Home Cultural View History Promotion Tribal Christianity Literature News Download Tutorial Members Area Touch It

 

सदौ खुशमारना

सय मंगलदास उराँव, दुर्ग

 

एका मन्न मांस नू हरियर अतख़ा रा पूँप निंद्दकी रई, आद अजगड़ खुशमारना एथेरई। अन्नेम एका मन्न मांस नू अतख़ा अरा पूँप मल रई, आद अजगड़ ख़ोदख़ोरका अरा जेड़जेड़ एथेरई। इ लेखम खुशमारऊ आःलस अरा ख़ोदख़ोरऊ आःलस मजही फरक मनी। एकअम एड़पा नू ओन्टे एकला आःलस हूँ अगर दुःखे सारका रअस, होले गोट्टे एड़पा ता खुशमारना चइल काली। एड़पा ता उर्मी खुशमारना मुंजुरई काली। एका आःलस गही उज्जना नू एकअम असरा मल्ला अरा ने ख़ोदोख़रका रअदस, आस गही मुँही पूँप मलका ख़ोप्पा बेसे एथेरई।

   खुशमारना संगे बाचका कत्था मेनू आःलारिन खुशाकरत'ई, एकासे का घघारी ता अम्म पखना नू खतरई अरा बोट्टो कमनुम हदहद ख़रख़ी। अँवगे नम्है उज्जना ख़ाड़ नूँ बहना अम्म लेखा खुशमाना मन्ना चाही। जिया रूपी ख़ेंख़ेल नूँ ऊःखा अरा ख़ोदख़ोरख़ा गही पेर्रे मल मना चिअना चाही। एका बीरी जिया नू खुशमारना रई, आद नम्है मुँही नू बिल्ची। अँवगे सदौ खुशमारआ अरा तंगआ मुँही नू बिल्ली लखरअन नेकआ। एन्देरगे का ई उज्जना अलखा-कच्छनखरआ अरा ओन्टे दव असरा खतरी गे रई।

     खुशमारना एकेसले बरई? एनदेर इद पेःऴ नू बिसिरई? का मुँही नू पउडर अरा इसुंग ख़सरना ती बरई? खुशमारना एकसन हूँ मल बिसिरई। ईद ओर्मर गुसन रई, एन्देरगे का ईद आःलर गही जिया नूँ बसा ननी। उर्मी किसिम गही रिझिरना अरा भबना जिया नूँ कुन्दुरई अरा नम्है मुँही नूँ बीची।

    ख़ोदख़ोरना अरा ऊख़ा गही भबना एकेसती बरई? मानिम ओन्टा अड्डा रई, एकदन दुःखे बअदत, असलेम बरई। उज्जना नूँ एका दुःखे अरा बिपत बरई आदिम नम्है जियन ख़ोदोख़ई। एन्ने दुःखे बरओ बीरी तंगअन सम्भड़आना दरा दवन ओन्दोरना गही चिहूँट नंना चाड़ रई, मला होले दुःखे नम्है संतिन मुन्जो चिओ। एन्ने आःलर उज्जना ती हूँ केच्चका बेसे रअनर। अगर उज्जना नूँ रिझिरना मल्ला होले एकासे नम्है मुँही बिल्चा गे ओंगो।

     जोक आःलर गही घोकना एन्ने रई, का आर उज्जना ता ऊख़ान, दुक्खेन अरा एकअम पोलनन् तंगआ कपड़े गही ख़ोटोरका बुझुरअर अदिन परिछआनर दरा धरनर। जोक्कर गा तम्है हेभेरका बेसे इदिन नन्नर। एन्ने आःलर एकासे तम्है उज्जना नूँ रिझिरनन् ख़क्खा गे ओंगोर? आर एकसते की उद्कारनन् अरा रिझिरनान ख़क्खोर? मानिम आर गही नलख नूँ असर मनो। उजगारना अरा मेच्छा पर्दा गे उबकारना चाही अरा मुरझारका आःलर नूँ उबकारना मल रई।

      ख़ोदख़ोरना ती बछरआ गे ओन्टा डहरे ईद रई, का तंगआ नलख नूँ घोलारका रअना। ईद तंगआ दुःखेन घोकआ गे जुक्की बेड़ा चिआ। अएंधअम रऊ आःलारिन अरा नीःदी जियन दुःख-दन्द घेरई चिई अरा ख़ोदोख़आ हेलेरई। ईदिन सदौ सुमुरआना चाही, का दुःखे नेला ता दुःखन मल कुदाबओ, हाँ आद इन्ना ता निंग्है सवंगन मानिम घटाबओ। अँवगे अगर जिया अरा कया नंना नलख नूँ लक्की रओ,  होले तिहा फिकिर गे मोका मल ख़क्खरओ। इगे उर्मी बेड़ा तंगअन एकअम नलख नूँ लइक्किम रअना चाही।

