Home Cultural View History Promotion Tribal Christianity Literature News Download Tutorial Members Area Touch It

आशा लकड़ा राँची नगर निगम गही पुना मेयर चुन्नरा

राँचीः जून 28, 2012:

आशा लकड़ा राँची नगर-निगम गही महापौर ओहदा खतरी चुनाव परिणाम नूँ चुनुरका घोषित मंजा। आशा लकड़ान भाजपा गही समर्थन ती इजतारकी रहचा। आद तंग्है हेद्देन्ता होड़ नूँ तृणमूल कांग्रेस तरती इजतारका नवीन लकड़ासिन 14, 969 वोट गही फाँक ती हराबाचा। आशा लकड़ा गे 40,941 वोट ख़क्खरा, अरा नवीन लकड़ास गे 25972 वोट ती संतुष्ट मंना पड़ारा। अन्नेम आजसू तरती इजतारका बरसा गाड़ी गे 22, 534 वोट, अरा कांग्रेस तरती लड़ऊ रमा खलखो गे 11, 604 वोट ख़क्खरा। रमा खलखो ई खेप नाख़ता नेड्डा नूँ बरचा। चाचरका खंजपा गही घोषना राँची जिला गही कलेक्टर संगेम निर्वाचन पदाधिकारी सय विनय कुमार चौबेस नंजस। चुनाव घोषना मंजका ख़ोख़ा आशा लकड़ान समर्थन चिऊर गाजा-बजा संगे खोब होहकारी नंजर। मिठई ख़ट्टियर मोक्खर। जितचका ख़ोख़ा आशा लकड़ाद पत्रकारारिन आनिया का आद झारखण्ड गही राजधानीन सोहन अरा सुथरा नना गे आद उर्मी किसिम गही चिहुँट लगाबओ चिओ। केरका शुक्रवार उल्ला अख़ बजे ती राँची ता पंडरा बाजार समिति ही 3 गो हॉल नूँ वोट गिनिरना ओरे मंजा। ओरे तिम आशा लकड़ा तंग्है हेद्देन्ता होड़ नूँ रऊ ती अगु-अगुम रहचा। दोय पंचे खेप गही गिनिरका ख़ोख़ा आशा खल्खोद गड़सड़ दोय पंचे ओड्डी ती जितिचका घोषित मंजा।

        राँची नगर निगम गही चुनाव नूँ 15 झन आलर होड़ लड़आ लगियर। अन्नू उर्मिन्ती जुक्की पुष्पा कच्छप गे 827 वोट ख़क्खरा। नंना होड़ बेचूर नूँ अजित उराँवस गे 5857 वोट, गगन कच्छप गे 2841, गणेस लोहरास गे 1046, दुर्गा मुंडा सगे 3182, माइकल एक्कास गे 2009 वोट, माधुरी लकड़ा गे 1815, लोकेश खलखोस गे 3334, सुदामा खलखोस गे 1044 अरा सुनील कुजूरस गे 2037 वोट ख़क्खरा। राजनैतिक पार्टी ई खेप ता चुनाव नूँ सोजहे समर्थन मल चिच्चर। आर बेगर सोजहे मनर होड़ लड़ऊरिन समर्थन नंज्जका रहचर। ई चुनाव नूँ उर्मिन्ती जुक्की खली 17.72 वोटचिऊर वोट नंज्जका रहचर। निगम गही चुनाव 23 जून नूँ मंज्जकी रहचा, अरा वोट गही गिन्ती 27 जून नूँ मंज्जा।

        आशा लकड़ा समाज सेविका गही रूपे नूँ नलख नंज्जकी रई अरा अदी गही ई अनुभवद मुँदभारे नलख नंना गे अदिन संघ्रा चिओ। आशा लकड़ा गही चुनुरका ती ओण्टा पुना रम्फ एथेरआ लगी का कुँड़ुख़र अरा नंना आदिवासीर गही पर्दना नूँ अदि गही बग्गे योगदान ख़क्खरआ गे ओंगो।     

हवाला गही मूँली पाँति