promotion Tribal Christianity Literature News Download Tutorial Members Area Touch It

 

कुँड़ुख़ आदिवासिर

इसदोर ख़ेस्स

 

छोटानागपूर नू मुण्डर गही बरना अरा आर गी बसचका ख़ोख़ा अकय ओड्डी बच्छर गूटी एका जातियर हूँ इसन मल बरचर। मुण्डर ही टूड़ना-बचना बलना चड्डे तम्है उज्जना-बिज्जना गही इतिहास का लेक्खा आर गुसन मला रहचा, अरा आर ही भखा  ही लिपि का अक्षर मल रहचा; पहेंस आर बुद्धमान रहचर, एन्देर गे का आर गही समाज ता उज्जना-बिज्जना, नेक-नेम्हा, व्यवहार परदकी रहचा। ई मुण्डर छोटानागपूर ता धनी टोड़ंगन खण्डर अरख़र आड़ी फंदअर खिती नंना जोगे ख़ल कमचर। ईर आर्य जातियर मला न ईरही आर्य जातियर गने का बारगीर गने लड़ाई झगड़ा मल्ला मंज्जका। अँवगेम ई खोंड़हा सोझ, ईमान अरा सलसंत रउर, पहेंस चतुर दरा अरबर मल रहचर।

       मुण्डर ही बसचका ख़ोख़ा अउर ओन्टा आःल खोंड़हा छोटानागपूर नू बरचा। आर ई मेच्छा टोड़ंग नू बरअर मुण्डर गने भेंट मंज्जर। आर ख़ने एंड़ोर ही कया भुजा, चेहरा मिलरआ जुलरआ लगिया। आर कुँड़ख़र रहचर। आर गुस्ते तमागे रआ अड्डा नेचर। मुण्डर ईरियर का ईरगा तम्है बेसेम मुहटन अरा चाल-ढाल एथेरनर, खली भखा मल बुझुरतार'ई अरा तनिक दया ननर आरिन आ अड्डा ती उतरे-पश्चिमे परती टोड़ंग चतरअर बसआ गे आनियर। मुदैर ई कुँड़ख़ारिन लड़ाई ननर हरा बाचका रहचर। ईरिन जितअर तितिर बितिर नंज्जका रहचर। ईर ही नेखैय ख़द्द लवरा, नेखैय जवान बेटास, बेटी अरा मेतस लवरस मलता डहरे नू अकय दुक्खे, खिलपत ती केच्चर केरर। आ चड्डे ईर ही चेहरा मड़िख़का रहचा। ईर उतरे भारत ता पच्चा रअना अड्डा ती बोंग्गर। सोन ख़ाड़ गंडा-गंडा मन्नुम परता-टोडंग नू नुख़ुरअर उतरी कोयल ख़ाड़ गंडा गंडाम झारखण्ड नू बरचर। ईर अधा खोंड़हर तनिक बग्गे मनर मध्य प्रदेश अरा अधहर छत्तीसगढ़ तरा पार मंज्जर केरर।

       श्री एस.सी.रायस जे आदिवासिर ही पत्त नू अकय खोज पड़ताल ननर कोंहा लिखउस हेकदस, आस ही घोखना रअई का कुँड़ुख़ आःल खोंड़हर छोटानागपूर नू एका सताब्दि अबड़ाती बरचर ठउकम तेंग्गना मसकिल रअई। हाँ कुँड़ुख़र मुण्डर ही बरचका, बसचका अरा खेती बारी ननर अकय बच्छर उज्जा लगियार, ख़ने बरचर।

       आ ख़ोख़ा पंचे सदी(ए.डी.) ईसा सी जन्मार का ख़ोख़ा कुँड़ख़र अरा मुण्डर एंड़ोर ओक्कर फैसला नंज्जर का मुण्डा मानकी सी ओहदा ती मंइय्या अउर ओन्टा हुदा मनी आद "राजास" रओस। अँवगे कुँड़ख़र इबड़ा एंड़ो तारीख मजही नूँ छोटानागपूर बरचर। एन्देर गे का ईर ही बरचका ती राजास गही हुदा चुनतारा केरा अरा ई हुदान कुँड़ुख़र बितिरका अड्डा ती ओन्दरर बरचर। आर ही कच्छनखरना भखा कुँड़ुख़ बातार'ई। छोटानागपूर नू हूरही अंड़सना ती मुधे ईर ही पत्त नूँ बातार'की रई का एकसन जे ईर रआ लगियर, असन ईर ही मुद्हास "हीरो" राजा कुँड़ुख़ बातार'आ लगियस। ईर द्राविड़ व्यवस्था गने जुटुरका रहचर। उराँव नाम् हिन्दुर चिच्चका रअनर। ईद मलदौ माने लगा बाचका हिके। नन्नर ईरिन भारतीय आर्य-रावना-पूर चाहे रावना ही बनसज चाहे संतान द्राविड़ राजा रावन नामे ही उच्चारण जुदा-जुदा भखा ती ने-ने "ओ" ने-ने "उ" मेनुसही ख़ेवदा नू एकन्ने मेन्दरा "ओराँव" चाहे "उराँव" अरा आस, आ मेन्देरना आवाज का स्वर नन् तंग्है मेंज्जका स्वर नुम लिखदस उइदस।

