Home Cultural View History Promotion Tribal Christianity Literature News Download Tutorial Members Area Touch It

 

कुँड़ुख़ बेंजा

रेभ. ग्रिगनार्ड

 

पुसे भेल माधे चन्दो नूँ कुँड़ुख़र बेंजेरनर। बेंजान्ती मुन्ध बेंजेरऊ कुक्कोस गही तम्बस पाम ईदउस गही लेके, एकअम पद्दन्ता एकअम ओर्तोस गही तंगदन आनत'आदस। आस कादस अरा कुकोय गही तंगियो का तम्बासिन मेन्दस; "एकअम तरती ई निंग्है कुकोय गे अंड़सोर होले बीसोर का मला?"  अन्तिले कुकोय गही तंगियो-तम्बर आननर, "एकअम तरती अंड़सोर होले गा बीसोम। ख़ने पाम ईदऊस एंड़ तरती कत्था गुट्ठिन अत्तरा-इत्तरा होअदस ओन्दोरदस। अन्ति एंड़ तरती कत्था उक्की होले पाही गे कानर बरनर।

      कुक्कोस तरतीले कालो बीरी आःलर ईरनुम कानर; अत्ती आर अख़आ बेद्दनर, ईर गही बेंजा ठउकम मनो का मला। कानुम-कानुम एकसआनिम छुच्छु का चोट्टो केच्चका ख़क्खोर होले बअनर, "इबड़र गही बेंजा दव मल मनो, बेंजेरओर होले कुक्कोस का कुकोय नेकईम चांड़े खेओर कालोर। ई चड्डे इबड़र अंबर नखरनर।" मुन्दा कालो बीरी मुरखर ढिचुअन मेन्नर होले बअनर, "ईद गा अन्थनदव सगुन मंज्जा।" अन्ति आर ओड़ोगनर; "ईद पुना ख़ई ख़ोख़ा नूँ ओन्टा नरमिया, धिरजा, चोन्हा दरा नलख ननु आःली मनो।"  पाबे नूँ एकसआनिम मंड़ा बस्सनन् एरनर होले बअनर, "इबड़ा बिंजूरऊर गे खरा दव तली।" आर घोखनर "इबड़ा कुक्को-कुकोय गही पुना कुन्दरनम मना लगी, दरा इर्बारिम पच्चना गूटी जूड़ी-पाँति रआ ओंगोर।" एड़पा अंड़िसकाती एन्दरन-एन्दरन बरओ बीरी पाबे नूँ मेंज्जर का ईरयर अबड़ा गुट्ठिन तेंग्गनर दरा मेन्नर।

    पुना पाहियर गही बरचकाती का बरओ बीरी अम्म-अड़ी ख़ोटोरओ का बिल्ली तेभेरओ होले हों सगुन बेस मल मंज्जा आन'नर की कच्छनखरनर। मुन्दा एन्ने मला मनो होले गा दौलेम ओना मोख़ागे चिअनर। उर्मिन्ती मुन्ध एकअम आःली  पाहियारिन ख़ेड्ड नूँड़ी; अन्ति ख़ेड्ड नूँडू आःली गे पाहियर ओन्टा ढिबा चिअनर। ख़ोख़ा नूँ कुक्को-कुकोय तरतर ओन्टा अड्डा नू ओक्कनर। पाहियर गे अरखी ओन्दोरनर का झरा तुन्दनर। अन्तिले ओर्मारिम मुक्कर-मेतर ओन्नर-मोंख़नर दरा कुक्को-कुकोय गही बारे नूँ मेन्नर अरा तेंग्गनर। गोतोर एंड़ तरतादिम ओन्टेम मनो होले बेंजा मला चिच्च नक्खरनर, इबड़र गा ओन्टा एड़पन्तर तलनर; ईर ओन्द कुलियर मंज्जर। ईर-इबड़र गही बेंजा गही एकासे मनो? मुन्दा नंना गोतोरन्तर गने बेंजा चिच्च नक्खरनर। कुक्कोस अरा कुकोय गही कुन्दुरका चान गुट्ठिन मेन्नर तेंग्गनर। एंड़ तरतारिम पत्तारनर होले पत्तारका गही चिन्हा एदआगे एंड़तरता खेप्पर चोअनर अरा समधी-समधी बअनुम बड़िन धरनर; अन्तिले एंवखन एमसर नक्खरनर दरा ख़ोख़ा नूँ ओक्कनर। ओंडका उक्का ख़ोख़ा नूँ तंगआ-तंगआ एड़पा किर्रनर कानर।

      एन्नेम बेंजा अरगी मन्ना गूटी एंड़ तरतिम कानर-बरनर। बेंजा गही उल्लन चाजनर। पाही एड्डका कुकोय तरतीले हों आःलर कुक्कोसिन एरागे कानर। आर हों सगुन ईरनुम कानर। पाबे नूँ उर्मीदिम कोड़े-कोड़ेम मंज्जा होले कुक्कोस गही एड़पा गूटी अंड़सनर। ख़ने कुक्कोस तरतर आरिन ख़ेड्ड नोंड़नर अरा पाही ख़ोजनर।

        कुकोय गही एड़पा नूँ कालो बीरी डली-ढिबा गही कत्था ओथोरनर, आ बीरिम एंड़ तरतारिम अना-मना अलखना गही कत्थन कच्छनखरनर। कुकोय तरता खेप्पर मेन्नर; अन्ति कुक्कोस तरता खेप्पर आना किरत'आनर; कुकोय तरतर; नीम एका  ओर्तर तलदर? एम निमन बलदम। एका तरती बरचकर? एन्दरन बेद्दर?

