Home Portray Encouragement Literature News Download Learning Members Area Tools Touch It

 

भुईंहरी पद्दा

नेम्हस एक्का

 

चाह बटगी नूँ लस्सा-ओना गे नन-राजी कालू आदिवासीरिन कोड़ा कालूर बअनर की आननर। असम अरा उटुरनी बंगाल ता चाह बटगी ने लस्सा-ओना गे अनइत बग्गे कुँड़ुख़र छोटानागपूर पहटा ती उर्खर कोड़ा केरकर बेअनर। चाह बटगी नूँ लस्सर जोक कुँड़ुख़र गा असन धनगर आःल मंज्जर केरार। आर तंगआ लस्सना अड्डा नुम ख़ल्ल उखड़ी गुट्ठी ख़ेंदर एड़पा पल्ली हूँ कमचकर बेअनर। ई लेखा असम अरा उटुरनी बंगाल नूँ जोक अड्डा रई, एकसन कुँड़ुख़र गही पद्दा ख़ेपा हूँ बसचकी केरकी रई। एन्ने पद्दा-ख़ेप्पा बसचका पंदहे आर तंगआ भुईंहरी राजी किर्रनान मोधरार केरार। अन्ने गा ठउका बलतारई का कुँड़ुख़र एका बेड़ा ने असन काना ओरे नंज्जर, पहें ईद गा अख़तारई का पच्चा आःलर हिन्द राजी गही छछंद मन्ना ती मुंदेम असन लस्सा गे केरका रहचर। अन्नु जोक आःलर गा जियान मंज्जर केरार। असला पर्दका जोंख़-पेल्लर गा अख़अम बलनर का एकअम अउला आर गही पुर्खर असन चाह बटगी नूँ लस्सा ओना गे बरचका रहचर।  

कुँड़ुख़र गही पद्दा-ख़ेपा, ख़ल उखड़ी अरा ऊरुब आःल मंनन एःरार असला अड्डन्ता आःलर सीबा ख़ारा हेल्लरार। ई सीबा ख़ारना पंदहे आर कुँड़ुख़ारिन अरा एन्नेम असन बसचका नंना आदिवासीरिन कज्जना गही बुती नंना हेल्लरार; जेनू लस्सू आदिवासीर अरा असला आःलर मजही एर-नखरना गही कत्था हूँ मना हेल्लरा। असला अड्डन्ता आःलर गही एन्ने डाहे अरा काँड़ना बुतान एःरार असता लस्सू आदिवासीर हूँ ओंद जुट मनर तम्हैं बछरना अरा अदिया खतरी उलगुलान नंना हेल्लरार। ई केरमे नूँ कईको धवाँ असला आःलर अरा लस्सू आदिवासीर मजही अरबा-नखरना, लअना-पसना अरा पिटना गूटी गही अन्दहेर मंज्जा। इदिन अख़ना चाड़ रई का चाह बटगी नूँ लस्सू आदिवासीरिन असला सरकार अरा असला आःलर हूँ आदिवासी मल ईंजिरनार। ई चड्डे आदिवासी मन्नुम हूँ आदिवासी अदिया अरा अदि गही सुविस्ता सरकार तरती मल ख़क्खरई। असन आरिन सुर्रा आःलर लेखा अख़नर। चाह बटगी नूँ लस्सु आदिवासीर तंगआ अदिया खतरी बेस्सिम उलते उलगुलान ननर सरकार गही धियानान तम्हैं तरा नतगना गही चिहुँट ननुम बरआ लगनर, पहें अक्कु गूटी असला सरकार ईर गही आऊँजेरन मेंना ती बछरआ गे तंगआ ख़ेबदन उटुचकी बेई।  