 

सामाजिक बेवस्थाः कुँड़ुख़र खेती बारी नन्नु अकय आगे रहचार। तम्है जनसंख्या नूँ हूँ चाँड़े बढ़रआ हेल्लरर। कुँड़ुख़र मुण्डर गने मेनर ख़ोजर आरती अड्डा नेअर बसचका रहचर। मुण्डर आरिन तम्है ती तनिक फरकेम उत्तरी-पश्चिमी छोटानागपूर चिच्चका रहचर अरा कुँड़ुख़र आ बेल्ख़ा तरता परतन चतरअर कमअर गोहला उइया ओरे नंज्जर।

       असल नूँ मुण्डर तमन् तनिक बइढ़-चइढ़ के सभ्य अरा बुद्धमान सोचआ लगियर, पहेंस आर गे उगती कमना अरा उईना हेतेड़ मल रहचा, दरा आर कुँड़ुख़र गही उइनान एःरा बरचर। ख़ोख़ा आर हूँ गोहला उईया हेल्लरार। गोहला ती अकय बग्गे ख़ल्लद् उईर'आ हेल्लरा। तब ख़ोख़ा पुना बर'ऊ कुँड़ुख़र गही दव-दव नेग-चारन् मंजूर नंज्जर। कुँड़ुख़र गने भाई-भाई गही व्यवहार नना हेल्लरार, अन्नु हूँ कटिक तमन चामड़ी बेसे कोंहा मनआ लगियर।

       धीरे-धारे कुँड़ुख़र हूँ मुण्डर ही "खूँट" अरा कट्टी विधिन तमागे होच्चर। एन्नेती एंड़ो खोंड़हर ही सामाजिक व्यवस्था मेल मोंख़ा लगिया। मुण्डर नूँ खूँट गही अरा कट्टी ख़ोख़ा कोंहा मानकी मुण्डा मना लगियर कुँड़ुख़र हूँ बेल्ख़ा "राजा" गही संस्थान परदाचर। एंड़ोर ओन्द अड्डा ओक्कर "राजा" सी ओहदा चुनचर जे एंड़ो खोंड़हर गही अगुवा मानतारस केरस। पहेंस एंड़ो खोंड़हर ही प्रजा, राजास गे ख़ल्ल उखड़ी गही ऊर्ब हक मल चिच्चर, बछरका जेतना ख़ल्लन प्रजा खोती नना लगी। अदिन प्रजा खुदेम खेती नन्ना जोगे कमचकी रअई, राजास मल्ला चिच्चका। अँवगे राजास प्रजा ती ख़ल्ल चेंख़ेल ही माल गुजारी होआ पोलदस। हाँ, प्रजा खुदेम बच्छर नू ओंगहोन राजास गे तंगआ पया पुर्ती दान चाहे भेंट चिओ। राजासिन ख़ापना अरा सौंसे बेल्ख़ा नूँ बरगीर ती बछाबअना, ख़ापना प्रजा ओपन ती ननो।

       उल्ला बित्तरा, चन्दो बित्तरा, बच्छर बित्तरा, अकय ओड्डी बित्तरा केरमे-केरमे राजास तंग्गन उर्बास बेसे मनआ हेल्लरस अरा  आःलारिन सन्सी कमआ हेल्लरस, आर ती चन्दा अरा माल गुजारी नेआ हेल्लरस।

       कुँड़ुख़र हूँ मुण्डर बेसेम परतन् चतरअर ख़ल्ल कमचकाचर अरा आर हूँ तम्है टोला, पद्दा बसा बाचर। कुँड़ुख़र हूँ भुँईहार बातारर। आर गही ख़ल्ल भुँईहरी ख़ल्ल बातारआ हेल्लरा। पद्दन भुँईहार ख़ल्ल, ख़ेंख़ेल आर ही मानीकाना हक रहचा। एन्ने ती, आ पद्दा नू ख़ोख़ा ती आःलर बसआ बरआ लगियर, आर ती तमन कोहा बआ लगियर।

