Home Cultural View History Promotion Tribal Christianity Literature News Download Tutorial Members Area Touch It

कुँड़ख़ भखन पर्दआना अरा बिसरारना ती बछाबअना उहरे

हिन्दी में यहाँ पढ़ें

1. ओर्मा कुँड़ख़र गे अकुन्तिम चाहे एकसआनुम रअनर तंगआ एड़पम बारीर,  कुटुमर अरा संगियर संगे कुँड़ख़ कच्छनखनन् ओरे नंना चिअना चाही। कुँड़ुख़ कत्थन तंगआ जईपुईर गे अद्दी खुर्जी लेखा चिआ गे अम्बा मोधोरआ। बहरी ता ताःका-धुका चड्डे जोक्क ख़द्दर कुँड़ख़ कच्छनखरआ गे मल घुड़ियारओर,  होले कोगहार गे बेड़ा लेखा घिड़कअर, सजई, दण्डे चिअर मलता एकअम नंना दव रीत ती ई उयहत ख़क्खा खतरी सहपुरन चिंहुट नंना चाही।

2. नाम एकअम कुँड़ख़स ती एकअम बीरी हूँ भेटारओत, मोका अरा अड्डा लेखे कुँड़ख़तिम एवंदा गूटी ओंगोत कच्छनखरआ गे ओरे ननोत।

3. चिट्ठी रओ चाहे ईमेल सदौ कुँड़ुख़ आलर गुसन कुँड़ुख़ नुम टूड़ना चाही।

4. नमा कुँड़ुख़ पुथि अरा पुथिकान बग्गे ती बग्गे ख़ेंदर बंचना चाही। रअना अड्डा चाहे हिन्दुस्तान अरा नंना बेलखाप ता एकअम कोंड़ा नु चिपतारका पुथि-पुथिकन एवंदा बग्गे मना ऊँगी अवंदा एःख़ चिअना अरा मोधाबअना चाड़ रई।

5. नमा मोका नू खोंड़हा उलगुलान चलाबअर सरकार ती पुथि गोहरारना चाही का आद लुरकुड़िया नू बंचकेरमे नू जोड़ओ। मना ओंगो होले राजनैतिक अरबना हूँ चाही।

6. नमा एकले चाहे खोंड़हा रूपे नू संगी उलगुलान चलाबअर पुथि ओष्टी नू उर्मी किसिम गही कुँड़ख़ पुथि-पुथिकन उयतआना चाही। अन्नु ता पुथि गुट्ठिन तानिम ओथोरना अरा नंना आलारिन हूँ ओथोरआ गे बअना अरा बेड़ा सिरे जमा नंना चाही। एन्ने नना ख़ने कुँड़ख़ पुथि गही महबा परदो अरा अदिन बींड़आ गे संघरा ख़क्खरओ।

7. नना ख़द्दर अरा नन-कुँडख़र गे ओःरेता कुँड़ख़ बंचना गही पुथि अंगियाचका मास्टरार ती तंगआ अड्डा लेखा टूड़ना चाही। इत्तु के ख़द्दर गे कुँड़ख़ बंचना सेब्बा मनी।

8. ओर्मा कुँड़ख़र गे तंगआ ओफिस अरा बैंक गुट्ठी नू ख़ेक्खा ती सही कुँड़ुख़ नुम नंना चाही। सही नंना गही रोजोट नंनर खट्टारिन हूँ मोधाबअना चाही।

9. कुँड़ख़ बंचना ठार गही उल्ला ठहरअर कुँड़ख़ अत्तना-पुन्दुरना, ओन्ना-मोंख़ना गुट्ठी गही अपटा उय्यर मोधाबअना चाही। उल्लानित बेवहार नू बरऊ संजगी गही पिञ्जका(संज्ञा) हेभेरतआना चाही। कुंड़ख़ पाड़ना, बंचना, तेंग्गना-मेंदना, मेनर-टूड़ना, दोहा, टूड़का(लेख), पइत टूड़ना(निबंध), बुझवइर अरा खीःरी गुट्ठी गही अपटा उय्यर कुँड़ख़न पटाबअना चाही।

10. अड्डा-अड्डा कुँड़ख़ कचछनखरऊर, टूड़ुर, डण्डी कमऊर गुट्ठी गही बैसकी अरा खोंड़हा कमअर कुँड़ख़ कत्थन टूड़ा गे मोधाबअर डण्डी, दोहा, पइत टूड़ना, खीःरी गुट्ठी गही तेंग्गना-मेंदना जुटुर(गोष्ठी), अपटा अरा कोहा सबहा गही समाजोरी नंना। कुँड़ख़ पुथि-पुथिकन पिंच्छना चाही।

