बक्-ख़ोर

 

सौंसे बेल्ख़ा नूँ मुन्ता कुँड़ुख़ जल्ली अड्डा!

 
   

 

नीन ईसन् रअदय : मूद्ध पन्ना > कुँडूख़ कत्थूड़ा > देवनागरी > खीरी(कहानी)

निगनिगरका

खीरी

अँधरी पच्चो अरा कुबड़ा नतियस
करम खीरी (1)
बिति-डण्डा
मतवारस गही दसा
करम खीरी (2)
धरमुस बिट्ठी केरस
उला ता आलो गही मुल्ली
पचबा-आःलर
जुटुरना नूँ सवंग रई
भड़ा गही अड्डो
 
अउर बग्गे खीरी....

एन्नेम लेखा कड़ी
हिन्दी कत्थूड़ा
अँग्रजी कत्थूड़ा
ख़द्द कत्थूड़ा

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

       टूड़ा | पइत टूड़का | खीरी | डण्डी | नन्ना गुट्ठी | तोलोङ सिकि नू टूड़का कत्थूड़ा

 

अँधरी पच्चो अरा कुबड़ा नतियस

नेम्हस एक्का

ओन्टे पद्दा नूँ ओन्टे अँधरी पच्चो रआ लगिया, अदि गही नामे तितरी रहचा। तितरी पेल्लो मंज्जका ख़ोख़ा अँधरी मंज्जा केरा। अदि गही तंग आःलस अरा सेड़ो हूँ रहचर, पहें ओन्टे कुक्को ख़द्द कुन्दुरका ख़ोख़ा केच्चर केरार। धर्मेस गही एन्ने मने मंजा का, तंग आःलस हूँ, बजर लवचका ती केच्चस केरस। अक्कु तितरी पच्चोन सहाड़ा नना गे ओंदिम इकला तंग नतियस बछरस, पहें आस हूँ कुन्दुरकातिम कुबड़ा उर्खस। धर्मेस गही मया ती ईर गुसन अनइत बग्गे ख़ल्ल-उखड़ी रहचा; एकदन अरबर-परबर गे सजहा चिच्चकर रहचर। सजहा नूँ जेतंग बखरा बरआ लगिया, अदिनिम ईर ओना-मोंख़ा पोल्ला लगियर। तितरी अरा तंग नतियस गही उज्जना दव लेकन मना लगिया।

    ओन्द चान एन्ने मंजा, का चाला पच्चो बग्गेम पद्दन्ता आःलार ती रूसी मंजा केरा। आ चान चेंपद् गा जुक्किम पुईंया। ख़ल्ल-उखड़ी ख़ईया केरा, जोक गड्डी नाल तरता ख़ल्ल नूँ इकला ख़ेस्स मंजा। ख़ेस्स मल मंज्जका पंदहे ईर गे हूँ ख़ेस्स जुक्किम ख़क्खरा। जोक उल्ला नूँ इबड़ा ख़ंजपद् हूँ मुन्जरा केरा। तंग अज्जी गही रअते जुब्बीस गे एन्देरईम घोखना हूँ मल मना लगिया। जुब्बीस कुबड़ा चड्डे एन्देर नलख हूँ नंना पोल्ला लगियस। आस गही धतम् पद्दा-ख़ेप्पा नूँ कुद्दना अरा मण्डी बिअना बेड़ा नूँ बरअर की मण्डी ख़ोलना ओन्ना रहचा। उन्दुल एन्ने मंजा का एड़पा नूँ ओना-मोंख़ा गे एन्दरा हूँ मल बच्छरा। तंग अज्जिद एंदरान गा बितओ चिओ। मलका अरा जुब्बीस गही कुद्दना ती बिखरारअर उन्दुल तंग अज्जिद आस गे पइरी ता नास्ता मल चिच्चा। जुब्बीस गे कीड़ा मल सहारआ हेल्लरा। आस असरा एःरा लगियस का तंग अज्जिद उर्मी उल्ला बेसेम आस गे नास्ता ओंदरओ दरा चिओ। लोहाड़ी मंजा केरा पहें आसगे मोख़ागे एन्दरा हूँ मल ख़क्खरा। जुब्बीस अउर पोल्लस थिरारआ; तंग अज्जिन गुसन केरस तले केबा हेल्लरस, "अन् पच्चो नास्ता चिअदी का मला, एंग्है कीड़ा गही तनको निंगा तिरहा मल्ला।"  तितरी पच्चो आना किरताचा, "ऐन्दरान् चिओन, एंग्है कुक्क्न?" एःरा गा लगदय एड़पा नूँ एन्दरा हूँ मल्ला, पहें निंगा गे खूरी कुद्दना ती अवसान ख़क्खरओ होले जुनु।" तंग अज्जी गही ई कत्थन मेनर गे जुब्बीस गे उर्मी हेतेड़ चइल बरचा। आस सहजेम् बअदस, "अन् अजी एंगती गलति मंजा केरा, ऐन्गन नलख ननागे आनोय जुनू दने। अक्कु एन नलख ननोन अजी, ढिबा ओंदोरओन, अम्बय तिरहा ननय।" एन्नेम अजी-नतकुर नूँ ईर मझही टोकोच-नखरना मन्नुम रआ लगिया, पहें ईर इर्बर अनइत लोला-चोन्हा नंज्ज-नखरआ लगियर।