       मुण्डर ही मजही पद्दा खोंड़हर जमर समलेट पद्दा बेल्ख़ा ही उर्मी किसिम ही ख़ल्ल ही हकदार मना लगियर, पहेंस कुँड़ुख़र ही मजही खली ओरमर ही हक जमीन मइय्या समलेट मालीकाना हक ख़क्खरा। धन अरा अदि ही हक आस ही परिवार की ख़ेक्खा नूँ रहचा अदिन कुक्को ख़द्दर, बपौती हकदार मनआ ओंगनर। कुके ख़द्द जवान मनो की अदी ही बेंजा मनो कालो। बेंजा मंज्जका ती कुके तंग्है आःलस गनेम असता धन-दौलत ही हकदार मनी काली।

 

धार्मिक बेवस्थाः कुँड़ुख़र आस्तिक मन्नर, नास्ति मला। ईर ओन्टे सवंग मंईय्या पइतआनर, अदिन धर्मेस बअनर। धर्मेस आःलर ही सिरजऊ तइलदस। धर्मेस दव आत्मन हूँ कमचकादस। आःलारिन अरा जियात्मा ही उर्मी नलखन् मंईय्याती धर्मेस एःरदस अरा अख़दस जियात्मा ही ओहदा लाइन नूँ धर्मेस ही अडाडा चुँदी नू रई। आस दव दूँतर अरा मलदव नादन सकिस्तानुम उइदस। आस धरम नूँ मेच्छा अड्डा उइदस। दुक्ख ससइत बीरी एका ख़ने नन्ना जियात्मा एन्देर हूँ नना पोलनर का ओन्टे हूँ कोड़े नना पोलनर आर धर्मेस ही दुहाई अरा पूजा नन्नर। आ धर्मेस गे कुँड़ुख़र नेवइन उइनर आसही किय्या रआगे गच्छरनर, आ धर्मेस गुसन ओहरा बिन्ती नन्नर। आ उर्मी ऊँग्गु धर्मेस गे दाँड़े अरग'आनर। पद्दन्ता नैगस का बइगस गे आ जियात्मा गही खींसन गोहर'आना मनी नेखअय नेवइन ही इन्देर'ईम बारिता भंग मंज्जा केरा चाहे रोःगे फैलारा केरा।

       अँवगे पद्दा ही लगले टुंगरी का परता हिंसा नूँ मक्का मन्न रखात उइनर, असन छोटे बड़ा अड्डा नूँ डिप्पा टिलहा कमअर गोबारी ती एग'नर उइनर, अदिन सरना चाहे चाला बअनर। आ सरनानुम पद्दाता नैगस चाहे बइगस एमदस ख़जरदस, सफा किचरी-डोड्डो अत्तर जियात्मान् खुस नन्गे दाँड़े अरग'आदस एकन्ने की पद्दा नूँ उर्मी किसिम ही चैन रओ, अरा बिपइत ती धर्मेस बछाबअर उइय्योस। जादू टोना नन्ना नन्नर मलदव आत्मान् तम्है जीना-पानी गे लगाबअनर। अदिन धर्मेस रोकदस छेकदस। मति-ओझा अख़उर इबड़ा मलदव नलकन दव एकन अख़नर। आर अई एक ठो भूतन् तम्है बस नूँ उइनर, अबड़ा प्रेतात्मन् मंत्र् ती पेसअर तोक्खारिन लअनर की बेमार नन्नर चिअनर। अँवगे, मति-ओझा नन्ना कोड़े मल्ली। अन्ने आःलर ती गेच्छम रअना दव हिके।

 

कुँड़ुँख़ रीति-नीतिः कुँड़ुख़ रीति-नीति पुरखौती दव-मलदव ही पैसला जे अद्दियर चला बाचर अदिनिम मन्नुम बरआ लगनर। कुँड़ुख़र तम्है गोतोर तारिन अपन एड़पा तर बुझुरनर। आर गने भाई नाता उइनर। आर गने बेंजा-काजी मल नन्नर। पद्दन्ता एकअम बेसे अरबर-परबर ही गोसा, फूला झगड़ा, ख़ल्ल उखड़ी झगड़न पद्दन्ता पड़हा पंचे फैसला चिआ लगियार। पड़हा पंच नू समाज ता कोंहा आःलर, कानून अरा दस्तुर गही अख़उर ओक्का लगियर। आःलर ही बअना रहचा का मलदव नलख ननुर, आःलर गे मलदव घोखउर गे धर्मेस

