Home Portray Encouragement Literature News Download Learning Members Area Tools Touch It

 

कुँड़ुख़र अरा तुड़कर

नेम्हस एक्का

 

 

कुँड़ुख़र गही पुरखा खीरी ती अख़तारई का ईर द्रविड़ जाति गही आःलर तलनर, अरा ईर गही कत्था द्रविड़ भखा बखइर ती बरई। ईर सिन्ध प्रान्त तिकिम कुद्दनुम-नुंग्गनुम अजमगड़ मन्ते रोहतासगढ़े नूँ बरअर सलसंत अरा सुखे संगे उज्जा-एका लगियर। रोहतासगढ़े नूँ ईर कोहा ले गढ़े कमअर निचोत रआ लगियर। कुँड़ुख़र गही एन्ने दव उज्जनन् एरार नंना जाइतर  गही जिया ओला लगिया। एन्ने जिया ओलू जइतर नूँ चोरोर अरा तुड़कर हूँ रहचर। चोरो जईतर कुँड़ुख़र गही गढ़ेन बच्चा गे अनइत धवाँ लड़ई नंज्जर, पहें बच्चा पोल्लर। ख़ोख़ा नूँ तुड़कर गही राजी हूँ हिन्द बेलख़ाप नूँ अड्डा-अड्डा बिंड़िरआ हेल्लरा।  रोहतासगढ़ ता एका गढ़े नूँ कुँड़ुख़र रआ लगियर आद अजगढ़ ठिमठिम अरा पोकता रहचा। अदिन उम्पर-एसअर नेहूँ गढ़े उला काला पोल्ला लगियर। ई गढ़ेन हरिशचन्द्र बेलस गही तंगदस, नेखअय नामे रूहीदास रहचा, आसिम कमताचकस रहचस। ई रोहतास गढ़े नूँ कुँड़ुख़ मुक्कर अरा तुड़कर मजही मंज्जका लड़ई गही खीरी एम्बा संग्गे मेना जोगे रई।

 

तुड़कर एका गेच्छा राजी तुर्कीस्तान ती हिन्द राजी नूँ बरचका रहचर; आर गही सुलतानस दिल्लीन बच्चियस दरा हिन्द राजी नूँ तंग्है राजी-पाटी गही खुटा गड़चस। अक्कु तुड़कर तम्हैं राजिन पर्दआ गे सन्नी-सन्नी छछन्द राजी गुट्ठीन बच्चा कुद्दा हेल्लरार। आ बेड़ा नुम बिलाईत राजी गही पसरारना हूँ हिन्द राजी नूँ मंजजा। बिलाईतिर गही पछड़ा हूँ तुड़कर गने मना हेल्लरा। बिलाईतिर तुड़कारिन बेद्दा-बेद्दा लआ-पसआ हेल्लरार। कुँड़ुख़र गही गढ़ेन नुँखुरआ गे अजगड़ पोकता एरार ईर कुँड़ुख़र गही बेलास ती संगी जोड़चर दरा संघ्रा नेचर। कुँड़ुख़र गही जिया लुदऊ अरा पाही एःरना नूँ एकाबीरी हूँ ख़ोख़ा मल रई। कुँड़ुख़ बेलस तुड़कारिन संघ्रा चिआ गे गच्छरस अरा ई लेखआ तुड़कर गही बेल मुक्कर अरा ख़द्द खर्रर कुँड़ुख़र गही गढ़े नूँ बरअर नुख़ुरआ रआ हेल्लरार। ई केरमे नुम आर कुँड़ुख़र गही एन्ने दव सलतंत अरा सुखे उज्जनान ईरियर। आर गही जिया ओला हेल्लरा अरा आर गही जिया नूँ नाद कोरचा केरा। अक्कु आर कुँड़ुख़र गही गढ़े नूँ सीबा ख़ारा हेल्लरार। आर रोहतासगढ़ेन बच्चर तमन् मुदैर ती बछरआ गे पोकता खोली कमआ बेद्दा लगियर। ई पंदहे आर तम्हैं पईकारिन कुँड़ख़ारिन पछड़ अर्गा गे अनइत खेप तैयर। पहें मल उम्पुरऊ गढ़े अरा हंकराज-पंकराज पईकारिन एरार आर उर्मी बीरी बोङग किर्रयर। कुँड़ख़ारिन पछड़अर गढ़ेन बच्चना आर गही संवङ ती बहरी गही कत्था रहचा। ई पंदहे अरा फसकट ननर गढ़ेन बच्चना गही रोजोट नंज्जर।