     जब्बिस अन्नेम दोय-एंड़ चान गही मंज्जकस रहचस होन्तान्। आस नंना आःलर गुसन नलख बेद्दा केरास। इस रहचस कुबड़ा ने गा इस गे नलख चिओ। हारचस दरा चियन सन्नी ननर एड़्पा किर्रयस। दुयो अजी-नतकुर घोकआ हेल्लरार का, अक्कु एन्देर नन्ना लग्गो। घोकनुम-घोकनुम ईर रोजोट नंज्जर का अक्कु नेअना ओन्ना बेगर अउर एन्दरा हूँ डहरे मल्ला। ईर नेआ ओना गे उर्खर। जुब्बीस तंग अजी गही उदुरना डण्डन् धरचस दरा कढ़ाबआ हेल्लस। तितरी पच्चो आस गही ख़ोला-ख़ोला कुद्दा हेल्लरा। कानुम-कानुम डहरे नूँ ओन गुसन जुब्बीस एःरदस का, ढेर बग्गे गदहद मेना मोंख़ा लगी। आस तंग अजिन् तेंगदस, "अन् अजी इसन अनइत बग्गे गदहद मेना मोख़ा लगी, पहें ख़ापूस गा मल एथेरदस।" पच्चोद् बई, "ओन्टा गदहन धरआ दरा ओन्दरआ।" जुब्बीस अन्नेम नंज्जस। दुयो झनर गदहा नूँ उक्कियर दरा मुँदभारे काला हेल्लरार। जोक गेच्छा कालर जुब्बीस तंग अजिन आनदस, "इसन ओन्टे ख़ोप्प-कुम्बा एथेरआ लगी, अरा चाली नूँ ओन्टे पच्चोद् कूगा लगी अरा अदि गही मुँदभारे ओन्टे केंतेर उयरका रई।" पच्चोद् जुब्बीसिन आ केंतेरन् ओन्दरआ गे आनिया। जुब्बीस अन्नेम नंज्जस। कानुम-कानुम ईर ओन्टे टोंका गुसन बरनर। असन अड्डो अरा उगतात् गा रहचा, पहें गोहला उयुस मल एत्थरस। ई कत्थन आस तंग अज्जिन तेंगदस। तंग अज्जी आनी, "अना नतया एन्दरा एःरदय, उगता गही ऊसंगिन् ओथोरआ ओन्दरआ।" जुब्बीस अन्नेम नंज्जस। जोक गेच्छा केरार ख़ने जुब्बीस गे ओन्टा इन्दरा एत्थरा। आस तितरी पच्चोन् तेग्गदस, "अजी, इसन ओन्टे इन्दरा एथेरआ लगी, बाल्टी संगे ऐप हेरका रई, पहें अम्म नतगुर मल एथेरनर।" पच्चोद् बाल्टी ता ऐपन् कोल्लर ओन्दरआ गे बाचा। जुब्बीस अन्नेम नन्दस।