तरती सजा ख़क्खर'ई। अँवगे मलदव नलख ननुस सजाई चितार'आ लगिया; सजई गे दण्डे ही रूपे नूँ पंडरू कोकरो धर्मेस गे अरग'आना मना लगिया।

       कुँड़ुख़ ही नैतिक सोंच अरा सामाजिक कजांक रहचा। ईर मुण्डर बेसेम सच्चा कच्छनखरना अरा ईमानदार मना लगियर। पहेंस तम्है बेल्ख़ा नूँ हिन्दु, दिकुर ही कोरचका ख़ोख़ा कोर्ट कचहरी नूँ झूठा केंस नूँ हार'आ हेल्लरर्, ख़ने ईरगे ख़ल्लन बछा बआगे झूठा बअना मना बगिया। झूठा बआगे हिन्दुरदिम सिखाबाचर, एन्देर गे का जमीनदार, उपकेदार अरा साहूकार झूठा केंस लिखअर कचहरी नूँ केंस नना लगियर। अन्ने केंस गही सच्चाई ही गोंवाही पुलिस सिपाही ती अधिकारीर जमर चिआ लगियर अरा आर ही गोवाही ती का झूठा रिपोर्ट तिम अँग्रेज जज्जर जमीनदार, ठीकेदकर अरा सूदखोरर ही पत्त नूँ फैसला चिआ लगियर।

 

टीपः इबड़ा उर्मी मंइय्याता विवरण चाहे मुण्डर चाहे कुँड़ुख़र ही लिखिरका मल रहचा। ईर ही व्चवस्था रीति-नीति, धर्म-व्यवस्था उर्मी दस्तुर मोताबिक पुरखर ही नंज्जकन, ईःरका अरा मेंज्जकन नन्नुम बरआ लगियर। केरमे-केरमे पद्दा बग्गे मना हेल्लरार तो सामाजिक परिवर्तन हूँ मंज्जा नेखअन। अउरे नूँ पड़हा पंच नूँ मना ऊँग्गी, नख पंचर रआ लगियर, ख़ोख़ा आःलर बढ़रर ख़ने पंचे पंच्चर गे अड्डा चिच्चर। बेंज्जा-काजी गही उम्माइर सीमा ओरे नूँ 18 बरिस रहचा नेखअन, ख़ोख़ा 18 ती किय्या बरिस नूँ बेंज्जा आःलर नना हेल्लरर नेखअन। ओरे नूँ बइगा अरा नैगस सरहुल पूजा का नन्ना मोका नूँ चियाँ होआ लगियर, ख़ोख़ा कबरा कसिया ललका, मोंख़ारो अरा पंडरू कोकरो। मना ऊँगी ओरे नूँ उनिम किसिम ही डाँड़े गही आलोद जुक्की रहचा, अदिन, सादा डाँड़े बाचर। अदिती बढ़रअर बग्गे आलोन, बग्गे ख़ेरद्, आद मझला डाँड़े नन्तारा, द कोंहा पूजा बातारा।

        ओरे नूँ मदरा मुण्डस मानकी मुण्डा रहचस। आद कोंहा हुदा रहचा। ख़ोख़ा मुण्डर अरा कुँड़ुख़र चुनाव प्रथा लागू नंज्जर दरा मदरा मुण्डासिन छोटानागपूर ही राजा चुनचर। संगे-संगे फैसला नंज्जर नेखअन का आ राजास गही उम्मइर सीमा एवंदा बच्छर नूँ पुरा मनो, होले प्रजा पुरा राजास गही चुनाव ननो अरा पच्चासिन गुछाबओ पहेंस। अगर अन्ने मला नंज्जर, अँवगे पच्चिकाती राजा मदरा मुण्डस तंग्है पसिन्द लेखे आःल चुनअर दस्तुरन तोड़चस चिच्चस। कुँड़ुख़र गा तम्है मजही रूइदास नूँ ईरका रहचर। आर तम्है राजा सी उत्तराधिकारी ओन्टे कुँड़ुख़ बेटासिन राजा पद चिआ लगियर। अँवगे आस मंईय्या पइतआना मना ऊँगी अरा धोखा चिअना कम। पहेंस इसन एंड़ जातियर मुण्डा अरा कुँड़ुख़र ही मेसा "मत" रहचा। इतिहास गही बेखतिम बुझार'ई का मुण्डर तमन कोंहा, कुँड़ख़ारिन सन्नी खोंड़हा मनआ लगियर। आर मला चाहआ लगियर का अक्कु कुँड़ुख़र राजा मना बेद्दोर। अँवगे चुपे चुपेम प्रजान् अख़आ मला चिअर बलपोस बेटा फणि मुकुट राय जोंखासिन राजा सी गद्दी नूँ ओक्ताचर। मुण्डा राजा सी बलपोस जोंख़ास नूँ आदिवासी खेंस मल रहचा, अँवगे ख़ोंख़ा नन्ना रंग ओन्दरा। ई कड़ी नुम एंगहै सोचना हेके का मुण्डा खोंड़हा नूँ खिती नन्ना जोगे ख़ल्ल तेयार ननर अदिन खूँट कट्टी अरा भुँमिहार ही दर्जा चिआ लगियर अरा आस ही पुर्खती मालकीना पत्थल गड़ही ती सजिकआ लगियर।