     कुक्कोस तरतर; एम खरा गेच्छान्ती बरचकम रअदम। गोल्लस गही चिरखी ओन्दोरकम बेअदम। पुत्त-बीरी इय्या अड़िसकम। ई पद्दा नूँ हई ई एड़पा नूँ एम्है ओन्टो ओसर बछिया कोरचा, एम बेस लेकन अख़दम। आद एंवदा-एंवदा उल्लन्ती एबिसिरकी रई। इन्ना एम अदिन इय्या ख़क्खोम।

     कुकोय तरतर अन्ति निम्है ओसर एकासे रई? खेंसो का मोख़ारो; का पंडरू? एन्देर अदी गही मरग हों रई? नीम अदिन अख़आ ओंगोर।

कुकोय तरतर; अक्कुन, एन्देर आ ओसर गही मुल्ली चिआ ओंगोर? एम अदिन बिद्दकम, पोसकम। अदी गही खरा बग्गे ढिबा लग्गो। एम अन्ति बीसोय-एंड़दोय रुपया बअदम।

     एन्नेम कच्छनखरनुम-कच्छनखरनुम ढिबन एत्तआनर दरा डली-ढिबा पंच्चे रुपया मनी। अन्तिले दोय्यो नाखख़ अनान हों ओंटा रुपया कमनर। इदी लेक्खा नूँ, पंच्चे रुपया गही डली-ढिबा तली।

चिरदी गही उल्ला अंड़सा हेलेरई ख़ने कुक्कोस गही तंबस कुकोय गही तम्बस गुया पाब ईदऊस ती मेना तइदस। आस मेन्दस, बेंजा इकला मनो? ख़ने कुकोय तम्बस आनदस, एंगदा हन्नी उल्ला कुन्दरा, अंवगे आ उल्ला अदी गही बेंजा मल बनओ। ख़ोख़ा नूँ कच्छनखरनुम-कच्छनखरनुम उल्लन ओक्तआनर।

     इबड़ा उर्मी ख़ोख़ा बरात कालकगे सपड़ारनर। बेंजा कालो बीरी जोक्क झरा अम्म तुन्दनर ख़ेंख़ल नूँ पचवा आःलरगे, अन्तिले खुशमारना गही चिन्हा गे कंड़सा चोदनर दरा कानाती मुन्ध उड़ुंग चाली नूँ अस्सनर, पाड़नर, नलनर। कंड़सा ओन्टा ख़ज्ज गही भंडा तली, अदिन ख़ेस्स गही बाइल ती तेस्सनर, दरा पूँप ती मेझनर। अन्ति ओरोत मेत मखले आःली अदिन कुक्क नूँ कुम्मर नलतिई। ख़ोख़ा बरात काली। बेंजरऊ कुक्कोस ओन्टा खन्डन होअदस दरा कादस ई खन्डा मेत अरा संवगिया मन्ना गही चिन्हा तली। बेंजा आःलर कुकोय गही पद्दा गुसन अंड़सनर होले कुकोय तरतर हों नलनुतिम उरूखनर। अन्ति एंड़ तरतारिम ओन्द अड्डा नूँ खोंड़ोरनर, अरा असन उड़ुंग पैंकी डेंगनर। ईद कुक्को कुकोय एंड़ो तरतर गही माने ईदिम का कुक्कोस कुकोयन तंग्है सवंग ती जितजस अरा तंग्है एड़पा होआ लगदस। आबीरिम कुकोय तरतीले मुक्कर लोटा नूँ अम्म ओन्दोरनर अरा टट्ख़ा डहुड़ाती बेंजेरऊ कुक्कोसिन अरा पाहियारिन छिटकआनर। अदी गही ख़ोख़ा ओर्मर एड़पा कोरनर।

     ेंजेरऊ कुक्कोस तंग्है खण्डन धरअर इज्जका रअदस। कुकोय तंग दद्स का तंग भटुस बरअर आसिन पाकदस, अन्तिले मड़वा उल्ला ओन्दोरदस। असन आस गही ख़ेड्डन नोड़नर। ख़ोख़ा नूँ कुकोयन दरा ओर्मा पाहियारिन हों एड़पा नूँ एड़नर चिअनर।