चाह बटगी पहटा ता ओण्टे पद्दा नूँ पुस्सास अरा आस गही एड़पम्बारीर दव कोड़े तम्हैं पटुत एड़पा नूँ रआ लगियर। ईर गुसन ख़िंद्दका ख़ल उखड़ी अरा कमचका पटुत एड़पा हूँ रहचा। पुस्सास गही ख़द्द-ख़र्रार हूँ तम्हैं टूड़का बंच्चका लेखा चाह बगान नूँ धतम ख़क्खियर। आर गही जिनगी सलसंत संग्गे खेपआ लगिया। आर एकाउला हूँ एन्ने मल घोघचका रहचर का एकअम अउला आर गही एड़पा नूँ एकअम किसिम गही खिलपइत बरओ, अरा आर गही जिनगी नूँ अकय सस्ती मनो कालो। पुस्सास गुसन ओण्टे इकला ख़द्दस रहचस, आस गही नामे लोङा पिञ्जका रहचा। लोङास ख़द्द परिया तिम कटिक बोया अरा हुरमुठिया किसिम गही आःलस रहचस। लोङास ती एंड़ गोटंग नतियर हूँ कुन्दुरका रहचर। गोहाठी सहरे नूँ उलगुलान मनो बीरी पुस्सास गही ओण्टे तंग नतियस हूँ केरका रहचस। ई उलगुलान गा संति संगे एद कुद्दना गही उलगुलान रहचा। पुस्सास गही जिया नूँ कटिको थाह मल लग्गिया का एकअम किसिम गही मलदव अलहन मनु रई। आस कोहा तंग नतियासिन दव कोड़े आ उलगुलान नूँ काला गे पेसास। तंग अज्जोस गही पेसकान मेंज्जस दरा तंग नतियस उलगुलान नूँ मेसेरआ चाइल केरस।

 

      नवम्बर 24, 2007 शनिचर उल्ला, गोहाठी सहरे ता अलहन, आदिवासीर गही बिल्ख़िरना अरा अकय खिलपइत गही उल्ला रूपे नूँ याईद नन्तारओ। चाह बटगी ता लस्सू आदिवासीर तम्हैं पुरखौती कमहड़ एड़ेंथ चारो गुट्ठिन होअर तम्हैं आदिवासी अदिया खतरी संति संगे उलगुलान नंनुम सहरे ता डहरे नूँ एद कुद्दा लगियर। असला अड्डन्ता आःलर मुंदेंतिम उलगुलान नूँ खिदहोन नंना गे सपड़ारकर रहचर। लस्सू आदिवासीर गही उलगुलान सलसंत संगे मना लगिया। आ बीरिम तम्हैं सलहा मंज्जका लेखा जोक असला अड्डन्ता आःलर हूँ छछेम आ उलगुलान नूँ मेस्रार केरार। तले जोक गंहड़ी नुम आर सहरे ता दोकान गुट्ठिन कोड़ा-जब्बा हेल्लरार। मलङ बीसूर दोकान दौरी गुट्ठी गही टिल्हो-बिल्हो मंनान एःरार खींस ती चिच्च लेखा हंदकारआ हेल्लरार। आर तम्हैं एड़पा ती इन्नेलन्ता कमहड़ अरा डंडा सोट्टा गुट्ठिन ओन्दरार दरा उलगुलान ननु आदिवासी पेल्लर-जोंख़र अरा मुक्का-मेतारिन एकासे उंगियर अन्नेम लआ-पसआ हेल्लरार। एन्ने मनुखर गही मुदईरिन निम बेड़गा बअनर। उलगुलान नूँ मेसेरका लस्सू आदिवासीर आचका बरचका खिलपत ती तमन बछाबआ गे अजगो हिजगो भोंगा हेल्लरार। बेड़गर आरिन कुदाबआ-कुदाबआ, धरअर, नतगर, घिसिटअर लआ-पसआ हेल्लरार। पुस्सा तंग नतियस हूँ तंग्गन बछाबआ गे ओण्टा छउर नूँ बोंग्गा हेल्लरास। आसिन जोक बेड़गर कुदाबआ हेल्लरार। पुस्सा तंग नतियस थंवसारस दरा इज्जस ख़ने बेड़गर आसिन लवोच-लवोच पिटा ख़च्चियर। पुस्सा तंग नतियास लेखम ई अन्दहेर नूँ सरकारी लेक्खा लेखा एन्दी झन आदिवासीर जियान मंज्जर, दोय ओड्डी आदिवासीर खादीयार मंज्जर, अरा मूँदी झन आदिवासीर भयभयान रूपे नूँ मना ख़च्चिका रहचर। ई अलहन मंज्जका ख़ोख़ा जोक आदिवासीर चाह बटगी ता पहटा नूँ रआ गे तमन सलसंत मल ख़क्खियर; अरा तम्हैं भुईंहरी राजी किर्रा गे सपड़ारआ हेल्लरार।