        कुँड़ुख़र हूँ तम्है पुर्खाती मालीकाना चिआ लगियर तो अँग्रेजर ईर गही भखा मला बुझुरआ लगियर। आदिवासिर गही भखा ही लिपि मल रहचा। आरिन बेर-बेर अपन भखाती तेंग्गर विश्वास नूँ ओन्दरना रहचा। अँग्रेजर एका राजी केरर अस्ता भखा सिखरार अरा वयापार नंज्जर। ईर कुँड़ुख़र ही भखन लिपि ती सिखरओर कालोर पहें अरा न्याय चिओर पहेंस। इत्तुक मुधे तनिक बितरकान् एःरोत। आद हेके  रूइदास या रोहीदास। बअनर असन गा किला बंदी रहचा। तो अन्नु रऊर हूँ तो अन्नेम चोन्ठा रहचर नेखअन। बग्गे मला तो गिनती गिनआ लगियर, टूड़ा लगियर नेखअन। मला होले आर ही फौदर ही गिनती आर ही अत्तरना किचरी आर ही रसद राजा घरानातर ही रसद, ओन्ना मोंख़ना ही लेक्खा जोक्खा एकासे मना लगिया हेहअन?

       किला कमरनान एरा, ओरे नूँ आ किला गही कमरना ही नक्सा एवंदा खर्चा मनो अदी ही, कचिया, ढीबा तेयार नंज्जर नेखअन। किला ही लम्बाई, चौड़ाई, जनता फाटक, अरा चोर फाटक, डूला। इबड़ा गे एवंदा खर्चा अदिन कमआगे आलोद, पचरी गे पखना, ईट्टा, चुन्ना, सुरखी गही हिसाम किताब। किला कमआगे राज मिस्त्री, रेजा, कुली, पचरी सोझ रई का मला मेःर, साहुल एःरना, एवंदा ईंच, फूट, गज ही नाप, जोखना, तउलना गा मंज्जा नेखअन। एन्देरगे का किला बनआ लगिया अदिगे इंजीनियर, मिस्त्री, आःल मन्ना चाही। बयती आःलर ती किला मला कमरई।

       मने इबड़ा उर्मी जिनिस गही जोड़ घटाव, गुना-भाग अख़ऊ आःल रहचर। कुँड़ुख़र हेद्दे मला रहचर होले आर नन्नर ती टूड़ू-बंचऊ आःल उइय्यर की नलख नन्ताचर। एवंदा उल्ला का बच्छर किला कमआ गे लग्गिया, अवंदा उल्ला गूटी कुँड़ुख़र तम्है आःलारिन, इंजीनियर, मिस्त्री, सिखरआ गे जोंख़ारिन लगाबाचर नेखअन। अई एक कुँड़ुख़ जोंख़र आ बक् टूड़ा चिन्हआ गे ने हूँ पोल्लर होले अदिन एन्देर बओत, अखरी बुड़बक। दुश्मन, बरगीर का तेलेंगर ती हारना बीरी ने मला ने मेतस, पचगिस, जोंख़स, टुडूस-बंचउस, बोंग्गस रहचस नेखअन, आस नन्ना अड्डा कालर तंग्है अकिल नन्नर गे ख़ट्टियस चिच्चस। से इबड़ा दव नापे विचार धारा जो आःल कुक्क गुद्दा नूँ हड़बड़र'तार'ई अदिन अख़आ बेद्दुर गे ख़ट्टना दिम हिके। अदिन छोटानागपूर नूँ बरअर ओरे ती टूड़ना-बचना रहचा।

 

रियारका टूड़ा गही मूःली पाँति

चिट्ठी चाहे ईमेल तंगआ कुँड़ुख़ आलर गुसन कुँड़ुख़ितम टूड़अर तैयना गही चिहुँट नना।