11. खोंड़हा मजहिन्ता बैसकी एकन्नू ओर्मर कुँड़ुख़र दिम उक्का रअनर, कुँड़ुख़ कत्थानुम रोजोट नंना चाही। शहरे गुट्ठी नूँ एरतारई का नम्हैं आःलर तम्हैं बैसकी नूँ हिन्दी मलता नंना भखा नूँ भंगरारानर, एन्ने नंना तंगआ कत्थन ताँड़अर नंना कत्थन सहजआना हिके।

12. प्रिंट, इलेक्ट्रॉनिक अरा आई.टी. नूब किसिम गही मीडिया नूँ कुँड़ुख़ गही बेवहार सहपूरन नंना चाही। इबड़ा मीडिया ती कत्था चाँड़े अरा बग्गे बिंड़िरआ गे ऊँगी।

13. कुँड़ख़ कत्था गही टुड़ी(लिपि) अरा कत्थ-खीःरिन बेद्दना-ख़ोजना चाही, जेनु नम्है कत्था टूड़ा-बंचआ, समझारआ अरा पर्दा गे सेब्बम आलर मझी अंड़सा ओंगो। कुँड़ख़ कुट्ठी(कक्षा) नू ख़ददारिन बग्गे ती बग्गे तैयना चाही अर सरकारी बंचकेरमे रई होले ख़द्दारिन कुँड़ुख़ सिखिरआ गे चिंहुटआना चाही।

14. कुँड़ख़ अरा नंना भखा गही संघरा ती एंड़भखा(द्वि-भाषी) पुथि पिञ्छतआना चाही। पहें बंचतओ बीरी बग्गे ती बग्गे कुँड़ुख़नुम तेंग्गना चाही।

15. कुँड़ुख़ खबइर कागद, पुथि-पुथिका अरा पुत्रिका गही पिञछना अरा चिपिना सहपूरन मंना चाही, इदी गही ख़क्खरना एवंदा बग्गे मनो अउंदम भखा धनगर मना ओँगो।

16. पुजा-बंचना, गिरजा-निहोरा नंना, धुमकुड़िया ता तिगाबअना, परब-तिहार अरा सांस्कतिक एःदना बीरी कुँड़ख़ कत्था, डण्डी अरा नलना गही बेवहार नंना चाही। करम परम नू खीरी कुँड़ख़नुम तेंग्गना चाही। अखड़ा, परब अरा बेंजा-काजी नू ओर्मा जोंख़र-पोल्लर गे नलना बेचना चाही। सिलेमा, अरा एन्ने किसिम गही नलना बेचनान अरा डण्डी पाड़नन् रोकना-छेकना चाही। ओर्मर नला-बेचा गे बरनर नेकआ, इदि खतरी अइन कमअर की एःरना ख़ोजना चाही।

17. तंगआ ख़द्दर, एड़पा-पली, दोकान अरा धतम गही नामे कुँड़ख़ नू उयना चाही। तंगआ दोकान अरा तंगआ नामे गही पटी नू कुँड़ख़ अरा नंना भखा नू टूड़ना चाही। तंगआ दोकान अरा मलङ नू नलख ननागे आल भरती ननो बीरी कुँड़ख़ गही लूर अख़ऊरिन मूँदभारे उयना चाही।

18. कुँड़ख़ कच्छनखरऊ ख़द्दर अरा जोंख़ारिन कांड़ना लेखा मला पहें ओहदार संगे एःरना अरा नामे नंना चाही।

19.कुँड़ख़र समाज अरा अदी ती सटरका संगठा ही तंगआ लूरकुड़िया, हेभेरतआना लूरकुड़िया(ट्रेनिंग कॉलेज), अस्पताल अरा नंना संस्था गुट्ठी नू कुँड़ख़ारिन नलख नना गे उयना अरा कुँड़ुख़ सिखाबआ गे नंना छिण्डका मदकुठी(कक्षा) मन्ना चाही।

20. कुँड़ख़ लूर चिओ बीरी थिथाबअना चाही का बंचऊ ख़द्दर तंगआ कत्था अरा उज्जपर्दा(संस्कृति) तरा लालसारनार नेकआ। आर गही बुता नूँ तंगआ अयंङ कत्थन सिखिरना, अख़ना अरा कच्छनखरना गही एम्बा सारना मनन नेकआ। कुँड़ुख़ कत्था तंगआ महबा अरा चिन्हर तली, अवँगे अदि ही महबन परदआ नूँ सवंङ चिअना चाही।

21. कुँड़ख़ टूड़ुर अरा कुँड़ख़ लुरगर आलार गे बक्सिस, ओहदारी-चिट्ठी अरा नामजद्दी ख़क्खरना चाही।