 

आ बीरी रोहतासगढ़े नूँ ओण्टे महरा मुक्का दुदही बीसा गे बरआ लगिया। अक्कु तुड़कर गही बेलस अख़आ बेद्दा लगियस का कुँड़ुख़ारिन एकासे पछड़आ गे ओंगतारओ। कुँड़ुख़र गही एन्देर-एन्देर पयहारना रई। ख़ने तुड़क बेलस गही देवानर आसिन तिंग्गियर, का ओण्टे महरा मुक्का रोहतास गढ़े नूँ नित उल्ला दुदही बीसा गे काली, आदिम कुँड़ुख़र गही पयहारना कत्थन तेंङगा गे ओंगो। तुड़ख़र गही बेलस अदिन तंग्है बेल बखड़े नूँ मेख़ताचस दरा अदि ती आनियस, कुँड़ुख़र अजगड़ हंकराज-पंकराज रअनर, आरिन एम पोलकम हराबआ, नीन आर गही पयहारना कत्थन तेंग्गय, होले एन निंग्गा गे इदि गही उइजी एका बग्गे ढिबा चिओन। महरा मुक्का गही जिया लुबही मंज्जा केरा। आद बेलासिन तिंग्गिया, ख़द्दी अरा करम परब नूँ ओर्मा कुँड़ुख़ मेतर तीख़िल ती बन्चका झरा ओन्नर केच्चका लेखा ख़ंदरनर कानर, आरिन निम एन्ने परब अउलम हराबआ बच्चा ओंग्गर। करम परब चेंप पुईंदआना घली नूँ मनाबअनर। ई गे आ बेड़ा नूँ लड़ई नन्ना कटिक मसकिल नलख रहचा। ईगे आर ख़द्दी परब नूँ कुँड़ुख़र गने पछड़ आर्गा गे रोजोट नंज्जर, एन्देर गे का कुँड़ुख़र ख़द्दी परब पूँप पईंदआना घली(बसंत ऋतु) नूँ मनाबअनर।

 

      भंडा ता अम्मन् एरार, नैगस पूजा नना गे सपड़ारस अरा तंग ख़ई आस गही ख़ेड्डन नूड़िया दरा आस गही बराकाइत ख़क्खा गे आसे एरा हेल्लरा। तलेकुन आस तंग्है ख़ोख़ा ईकुर गने सरना बखइर काला हेल्लरास। सरना मक्का मन्न गही बखइर तली, एका बखइर नूँ कुँड़ुख़र गही देवड़ी एकदन चाला पच्चो बअनर डेरा बसा ननी। चाला पच्चो सरना बखइर नूँ डेरा-बसा ननी इदिन कुँड़ुख़र एकासे अक्खर ईद हूँ ओण्टा एम्बा सारना खीरी दिम तली।

 

जोक्क कुँड़ुख़ जोंख़र निसोंद टोड़ंग नूँ सेन्दरा बेचा केरार। आर ख़ड़िदयर दरा सरना मन्न किय्या सथारआ गे उक्कियर। उक्का-उक्कम आर उर्मिन्दी सवंगिया धर्मेस गही पइत नूँ तेंगा-मेंदआ हेल्लरार। पहें आर तेंग्गना-मेंदना गही मुँजा नूँ पोल्लर काला। ख़ने आर मेर्ख़ा तरा अकय मेच्छा नूँ एड़ेंथ तैय्या गे रोजोट नंज्जर तले बाचर एकसन ई एड़ेंथ खतरओ आसानिम नम्हैं सवंगिया धर्मेस रअस होंतन। आर तम्हैं रोजोट लेखा मेर्ख़ा तरा एड़ेंथन तैय्यर चिच्चर। एड़ेंथ एका मेच्छा गूटी केरा तले सरना बखइर ता ओण्टे मक्का मन्न नूँ खत्तरा। ख़ने ओण्टे खुड़खुड़ पच्चिका पच्चोद आ मन्न ती उर्खा दरा आरिन आनिया, धर्मेस ई मक्का मन्न नुम डेरा-बसा नंदस, आस एंग्गन निमन ई कत्थन तेंग्गा गे आनियस, अक्कु निम ई मक्का मन्नन अरा एंग्गन एसानिम पूजा ननके; होले धर्मेस खुशमारओस। आ बीरी तिम कुँड़ुख़र सरना मन्न ता मक्का मन्नन पूजा नन्नर।