कुक्को-कुकोय इर्बारिम इजनर, कुकोय मुन्धभारे, कुक्कोस अदी गही ख़ोख़ा। कुक्कोस तंग्है ख़ेड्ड गही अंगली ती कुकोय गही गुड़खिन एम्सरदस। कुक्कोस गही एन्ने मन्ना आ कुकोयन तंग्है आःली कमना गही चिन्हा तली। कुकोय आसिन तंग्है गुड़खिन एम्सरआ चिई, ईद तबे नू नन्ना गही ओन्टा चिन्हा तली। कुकोय एन्ने मंज्जका ख़ोख़ो आर इर्बारिम ओन्टा पुना पिटरीनुम ओक्कनर। आ पिटरी किय्या मइय्या आःलर कटिकुना दुब्बक जरगन ओन्दोरनर अट्टनर। इत्ती पुना बेंजरऊर उज्जना बग्गे उल्ला मन्नन एदनर, का ईर इर्बारिम कोड़े-कोड़ेम अरा खुशमारनुम तंग्है उल्लन खेपओर। ख़ने इर्बारिम मुक्क्क-मेत मनागे गच्छरत'आनर। बेंजरओ बीरी किचरी ती आरिन ओछोर नंनर। कुक्कोस तंग्है डेब्बा ख़ेक्खान्ती नाख़ता अंगली ती कुकोय गही कपड़े नूँ इसुंग सिन्दरी टूड़दस। अन्ति कुकोय हूँ तंग्है डेब्बा ख़ेक्खाती नाख़ता अंगली ती कुक्कोस गही कपड़े नूँ इसुंग सिंदरी टूड़ी। ईद गा ताम-ताम नूँ बेंजेरना गही ओन्टा चिन्हा तली। बेंजा अड्डा नूँ ओन्टा उगतन भेल पगसिन कुक्कोस गे अरा कुकोय गे पड़चाचन अरा लुड़हिन उइनर। उगती अरा पगसी मेतस गही चिरखी(इदातो नलख) गही, दरा पड़चाचा अरा लुड़ही मुक्का गही एड़पा उल्ता नलख गही चिन्हा तली।

    अन्तिले ओरोत पच्चो आःली(अदी गही मेतस केच्चस होले) बेंजा गही नेगचार ननी। अदी गही मेतस नन्दस उज्जनुम रअदस होले। आ पच्चा बेंजा गही कत्थन एन्ने तिगाबई, कुक्कोसिन एरा हन्नी, ईद हन्नी निंग्है मुक्का मंज्जा। नलख ननो बीरी का अड़ख़ा तोक्खो बीरी, मन्नती खतरओ दरा ख़ेड्ड एसरओ होले का कनी का सोंडे मनो, का एकअम सस्ती ती अदी गही मुंहटन बिगड़ारओ होले नीन अदिन अमके अम्बा। एन्देरआनिम ईद निंगागे बीतओ अदीनिम ओनके मोखके अरा तरिका रअके। अन्ती नन्ना अकअम उर्ती तरा अमबकेम एरा।

     (कुकोयन), अन हन्नियो, एरय। हन्निस निंग्है मेतस तलदस। आस नलख  ननागे का सेन्दरा बेचागे टोड़ंग का परता कालोस, दरा आस गही ख़ेड्ड का ख़ेक्खा एसरओ, का कना मनोस होले नीन आसिन अमके अम्बा।  एन्देरआनिम आस ओन्दोरओस अदीनिम बीतआ'के अरा चिअके। अन्ती नन्ना एकअम ओर्तोस तरा अमके एरा।

बेंजा मंज्जका ख़ोख़ा नूँ ओर्मा आःलर ओन्नर मोंख़नर। अधा-अधी मांख़ा बीरी कुकोयन तइनर। आ बीरी एड़पन्तर नीकइम अदिन पाकनर ओथोरनर, अरा पद्दन्ती जोक्क गेच्छा होअनर चिअनर। अन्तिले कुक्कोस तरतर अदिन पाकनर अरा कुक्कोस गही पद्दा तरा होअनर। ख़ने कालो बीरी कुकोय एन्ने एन्ने बाच-बाज चींख़ी, अन अयो, अन बबा, अना ददा-बगारो, नीम एंग्गन छिपा अम्म लेक्खा एड़पन्ती ओथोरकर, ख़ल्ल-सारे लेक्खम हिबिड़कर।

आ उल्ला कुकोय गने इरिब नुब्ब कुकोय गुट्ठियर कानर; अन्ती जोक्क उल्ला अदी गही हेबेरना गूटी अदी गनेम रअनर। ख़ोख़ा नूँ अन्दिले आद ओतख़ीदिम काली बरई।   

 

रियारका टूड़ा गही मूःली पाँति

कुँड़ुख़ कत्था नूँ टूड़ा-बंचआ, होले ईद आःलर मुंदभारे पर्दा गे ओंगो।