22. कुँड़ख़ कत्था गही सोतड़ारनन् चाँड़ेम छेकना चाही। हिन्दी, सादरी, अंगेजी अरा नंना-नंना कत्थन कुँड़ख़ संगे बेवहार नंना अरा तोलोंङ लिपि नू टूड़ना ती आद कुँड़ुख़ मल बनओ कालो। अंवगे टूड़ुर गे चाड़ रई का आर नंना कत्था ता बक्कन कुँड़ख़ गने मल मेसओर, आर अबड़न तबेम मेसओर एका बीरी आर गे बक्क उय्यो बीरी कुँड़ख़ बक्क मल ख़क्खरओ।

23. नंना भखा ता जोक्क बक्क अरा पुना-पुना बिद्दका बक्क गुट्ठी कुँड़ुख़ नू मल ख़क्खरई। एन्ने बक्कन कुँड़ख़ नू उल्था नंना चाही। उल्था ननो बीरी थिथाबअना चाही का एकअम एकअम बेलखाप, अड्डा, सहर अरा आलर गही नामे गा मल्ली, एन्ने ओतोख़ तिंग्गु पिञ्जकन उल्था अम्बनर नंनर नेकआ। उल्था ननो बीरी कुँड़ुख़ फुर्जआना गही दन्द नंना चाही।

24. दिल्ली, मुम्बई, चेन्नई, कोलकाता अरा बेंगलुरू बेसे कोहा-कोहा सहरे नू कमाबआ ओना अरा नोकरी ननु कुँड़ख़र गे तंगआ इष्ट-कुटुम्ब, संगियर अरा पद्दा-ख़ेप्पर गुसन परब-तिहार, बेंजा अरा नंना-नंना खुशमारना उल्ला नू मेल-जोल गे कानुम-बरनुम रअना चाही। पद्दा-ख़ेप्पा तंगआ भुंइहरी अड्डा तली अदिन इकला हूँ मल मोधोरना चाही। एन्ने ननोर होले आर मझी कुँड़ख़ कत्था अरा एःकना ऊज्जना गही चालो बंच्चकी रआ ओंगो।

25. कुँड़ुख़र गही संस्कृति नूँ नन-जईतर गने बेंज्जा-काजी नंना, कुकोय-चिअना होअना गही रीतन ईंजिरना मल्ला। नेकइम एन्ने नंनर होले आरिन खोंड़हा रुपे ती रोकना-छेकना अरा दण्डे मलता सजई चिअना चाही। रेला कुँड़ख़ पेल्लर नन-जईतर गुसन तंगआ खोंड़हन अम्बर चईल केरर। एन्ने घटुत ती बछरआ खतरी गे कुँड़ख़ जोंख़र-पेल्लर गे चाड़ रई का आर नंना जईतर गही पेल्लर-जोंख़र गने मेल-जोल मल बढ़ाबओर। एकअम नंना जईत गही कुक्कोस जबरय कढ़ियारओस होले खोंड़हा ता आलर गे अदिन संघरा नंना चाही। नन-जाइत बेंजा ती कत्था, खोंड़हा अरा उज्जना-एकन्ना सोतड़ा मनी काली।

26. खोंड़हन सुसुरऊ कुँड़ख़र, एकासे का नर्स, डॉकटर, सिस्टर गुट्ठियर गे कुँड़ुख़ सिखिरना चाही अरा तंगआ कत्थन अरा संस्कृतिन तेंग्गना पर्दआना चाही।

27. दखने तरता राजी नू तंगआ पहटा भखा गुट्ठी नू जुक्की ती जुक्की दोय निजी चैनल एःदनर। कुँड़ख़ कत्था नू हूँ तंगआ चैनल गही ओरे नंना अरा बींड़ना चाही।

28. राज सरकार गे कुँड़ुख़ पहटा ता ख़द्दरिन कुँड़ुख़ सिखाबआ गे लिट्या मदकुठी तिम बंचकेरमे नू कुँड़ुख़ कत्थन मेसना चीही। अन्नेम ख़ेंख़ेल लूरकुड़्या गुट्ठी गे हूँ चाड़े मन्ना चाही का कोहा लूरकुड़िया नू  कुँड़ख़ कत्थन बंचतआ गे उर्मी मदका गही बंचकेरमे नू कुँड़ुख़ कत्थन जोड़ना चाही।

29. राज सरकार अरा हिन्दुस्तान सरकार गे पक्ठा नंना चाही का, नेकईम जे बछाबाचका(आरक्षण) गही नफा तंगआ अदिबासी चिन्हर गही लेके होच्चका रअनर; आर गे तंगआ पुर्खर गही कत्थन अख़नम चाही। बंच्चका कुँड़ुख़र ने अयङ कत्थन, उजपर्दन, अरा नेग-चारन् बलनर; आर गे ई मदका ती बछाबाचका गही नफा होअना गही अदिया मल्ला।