 

सरना बखइर गुसन पद्दंता आःलर संगे अंड़सर नैगस मूँद गोटंग कोकरोन् इड़बियस दरा ओण्टे धर्मेस गे, ओण्टे पद्दंता देवडंर गे अरा ओण्टेन पचवा आःलर गे दाँड़े अर्गाचस। एका बीरी नैगस पूजा नन्दस, पद्दंता आःलर गजा-बजा संगे डण्डी पाड़ा हेलेरनर। आर गही बजा ख़ेल, नगरा, ढोल अरा घंट्टा गुट्ठी तली। तले जोक्क जोंख़र नैगासिन तम्हैं बड़ी ती ख़ेंवचर चेड़अर आस गही एड़पा अंड़सतआनर। आर गही ख़ोख़ा-ख़ोख़ा पद्दंता आःलर डण्डी पाड़नुम कानर। एकाबीरी नैगस एड़पा बली गुसन अंड़सदस आस गही मुक्का आसिन परिछआ गे उर्खी तले आसिन उला मंक्खी। आस गही ख़ेड्डन अम्म ती नूड़ी। नैगस तंग आली गे मक्का मन्न गही पूँपन चिअदस। अन्नेम आस नंना आलर गे पूँप ख़ट्टदस अरा पद्दंता एड़पा-एड़पा कुद्दर ओर्मर गही एड़पा नूँ मक्का मन्न गही पूँपन खोसदस।

 

धरम गही उर्मी नेगजोग मंज्जका ख़ोख़ा पद्दंता उर्मा आःलर झरान ओन्नर, डण्डी पाड़नर अरा नलनर तोकनर; परबन अइदका लेखा मनाबआ गे ईर ओंद स्पताह गूटी नलनर डेगनर। मुँदा पुरखा बेड़ा ता मुक्कर झरा अरखी मल ओना लगियर, इकला कुँड़ुख़ मेतर ओनर ऊँखा काला लगियर।

 

महरा मुक्का रोहतासगढ़े नूँ ख़द्दी मनाबओ बीरी ता उर्मी हवालन तुरकर गुसन तिंग्गिया, कुँड़ुख़र ओर्मर झरा ओनर ऊँक्खनर दरा केच्चका लेखा बिडिरका रअनर,  एन्ने बेड़ा नूँ लड़आ गे कोनो मसकिल मल मनो। मुक्कर गने लड़आ गे निमा बग्गे ओत्था मल मनो। अँवगे तुड़कर ख़द्दी परब अउलम पछड़ कोरआ गे रोजोट नंज्जर।

 

ख़द्दी परब अंड़िसया, ओर्मा रोहतासगढ़े ता ओर्मा मेतर झरन ओण्डर तरा मांख़ा बीरी केच्चका लेखा ख़ंद्दरार केरार अरा आर ही मुक्कर तंगआ-तंगआ ख़द्द-ख़र्रारिन कीदर की ताम हूँ ख़ंदरआ गे मना हेल्लरार। अचक्का ईर गढ़े गही मूली दुरा तरा गुहाइर मेञ्जर। मुक्कर गही अगवद् ओण्टे जोंख़ पेल्लोन तंग गुसन मिख़िया एकदा मन्न नूँ अर्गनु अजगड़ चेंटगर रहचा, आद उर्मिन्ती मेच्छा मन्न नूँ अर्गिया दरा एन्देर ईरी, का तुड़ुक पैकर तम्है कमहड़ संग्गे गढ़े गही मुद्धा दुरा तरा हथी अरा घोड़ो नूँ बोंगोर नखरनुम बरआ लगनर। कुँड़ख़र मजही अकय सस्ती बरचा केरा। मन्न मैयते सर्रसर्रअन इत्तिया दरा अगुवन ई बरचका ससईत गही पइत नूँ तिंग्गिया, तले तान ढोलन अस्सा हेल्लरा। ढोल अस्सना ओर्मा मुक्कारिन अगुवा गही एड़पा गुसन ख़ोंड़ोरना गही चिन्हाँ रहचा। ने ने ई ढोल गही सड़न मेंञ्जर आर ताम हूँ तंगआ-तंगआ ढोलन सड़तआ हेल्लरार; ई लेखा ओर्मर अगुवा गही चाली गुसन ख़ोंड़रार केरार। अगुवाद् बरचका बिपइत ती ओर्मा रिन तिगाबाचा दरा ओर्मा रिन मेतर गही किचरी अत्तर मुदईर ती लड़आ गे कमहड़ संग्गे उर्खा गे बाचा। ओर्मा मुक्कर कुक्क नूँ फेटा अरा मेद नूँ लँगी, धुती, झुला अरा पेंट गुट्ठी अत्तियर दरा ख़ेक्खा नूँ एड़ेंथ-कन्ना, बल्लु, तड़री अउर टोंगए गुटठीन धरचर दरा मुदईर ती लड़आ गे मुढ़ियारार केरार।

