Home Cultural View History Promotion Tribal Christianity Literature News Download Tutorial Members Area Touch It

करम परब खुशमारना अरा रिझिरना संग्गे मनाबाचर

रायपुरः सितम्बर 09, 2014

 

करम परब ख़ेस्सन बीधिचका, रोआ इद्दिका अरा अवसान मंज्जका ख़ोख़ा सितम्बर चन्दो नूँ मनाबअनर। ई मोका नूँ कुँड़ुख़र रोटओ मला पहें नंना आदिवासी समाज ता आलर हूँ दव चेंप पुईंना, मंदियारका ख़ल्ल अरा दव उपजा खतरी गे "करम देवस" ती गोहरारना गही परब मनाबअनर। ई परब आलारिन सोजहे प्राकृत आलो संग्गे जोड'ई अरा उज्जनान् धतम मुद्धा कमना, ख़ेंख़ेल अरा धर्मे आलोन संघरआना गही संदेश चि'ई।  

केरका शुक्रवार तारिख 05 उल्ला, उर्मी बखर लेखा इदना हूँ करम गही परब अकय रिझिरना संग्गे सौंसे कुँड़ुख़ बेल्ख़ा नूँ मनाबाचकर बेअनर। झारखण्ड नूँ उर्मिन्ती बग्गे गान नूँ करम मनाबऊ आदिवासीर इदातो कुँड़ुख़र, मुँडार, ख़ड़ियार, होर अरा संथालीर उज्जनर बिज्जनर। ई चड्डे एड़पा पली, पद्दा-ख़ेप्पा, डहरे बांटे, टोंका अरा अखड़ा गुट्ठी नूँ रिझिरना संग्गे परब मनाबऊरिन सहजे नूँ एःरा गे ओंगतार'ई।

     ई चान राँची, गुमला, लोहरदगा, हजारीबाग, बेड़ो, चान्हों जमशेदपुर, उटुरनी बंगाल अरा असम ता चाह बगान, अम्बिकापुर, जशपुर अउर उड़िसा ता अड्डा-अड्डा करम परब मनाबअऩा गही खबइर ख़क्खरकी र'ई। दिल्ली, चेन्नई और नेपाल नूँ हूँ करम परब मनाबअना गही खबइर र'ई। नम्हैं आदिवासीर मजही धर्मेस गही कमचका मंन्न मांस, टोडंग परता अरा धर्मेस गही कमचका आलो नूँ जे दुलार र'ई आद अजगड़ अचरच गही कत्था हिके। झारखण्ड ता नंन-जाइतर हूँ करम परबन मनाबअना गही चिहुँट नंनार।

 

अत्तना पुंदुरना अरा गजा-बजा

करम परब नूँ पेल्लर जोंख़र गही रंगचंगिया अत्तका पुंदुरका, सिंगिरारका-झबरारका, पूँप खोसोरका, कड़मा नूँ चुब्बा गही पेंच्छोन खोसोरका, तोलोङ पोजोरका, फेटा हेरका, पेल्लर गही लाल पाइर आबो पंडरू सड़ी अरा ख़ेंसो बलाउज अत्तका अरा कुक्क नूँ बालका ख़ोर जवा पूँपन खोसोरका एरोय होले जिया साला हेलेर'ई। करम मुंद खुड़ती गही रिझिरना नूँ अनआ-रितआ गही कार्यक्रम आयोजन मनी। जवा पूँपन मेतर तम्हैं ख़ेबदा नूँ खोसोरनार। अस्सा गे ख़ेल, घंटा, घुघरी, नगरा, और ढोल गुट्ठी गही बेवहार नंनार।        

 

करम मुंद ख़ुड़ती (करम पूर्व संध्या) मनाबअना

        करम परब ती मुंद खुड़ती गही रिझरंग मनाबअना गही रीत मनी। करम मुंद ख़ुड़ती मनाबओ बीरी करम डण्डी, राली-घुघरी अरा ख़ेल गही सड़ा संग्गे ख़ेड-ख़ेक्खान नलना-बेचतआना ती एन्ने लग्गी का प्राकृत आलो तंग्है रागे नूँ चाइल बरचा। गजा-बजा, नलो-तोको अरा डण्डी पाड़ो बीरी एन्ने लग्गी का आदिवासीर गही पुरखौती परब लेखा एम्बा एकसन ख़क्खरओ? ख़ुड़ती मनाबअना अड्डान सिंगरआनर झबरआनर अरा बिजली बिल्ली गही रम्फ ती रंगचंगम्बअनर चिअनर। करम मुंद ख़ुड़ती गही रिझरंग नूँ नलना तोकना, अस्सना पाड़ना अरा नलना गही होड़ नंना, बक्सिस ख़ट्टना, खीरी अरा करम गही पइत नूँ तिगाबअना अरा तेंग्गना गुट्ठी गही आयोजन मनी। इबड़ा ती तरकूटी पद्दा-ख़ेपा नूँ गा परब मनाबअना गही रीत नंनाम रई। असन एन्ने बहरी ता रिझिरना मल मनी, पहें आर जिया कया ती उदकारअर नलनर बेचनर। पद्दन्ता अखड़ा मलता टोंका नूँ भईर मांख़ा सेंगेल-मेंगेल नलनर बेचनर।

  

करम परब गही रिझ 

        करम मुंद ख़ुड़ती मनाबचका ख़ोख़ा ता उल्ला नूँ परब मनाबअना गही खुशमारना मनी। करम उल्ला अनआ-मनआ गही मिठई, असमा अरा ओन्ना मोंख़ना, नलना-बेचना, असना-पाड़ना, ओण्टे-ओण्टे एड़पा नूँ करम कुत्तआना अरा सगर उल्ला रिझ नूँ मुलुख़का रअना गही रिझ मनी। करम परब उल्ला ओर्मर तमहैं उर्मी फिकिरान मोधोरअर रिझ नूँ बोथोरका रअनर। ई उल्ला अखड़ा गही मजही नूँ करम गही मूँद गोटंग डाड़न गड़नर दरा पूजा नंनार। हकवारी ननुस पद्दन्ता आलारिन करम खीरी मेना गे मेख़दस। डउड़ा, थड़िया मलता केंतेर नूँ पूजा आलो, इसुंग, सिंदरी, धूप, पलखंजा, अलखड़ा, जवा पूँप, आबदा तीख़िल अरा पूँप गुट्ठीन सजाबअर बिल्ली लघाबअनुम अखड़ा नूँ ओन्दोरनर। ई उल्ला नूँ पेल्लर-जोंख़र गड़चका करम डाड़ा गही चउगिरदा किंदरार-किंदरार करम डण्डीन पाड़नुम नलनर तोकनर। करमा पूजा नंना गही हूँ केरमे रई। एकन्नूँ उबुसना, जवा उठाबअना, करम डाड़न तारआ कालो बीरी पूजा नंना, डाड़न गड़ओ बीरी गोहरारना, नैगस ती पूजा नंन्तआना मेसेरकी रई। करम खीरी मेन्ना ती मुंद ओण्टा कोकरो पिटना गही रीत रई।  

    

समाचार पंक्तियाँ