     आ शनिचर उल्ला चाह बटगी ता लस्सियर गे अकय सस्ती गही उल्ला रहचा। आदिवासीर गही पद्दा ख़ेप्पा नूँ चींख़ना ओलोख़ना ख़ोदख़ोरना मना हेल्लरा। पुस्सास गही एड़पा नूँ हूँ हवाला बरचा का आस गही तंग नतियस जियान मंज्जस केरास। पुस्सास बिलखिर-बिलखिर चींखनुम खोबरारआ हेल्लरस, एनिम एंग नतियासिन खेआ-पिटिरआ गे तइकन, एंग्है चड्डेम एंग नतियस गे एन्ने खेअना मंज्जा। पुस्सास गही दुःखेन एःरार पद्दंता आःलर हूँ तम्हैं एवंखन कप्पा-कप्पा खोबरारआ हेल्लरार।

     ओंद चन्दो बीत केरा, पुस्सास गही एड़पा अरा पद्दा नूँ खोबरारना ख़ोदख़ोरना चोंखनान मल अम्बिया। पुस्सास गही मुँही दुःखे ती मड़िख़िया केरा। आस गुँगर लेखा मंज्जस केरास। आस गही बई ती बक्क सइत नुम उरखा लगिया। पुस्सास गही जिया नूँ बरंडो बरचा, आस अंया-बंया मना हेल्लरस । आस जिया नूँ घोखदस, एंग गुसन रोटओ एंड़ झन नतियर रहचर, ओण्टस मुँजुरस केरस, बछरका नतियस गने हूँ एकअम किसिम गही मलदव कत्था मंज्जा केरा होले गा एन ठहूरेम खेओन कालोन।

     उन्दुल आस लोङासिन मेख़र आनियस, अना बेटा एन गा पच्चिकन केरकान, अक्कु निंग्गा गेम एड़पा पलीन एःरना ख़ोजना मनो। मुन्ता नतियासिन एन एबेसकन, एन्तासिन मल एबेसआ बेद्दन। एन ई राजी नूँ लस्सा ओना गे बरचकन रहचकन, अक्कु धर्मेस गही मया ती एंग गुसन सहपूरन खुर्जी पट्टी रई; अक्कु निमागे लस्सना ओन्ना गही चाड़ मल्ला। एन ओर्गआदन का नम्हैं उर्मी खुर्जी-पट्टिन बीसर भुईंहरी पद्दा किर्रना काना चाही। लोङास आना किर्तआदस, अना बंगायो, एसन एंग्है अनइत बग्गे संगियर रअनर, अन्नु रोपनास एंग्है अइदका संगियस तइलदस आसिन एन पोल्लोन अम्बा। ईगे एन्ने अम्बोय नना।

    पुस्सास तंग्दास ती अकय चोन्हाँ नना लगियस, इंव चड्डे आस लोङासिन रूसी मल एःरा बिद्दियस। रोपनास पद्दा-ख़ेप्पा नूँ ओण्टा फसकट आःल रहचस, इदि ही थाह लोङास गे मल रहचा, आस गा रोपनास गही संगयारी नूँ डुबूरका रहचस। रोपनास ही फसकट चालो पंदहे पद्दन्ता ता बग्गे आःलर आसिन पसिन्द मल नना लगियर। पुस्सास ई कत्थन अख़आ लगियस। दुहूँ-मुँहू मन्नुम आस गे ओण्टा उहरे एत्थरा। आद ईद का एकअम किसिम ती रोपनास गनियाँ एंग्दस गही लोला चोन्हाँन एसना लग्गो, होलेम एंग्दास भुईंहरी पद्दा काला गे गच्छरओस।

     उन्दुल फिन आस तंगदासिन आनदस, अना ख़द्दय, एवंदा चान बितचा केरा, भुईंहरी पद्दा मल्ला केरका। एंगन भुईंहरी पद्दा मेख़ा लगी। ई पाली एन एड़पम्बारीरिन असन होआ बेद्दन। नीन गा अख़दय दिम इसला आःलर लस्सू आदिवासीर गही मुदई मंज्जकर रअनर। एड़पन अम्बोत दरा कालोत होले एंग्है कमाबाचका उर्मी ढिबन ख़ड़ओर होओर कालोर। एंग गुसन ओंद सोडिम नाख़दी पंचे लोडिम ढिबा रई, इबड़न होअर डहरे एकना दव मल मनो, इबड़न एकसन उयना लग्गो? लोङास तपड़ेम उतारा चिअदस, अन बा, इदि ही तिरहा अम्बा नना, एंग्हैं संगी रोपनास गा रअस दिम, आस ती दव ने मनो? नाम ओण्टा सन्नी बोक्सा नूँ उर्मी ढिबन उईयर एंड़ गोटंग तला लगाबओत दरा आस गे उईया गे चिचिओत। पुस्सास खुशमारनुम बअदस, ईद गा अजगड़ दव मनो, पहें नीन रोपनासिन तेङके तबेम चिअके का आ बोक्सा नूँ ओंद सोडिम नाख़दी पंचे लोडिम ढिबा उइका रई।