 

तुड़कर गही पैकर मुद्धा दुरा गुसन बरअर अदिन एसआ हेल्लरार। दुरा तरा बरऊ डहरे चुरकी अरा पर्ता नूँ रहचा, ईगे अय्या ओंगहोन नूँ जुक्की पैकर दिम कोरआ ओंग्गा लगियर। जोक्क मुक्का पैकर गढ़े गही घेरा पचरी ती चुंदी(बुर्ज) नूँ अर्गियर। आ चुंदी तिम आर गढ़े ता दुरान एसऊ मुदईर मैंय्या एड़ेंथ चलाबआ हेल्लरार। आर गही कन्ना नूँ नेर्र गही बिख ख़स्सका रहचा। चुरकी दुरा ती मुदैर बरनुम रहचर इजगो एड़ेंथ ती आरिन पिटनुम केरार। अनइत बग्गे मुदैर केच्चर केरार। ख़ोख़ा नूँ बरऊ मुदैर मड़न एरार ख़ोख़ा भोंग्गा हेल्लरार। कुँड़ुख़ मुक्कर नुड़ुरका(गुप्त) दुरा ती उर्खर आरिन कुदाबआ-कुदाबआ लआ-पिटा हेल्लरार। कुँड़ुख़र ती हारचका तूड़कर कुँड़ख़र गही गढ़ेन बच्चना अस्सरा अम्बियर चिच्चर।

 

एन्नेम तुड़कर दोय एंड़ खेप कुँड़ुख़र ती लड़चर, पहें ओंगहोन हूँ जितआ पोल्लर। उर्मी लड़ई बीरी मुक्कर दिम कुँड़ुख़ारिन बछाबाचर। ख़ने तुड़कर गही सुल्तानस फिन आ महरा मुक्का ती सलहा होच्चस। महरा मुक्का सुल्तान सिन आनिया, करम परब अउला मुक्कर हूँ झरा ओनर ऊँक्खनर कानर, पहें ईद लड़ना गही बेड़ा मल्ली एन्देर गे का चेंप पुँईना अरा चोतोर ख़ज्ज पंदहे डहरे एकना हूँ मसकिल मनी काली। पहें ई बेड़ा नुम नीम बेगर पछड़ा लड़अम गढ़ेन बच्चा ओंग्गोर। महरा मुक्का गही ई सलहान तुड़कर मेञ्जर, तुड़कर गही पईकर चेंप अरा चोतोर ख़ल्ल नूँ लड़आ खतरी हेभेरका रहचर। आ चड्डे आर करम अउलम गढ़े नूँ लड़ई नना गे सलहा मंज्जर।

 

