Home Portray Encouragement Literature News Download Learning Members Area Tools Touch It

 तेंग्गा हे आलारो 

इम्मानुएल टोप्पो, स्वीडेन

 तेंग्गा हे आलारो!

निमन एन्देर नँज्जकम का, निमन एन्देर बाचकम का तेंग्गा?

दरा एन्ने नँज्जकर, एन्ने दुख़ चिच्चकर

एमन सताबाचकर, तेंग्गा?

बेल भरिया चेड्डकम, दुख़ बिपैत सहचकम, दौ डहरेन धरचकम  

एन्देर अवँगेम एन्ने, तेंग्गा आलारो

एन्देर अवँगेम एन्ने...।

 

तेंग्गा हे आलारो!

निमन एन्देर नँज्जकम का, निमन एन्देर बाचकम का तेंग्गा?

दरा एन्ने नँज्जकर, एन्ने दुख़ चिच्चकर

एम्है खल्लन बच्चिकर, तेंग्गा?

ख़ल्ल उख़ड़ीन नँज्जकम, निमन एम पोसकम, निम्है डहरेन कमचकम  

एन्देर अवँगेम एन्ने, तेंग्गा आलारो

एन्देर अवँगेम एन्ने...।

 

 तेंग्गा हे आलारो!

निमन एन्देर नँज्जकम का, निमन एन्देर बाचकम का तेंग्गा?

दरा एन्ने नँज्जकर, एन्ने दुख़ चिच्चकर

एमन बाजार नू बीसकर, तेंग्गा?

आया नलख़ नँज्जकम, निम्है किचरीन नूड़कम, निम्है जुट्ठा थरियान मँज्जचकम

एन्देर अवँगेम एन्ने, तेंग्गा आलारो

एन्देर अवँगेम एन्ने...।

 

तेंग्गा हे आलारो!

निमन एन्देर नँज्जकम का, निमन एन्देर बाचकम का तेंग्गा?

दरा एन्ने नँज्जकर, एन्ने दुख़ चिच्चकर

एमन एम्है राजीनती खेदेचकर, तेंग्गा

निम्है कत्थान मेंज्जकम, निमागे भोट चिच्चकम, निमान अगुवा चज्जिकम

एन्देर अवँगेम एन्ने, तेंग्गा आलारो

एन्देर अवँगेम एन्ने...।

 

तेंग्गा हे आलारो!

निमन एन्देर नँज्जकम का, निमन एन्देर बाचकम का तेंग्गा?

दरा एन्ने नँज्जकर, एन्ने दुख़ चिच्चकर

एम्है स्कूलन नठाबाचकर, तेंग्गा?

लूर बुद्धि चिच्चकम, उज्जा ओक्का सिखाबाचकम, निमन आल कमचकम

एन्देर अवँगेम एन्ने, तेंग्गा आलारो

एन्देर अवँगेम एन्ने...।

 

 तेंग्गा हे आलारो!

निमन एन्देर नँज्जकम का, निमन एन्देर बाचकम का तेंग्गा?

दरा एन्ने नँज्जकर, एन्ने फंसाबाचकर

एमन जेहेलनू सज्जकर, तेंग्गा?

निम्हैं गलतीन तिंग्गकम, दौ उज्जा बिज्जागे निमन डहरे एदेचकम

एन्देर अवँगेम एन्ने, तेंग्गा आलारो

एन्देर अवँगेम एन्ने...।

 

तेंग्गा हे आलारो!

निमन एन्देर नँज्जकम का, निमन एन्देर बाचकम का तेंग्गा?

दरा एन्ने नँज्जकर, एन्ने दुख़ चिच्चकर

एम्हैं अयो बगारिन पिटकार, तेंग्गा?

अलबर्ट एक्कासिन चिच्चकम, राजीन बछाबआगे एम लड़ाई नंज्जकम, निमन बछाबाचकम

एन्देर अवँगेम एन्ने, तेंग्गा आलारो

एन्देर अवँगेम एन्ने...।

 

रियारका इण्डी गही मूःली पाँति

खट्टर नम्हैं राजी लोटा धरअर बरचर जोक्क उल्ला नुम उरूब मंज्जर केरार, गेच्चा अम्बा कला भईया किर्रा, नम्हैं राजी सोना रूपा, खुर्जी पट्टी ती निद्दका अदिन चिन्आ।