     जोक आःलर एन्ने हूँ मन्नर नेक्खअय घोक्खना दिम दुःख दन्द तरा काली। बअना गही मने ईद तली, का एन्ने आःलर उज्जना गही दुःख-दन्द तरम एःरनर। आर उर्मी बीरी ख़ोदख़ोरनुम रअनर। आर बअनर, "एंग्है कपड़े नुम एन्ने टूड़का रई, एंग्है भागे एन्नेम रई।" आर बुटबुटुरनर, "एन गा ओंगम पोल्लोन, एंगा सवंग मल्ला।"

      एन्देर धर्मेस तंग्है सिरजाचकन् जोक आःलरगे एन्ने ससईत् चिअना जोगे कमचकस बेअदस? ठउकम मला। अन्ने आःलर उज्जना गही अचरजन् मल बुझुरका रअनर। आर बल्नर का धर्मेस ओर्मर गे ओन्टेम कया गतर अरा मोका चिच्चकस बेअदस। आर गुसन उदगारना अरा रिझिरना उज्जना नूँ मल्ला। जबे का नंना आःलर तंगआ उज्जना नूँ उबकारनुम रअनर। नेक्कअय  उज्ज्ना नूँ उबकारना अरा रिझिरना रई, ने तंगा उज्जना नूँ दव असरा एःरनर, आर ठहराचकन(लक्ष्य) ख़क्खा ओंगनर। आर बेगर एल्चम अरा मल पतआनन् अम्बर मूँदभारेम कानर।

     हाँ, खुशमारना अरा संथोक ख़क्खना हूँ ओन्टा कला तली। ओन्टा ठुँट्गा मन्न बेसे इज्जका, कच्छका अरा छछेम रअना अजगड़ सहज रई। इदी गे एकअम लूर हया गही चाड़ मल्ला। ख़न्नन् अरा जियन मुच्चर नलख नन्त रआ। पहें अगर नेक्खअय जिया नू उदगारना अरा रिझिरना रई, होले आर ढेर बग्गे उज्जना गही भेदन् अख़आ अरा दव बेड़न खेपआ गे उज्जनर। मईन् होआ, का नेकइम लेक्खा-जोक्खा नू लूरगर रअनर, आर एकअम किसिम गही समस्यान् कमआ ओंगनर। आर गे पुथि कीःड़ा मन्ना गही चाड़े मलकी। नेकइम जरगा नू बेचना-भोंगना गही रिझिरना  ती खुशमारआ ओंगनर।

      ओन्टा सुमुरआना जोगे कत्था रई। ख़ोदख़ोरऊ आःलर गही कोड़हेम जुक्की संगियर अरा उक्कु-इलऊ आःलर मन्नर। एन्देरगे का नोरनोरो आःलर गुसन ने हूँ ओक्का मल बेद्दनर। आर गुसन एकअम अलखना अरा रिझिरना पुल्ली मना। पपला अरा तीनीन् एःरा, आद पुईंदआना घली ई पूँप ती आ पूँप कुद्दकी कुद्दी। आद पूँप ती रासी आ बीरीम चीपी एका बीरी आद खुशमारई। ठउका एन्नेम खुशमारऊ आःलर गुसन नंना आःलर बरअर रिझिरनर अलखनर। आर गुसन ताम तामिम नतगरअर चइल बरनर।

     चिड़बिड़िरऊ आःलर एकअम कत्था नूँ पका पोलनर मना; आर दुहूँ-मुहूँ मन्नुम रअनर। एकअम-एकअम बजु गा आर पुरहेम बोका बन्नर कानर, अन्नु हूँ तंगआ बुतान परदआ पोलनर अरा न आर डिटगर मना ओंगनर। एन्ने एन्देर गे का आर उर्मी बेड़ा दुहूँ-मुहूँ मन्नुम रअनर।

      चिड़बिड़रऊ आःलर एकअम कत्था नूँ पका पोलनर मना, आर दुहू-मुहूँ मन्नुम रअनर। एकअम-एकअम बजू गा आर पुरहेम बोका बन्नर कानर, अन्नु हूँ तंगआ बुतन परदआ पोलनर अरा न आर डिडगर मना ओंगनर। एन्ने एन्देर गे का आर उर्मी बेड़ा दुहूँ-मुहूँ मन्नुम रअनर। फैसला एका बीरी नंना चाही? तबेम जबे बुता थीर अरा चिंहुक रओ। एका बीरी बुता नलख मल ननी? एका बीरी नलख बिगड़ारई, तबेम जबे आःलर दुःखे, ससईत, अकबकी नूँ रअनर।

     उज्जना-बिज्जना ओन्टे मल मुन्जुरना हेभेरका अरा ख़ाड़ नूँ बहऊ अम्म बेसे तली। जोक आःलर दव, अरा जोक आःलर मलदव मन्नर। जोक आःलर एम्बा अरा जोक आःलर तिस्सा लग्गनर। ओर्मारिन तंगआ तरा नतगना अरा ओर्मर ती दव मन्ना गही चिहूंट मन्ना चाही।

 

रियारका टूड़ा गही मूःली पाँति

ने जे कुँड़ुख़ कत्थन हींड़नर आर गे सरकारी आरक्षण होअना गही अदिया मल्ल ख़क्खरना चाही।