ख़ल उखड़ी नूँ रोपा डोबहा नंना अरा एंदेख़आना मुँजुरका ख़ोख़ा कुँवार चन्दो(सितम्बर-अक्टुबर) नूँ करम परबन मनाबअना मनी। करम परब नूँ कुँड़ुख़र तम्हैं करम बेलासिन सेवा-पूजा नंनर दरा आस ती तम्हैं ख़उ उखड़ी नूँ बग्गे उपजा अरा दव चेंप पुईंतआ गे गोहरारनर अउर बराकाइत नेअनर। पुतबीरी पेल्लर-जोंख़र टोडंग नूँ कालर मूँद गोटंग डाड़न तारअर अखड़ा नूँ ओन्दोरनर दरा मजही नूँ गड़नर। तले अदी गही पूजा नंन्नर। करम डाड़ा संगे-संगे पूँपन अरा खंजपा गुट्ठिन हूँ ओन्दोरनर। टोडंग कालो बीरी ईर नलनुम डेगनुम, ख़ेलन, ढोलन, नगरन अरा घंट्टन घितकआनुम कानर। अखड़ा नूँ करम डाड़ा गही पूजा नंज्जका ख़ोख़ा खरम खीरीन तेंग्गनर। आ खीरी कटिक एन्ने बेसे रई, ओंगहोन सोय झन भईयोर मलङ बीसा केरका रहचर। आर गही किर्रना ती मुँदिम पद्दन्ता आःलर करम गड़अर अदी गही चौगुड़दी नला-बेचा लगियर। करमास इदिन एरार पद्दन्ता आःलर ती अकय कदरारस। आस अखड़ा नूँ गड्डका करम मन्न गही डाड़न चड्डस, एस्सार मुर्चियस दरा हिबिड़यस चिच्चस। धर्मेस एदातो करम बेलास करमास गही ई मलदव नलखन ईरियस दरा अकय खिंसारस। आस करमास गे अकय दण्डे चिच्चस। आस गही खुर्जी-पट्टी, अड्डो मेक्खो गुट्टी घटरआ हेल्लरा। ख़ने करमास धर्मेस कोल्लम मंज्जस अरा धर्मेस ती छेमा नेचस। धर्मेस आस गही मानी कोल्लम मंज्जकन बुझरस दरा आस गे छेमा चिच्चस। अदी ख़ोख़ा आस गही एड़पा नूँ फिन दव मंजा केरा।  ई खीरी गही ख़ोख़ा भईर माँख़ा पेल्लर जोंख़र अखड़ा नूँ जोड़ोर नखरअर नलनर-बेचनर। पच्चो-पचगिर अखड़ा कूटी ता तेताली मन्न किय्या ओक्कर चाहे इजअर आर गही नलनान एरनार। पेल्लर जोंख़र आपुस नूँ जवा पूँपन खोसोच नखरअर तम्है लोला-चोन्हाँन एदनार। करम बेलासिन महबा चिआ गे जोक आःलर उबुसनर, अन्नु पेल्लर बग्गे अगुवारनर। नंना उल्ला करम डाड़न अखड़ा ती चड़नर तले भईर उल्ला पद्दा ता एड़पा-एड़पा डाड़न कुत्तआनर। कुत्तओ बीरी जोहोंड़ जोंहोड़ थका मनर नलनुम डेगनुम पाड़नुम एड़पा-एड़पा कुद्दनर। मुक्कर-मेतर ओर्मर झरा ओन्नर ऊँखनर कानर।

 

रोहतास गढ़े नूँ हूँ कुँड़ुख़र करम मनाबअना नूँ लौलीन रहचर। मुक्कर-मेतर ओर्मर ओण्डर मोक्खर, नलियर बीचियर दरा ख़ड़िदका का रहचर दिम, झरा ओनर ऊँखका हूँ रहचर। तुड़कार कुँड़ुख़र गने दोय मूँद खेप लड़आ गे करम परब अउलम लड़आ गे अचका बरचर। कुँड़ुख़र उँखका ती लतुर-पतुर रहचर, ईगे तुड़कर ती लड़आ गे आर मईंया सवंग मल रहचा। तमन बछाबआ गे आर नुड्डका दुरा ती छछेम उर्खर भोंग्गर केरार। ई लेखा बेगर बिड़दो गही तुड़कर गोट्टे गढ़ेन तम्हैं अदिया नूँ ले होच्चर। रोहतास गढ़े ती उर्खर दरा कुँड़ुख़र मुन्ता खोता नूँ ख़ट्टरार केरार। एन्ता थका संथाल परगना ता राजमहल पर्ता तरा केरार ने सौर्य पहाड़िया बारनर; अरा मुन्ता खोता छोटानागपूर पहटा तरा बरचर नेकन उराँव बअनर। इसन मुण्डा आदिवासिर मुँदिम ती रआ लगियर अउर कुँड़ुख़ारिन लोला चोन्हा एदचार दरा रआ बसआ गे ठार चिच्चर।

 

रियारका डण्डी गही मूःली पाँति

कुँड़ुख़र गही बउसा अजगड़ रहचा, ई गे आर तुड़कारीन दोय एंड़ धवाँ कुदाबाचर, पहें अरखी झरा आरिन डुबाबाचा चिच्चा; अँवगे इबड़ा डुबाबऊ आलो ती गेच्छम रआ, होलेम उबार मना ओंगोय।