Home Portray Encouragement Literature News Download Learning Members Area Tools Touch It

 

फसियड़ बण्डो

टूड़ूस - अज्ञात

 

 

पुरखा परिया नूँ ओण्टे राज़ी नूँ ओण्टा अंजखंज निंद्दका टोड़ंग रहचा। लकड़ा, चितवा, पेट्टो अरा बण्डो गुट्टी गही रअना ती टोड़ंग भयभयान लग्गा लगिया। आ टोड़ंग गही ओट्टा नूँ ओण्टे पद्दा रहचा। आ पद्दा नूँ चीरू नामे गही ओण्टे कुक्कोस रहचस। चीरूगर ही एड़पा टोड़ंग गने उर्मिन्ती बग्गे सटरका रहचा। आ एड़पा नूँ चीरूस गने आस गही तंग्यो तम्बर रआ लगियर। आर गही एड़पा नूँ ख़ेर, किस्स, एड़ा अरा मन्ख़ा गुट्ठी पोसका रहचा। चीरूस अबड़ा पोसका किंको अरा ख़ेर गुट्ठीन एरा-ख़ोजा अरा ख़ापा लगियस। आस गही तंग्यो-तम्बर हेद्देन्ता पेःठ नूं मलंङ बीसा काला लगियर। ओंगहोन आस तंग्यो-तम्बर पेःठ नूँ मलङ बीसा केरका रहचर। चीरूस एड़पा नूँ एकलेम रहचस। आस गही तंग्यो-तम्बर करम परब गही सौदा-पती ख़ेंदा लगियर। आ चड्डे आर कटिक गंहड़ी नूँ किर्रू रहचर। चीरूस पिण्डा नूँ उक्कियस दरा ख़ेर गे खुदी छिटआ लगियस। आ बिरिम ओण्टा बण्डो तंग्है ओन्ना-मोंख़ना बेद्दनुम चीरूस गुसन अंड़िसिया। बण्डो गही तत्ख़ा नूँ ख़ेरन एरनुम अम्म बेंदा हेल्लरा। आद चीरूस गुसन बरचा दरा बाचा, "अना बबु एन्देर नन्दय?" चीरूस बअदस, "ख़ेर गे खुदी चिआदन।" बण्डो फिन बाचा, अना बबु, इन्ना एंग्गा गे अकय कीड़ा लक्की रई, ओना मोंख़ा गे एन्देरअम चिआ।" चीरूस इकला हूँ बण्डो मल ईरका रहचस। आस अदिन बेरख़ा घोखचस दरा एड़पा उला दुदही ओन्दरआ गे कोरचस। आस डुबहा नूँ दुदही ओन्दरस दरा बहरी उर्खस, ख़ने एन्दरा एरदस का चाली नूँ गा बुड़ही ख़ेर हई दिम मल्ला। आस ती...ती...ती...बअदस। चाली नूँ बण्डो हूँ मल एत्थरा। बेद्दते-बेद्दते चाली ती उर्खस, एक्सन हूँ बुड़ही ख़ेर मल एत्थेरा। आस अक्खस केरस का आ बण्डो बुड़ही ख़ेरन धरचा दरा लेई होच्चा। आस चिंख़ा हेल्लरस। तंग्यो तम्बर एड़पा अंड़िसियर, ख़ने आस बअदस, "इन्ना नम्हैं बुड़ही ख़ेरन बेरख़ा होच्चा दरा भोंग्गा केरा।" तंग्यो आनी, "बेरख़ा ख़ेर मला मूख़ी बेटा, आद बण्डो रहचा।" अवलते कुन चीरूस, तंग्है एड़ेंथ अरा कन्नान धरअर तंग्है ख़ेरन अरा किंको गुट्ठीन ख़ापा लगियस।

 

रियारका खीरी गही मूःली पाँति

धनू अरा कन्ना लेखा लूरन धरअर चिहुँक रआ होले निंग्है मुदईर निम ग सन  मल अंड़सोर।