     भुईंहरी पद्दा काना ही उल्ला अंड़िसिया। पुस्सास तंगदासिन आनदस, कला ख़द्दय, आ बोक्सान निंग संगीस गे चिअर बरा। लोङास तुरता-तुरती रोपनास गुसन कालर बअदस, अना ले संगी, एम एड़पम्बारिम एम्बस गने भुईंहरी पद्दा काला लगदम, ओंद चन्दो ख़ोख़ा किर्रोम। ई बोक्सा नूँ ओंद सोडिम नाख़दी पंचे लोडिम ढिबा उइका रई, किर्रना गूटी ई बोक्सान निंग गुसन उइया। रोपनास तंग सगीस गही बोक्सान उइया गे सहजेम गच्छरदस कादस। लोङास तम्बस गही आ बोक्सान रोपनास गे चिघलदस।

    पुस्सास अरा आस गही एड़पम्बारिर ओंद चन्दो ख़ोख़ा एड़पा किर्रनार। एड़पा किर्रका ख़ोख़ा पुस्सास तंगदासिन बअदस, अना ख़द्दय, नीन कला दरा नम्हैं आ बोक्सान ओन्दोरअर बरा। लोङास तुरतुर तंग सगीस गुसन बोक्सा ओन्दोरआ कादस। पहें जोक गंहड़ीनुम आस लकड़ा लेखा चिचियारनुम किर्रदस, अना बा, नीन एंग संगीसिन अजगड़ कांड़चकय। आस एंगन तिंग्गियस का आ बोक्सा नूँ ओंद सोडिम नाख़दी पंचे लोडिम ढिबा गही अड्डा नूँ चाचान निंद्दका रहचा। आसिन कांड़अर नीन एंगानिम कांड़चकय। एन्ने ननर नीन दव मल नंज्जकय।

     पुस्सास धीरजा संगे आनियस, पहें ख़द्दय, निंग संगीस एकासे अक्खस का आ बोक्सा नूँ चाचा इकला निंद्दकी रहचा? नीन गा अख़अम लगदय आ बोक्सा नूँ एंड़ गोटंग तला लगाबाचका रहचा। इदि गही मने ईद मंज्जा का आस एकअम किसिम ती अबड़ा तलान छछेम कुल्लियस दरा उला ता आलोन ईरियस; तले ख़ोख़ा नूँ तलान एकासे लक्की रहचा अन्नेम लगा बाचस चिच्चस। ईद गा दव मंज्जा का एन ढिबा गही उइजी नूँ चाचान बोक्सा नूँ उइका रहचकन, मला होले निंग्है भरसा गही संगीस, एन्देर अख़ओय एन्देर ननोस दने! बआ, एन जे नंज्जकन आद, दव रहचा का मला? लोङास तंग संगीस गही फसकट चालोन अक्खस केरस। कुक्कन गड़चस दरा बअदस, अना बंगायो, एंगती अजगड़ मलदव मंजा केरा! इन्ना गूटी एन एंग संगीस मइय्या भरसा नंनुम बरआ लक्कन। अक्कु एन आस ती इकला हूँ संगियारी मल मनोन।

     पुस्सास चाह बटगी ता तंग्है खुर्जी-पट्टी अरा पटुत एड़पा गुट्ठिन उर्मिन बीसियस दरा एड़पम्बारिर गने तंग्है भुईंहरी पद्दा केरस। भुईंहरी पद्दा नूँ पुस्सास गही तंग भइयोर अरा बहिन बग्गर रआ लगियर। तंग भइयो अरा बहिनर गने मेसेरअर आस अकय खुशमारस। तंग्हैं ख़ेंस ख़ट्टिका आःलर गने हेल्ले-जोल्ले मनर आस पच्चा दुःखेन मोधरास केरस। आस गे भुईंहरी ख़ल्ल गा ख़क्खरा दिम; ओन्दोरका ढिबा ती जोक उपजा ख़ल्ल ख़िंदियस अरा पुना एड़पा हूँ कमचस। आर गही जिनगी फिन हरियर मंज्जा केरा। 

रियारका खीरी गही मूःली पाँति

एरार-ख़ोजर संगयारी नना, मला होले दोकहर तम्हैं फसियर बुता ती बुड़ाबओर चिओर।