30. कोहा-कोहा सहरे नू कुँड़ख़र गही गयराही एड़पा कमअर, अन्नु पद्दा-ख़ोप्पा अरा बहरी ती एकअम नलख गे बर'ऊ तंगआ आःलर गे जूक्की भड़ा नू रअना गही समाजोरी नंना चाही। सहरे गुट्ठी नू कुँड़ख़ होटेल, अरा ढाबा रअना चाही, एकासे का "करमा होटेल, कुँडुख़ ढाबा", एकन्नू कुँड़ुखर गही पसिन्द बेसे ओन्ना-मोंख़ना अरा कुँड़ुख़ डण्डी अरा बजा ख़रख़नुम रअना चाही।

31. अकुन्ता हवाला उदमाइनलूर(सूचना-प्रौद्योकगिकी) अरा सौंसे जल्ली(इंटरनेट) अरा जल्ली अड्डा(वेबसाइट) गही बेड़ा नू गोट्टे ख़ेख़ेल ता बंच्चका कुँड़ख़र गे कुँड़ख़र गही संस्कृति, खोंड़हा अरा भखा गही पइत नू लूर चिअना-ख़ट्टना चाही, होले सहरे नू कुन्दुरका अरा ओरे ती रऊर गे तंगआ मूःली गही पइत नू अख़आ गे मोका ख़कखर'ओ।

32. कम्पयुटर ती टूड़र टूड़कागद ओथोरना अजम सफा अरा सोहन मनी, ई चड़्डे यनिकोड गही पया नू इज्जका कुँड़ुख़ फॉन्ट कमनान् उसकआना चाही अरा कुँड़ुख़ कत्था नू ईमेल, उल्था नंना, बक् संघरआना गही सॉफ्टवेयर गुट्ठी कमना चाही।

33. दखने राजी तरता पहटा भखा तमिल, तेलगु, कन्नड़, मलयालम अरा मराठी गुट्ठी नू अनइत बग्गे टी.व्ही. एदनर। कुँड़ुख़ कत्था नू हूँ टी.व्ही. चैनल गुट्ठी मन्ना चाही। एकन्नू कुँड़ुख़ उजपर्दा(संस्कृति), नाटक, डण्डी, कत्थ-खीरी, सीरियल अरा सिलेमा एदआ गे ओंगतारओ। एन्नेम तंगआ रेडियो अरा एफ.एम. रेडियो चैनल गुट्ठी चाही। कुँड़ुख़ कत्था नू बंच्चका लुरगर कुक्को-कुकोयर गे इबड़ा नलख नंना खतरी मोका अरा नोकरी ख़क्खरना चाही।

34. एकअम भखन अरा उजपर्दान पटाबअना अरा पर्दआना नू आ भखा ती बंचका सिलेमा गही अजगड़ मदइत मनी। अक्कु गूटी कुँड़ुख़ कत्था नू सिलेमा मलम बनआ लगी। सिलेमा सिरजऊ, डेंहडेलरऊर अरा कड़ाबऊर(डाइरेक्टर) गुट्ठी गे ई नलख नू मुँदभारे बरना चाही। अरा कुँड़ुख़ कत्था नू सिलेमा गुट्ठी सिरजारआना गही चाडे रई। इत्तु खोंड़हा ता आःलर गही उज्जपर्दा, कत्था अरा कत्थूड़ा गुट्ठी हरियर पर्दो।

35. कुँड़ुख़ पहटा ता सरकारी ओहदाड़पा(दफ्तर) नू कुँड़ुख़ ती नलख नंना अरा हवाला चिअना गही अदिया मंन्ना चाही, एकासे का दखने राजी गुट्ठी नू मनी।

36.नाम कुँड़ख़त गे कुँड़ुख़नुम घोखना, बअना, टूड़ना अरा नलख नंना चाड़ रई, होलेम कुँड़ुख़ गही फिन उबार मना ओंगो।

37. ख़द्दारिन कुँड़ुख़ सिखाबओ बीरी एन्ने कत्थन मेसाबअना चाही एकदा तंगआ संगयारी, भाईयारी, दुलार-बलार, ओण्टे पक्ख अरा मदइत गही जियालो कुन्दुरतआ गे ओंगो।

38. इबड़ा तिंग्का उहरेन प्रिंट ननर तंगआ एड़पा पली ता पचरी नूँ टसनाआ; मलता फोटो फ्रेम नन्तअर अन्ने अड्डा नूँ उयना चाही जेनूँ आःलर बग्गे एःरा बंचआ गे ओंगोर।

 

इसे हिन्दी में यहाँ पढ़ें                           प्रिंटिंग हेतु डाउनलोड करें