     कानुम-कानुम ऊख़ा मना हेल्लरा, ख़ने जुब्बीस बअदस, "अनय अजी अक्कु गा ऊख़ा मना लगी, अक्कु एन्देर ननोत? तितरी पच्चो आसिन अबडांती एड़पा गुट्ठी एःरा गे बाचा। जुब्बीस एःरदस का जोक्क गेच्छा नूँ ओन्टा कोहा ऐकन् बंगला लेखे एड़पा रई; अदिन्ती जोक हिड़ी ओन्टे सन्नी टोडंग हूँ रई। आस तंग अजिन इदि गही पईत नूँ तेग्गदस। पच्चोद् आसिन मेनी, " टोड़ंग नूँ एन्देर-एन्देर मन्न-मांस रई? आ टोड़ंग नूँ मक्का मन्न दिम रहचा। पच्चोद् इदिन जुब्बीस ती मेनर दरा अख़अर तेंगी, का ईद गा चाला पच्चो गही एड़पा तली। चाला पच्चो साल मंन्न गही टोडंग नुम तंग्है एड़पा कमई, एकदन सरना बअनर। आद मुँदभारे बई, "अम्बा एल्चा नतिया, अक्कु गा इ चाला पच्चोदिम नम्है संघरा ननो;  गुचा आ बंगला एड़पा नूँ कालोत।" अन्तिले ईर आ बंगला एड़पा नूँ रआ गे काला हेल्लरार। सरना बटगी गुसन अँड़िसयर ख़ने मन्नान तारना आबो टोंगए गही सड़ा मेन्दरा। तितरिद् जुब्बीसिन तारऊ आःलासिन एःरा गे बाचा। मानिम ओन्टे आःलास सरना ता मन्नान तारआ लगियस। आर आ आःलास गुसन केरार दरा आसिन मल तारआ गे बरजआ हेल्लरार। पहें आःलास मल मेंज्जस। बिड़दा आरिनिम केबा हेल्लरस। तितरी गही दिमाग खुब चलरआ लगिया। आद जुब्बीस गही ख़ेबदा नूँ  फुसुर-फुसुर बाचा का, जुब्बीस आ आःलास गही कड़मन छछेम कालार ख़ेंवचोस, होले आद कालो दरा आस गही ख़ेड्ड-ख़ेड्डन् तंग्है उदुरना डण्टा ती पसओ। जुब्बीस अन्नेम नंज्जस। तितरी पच्चो आ तारऊ आःलासिन तंग्है डण्डा ती पसआ हेल्लरा। अन्तिले आ आःलास आर ता अम्बा गे गोहरारआ हेल्लरस, "एंग्गन अम्बा चिआ, अक्कु एन मन्नार इकला हूँ मल तारओन।" ई गोहरारनान मेनर आर आसिन अम्बियर। आ बिरिम चाला पच्चो खुशमारअर आर गुसन बरचा दरा एत्थरा का बाचा, "नीम एंग्है एड़पन नठरना ती बछाबाचकर, अँवगे एःन आनदन, का अक्कु निम्है इ दसा अउर बग्गे उल्ला मल रओ।" एन्ने बअर आद असते नुख़रा केरा। आर जिया सालना ती निन्दियर केरार।

    अक्कु आर हाड़ी आ बंगला तरा काला हेल्लरार। ऊख़ा गही चड्डे जुब्बीस ओन्टे गड्डिन पोल्लस एःरा। तान गा आ गड्डीन् कोड़ेम कट्टियस। पहें तंग अज्जिद् गा आ गड्डी नूँ हुड्डरा दरा खत्तरा केरा। पच्चका काया, अदि गही कड़मद गा नुंजआ हेल्लरा। नुंजना ती आद तंग नतियासिन केबा हेल्लरा। पच्चो गही केबनान् मेंज्जस दरा जुब्बीस हूँ तंग्है जिया नूँ रूसी मंज्जस केरस। अन्तिले ईर असले हाड़ी आ बंगला गुसन अंड़सनर। जुब्बीस एःरदस की तंग अजिन तेंगदस, " अनय अजी बंगलाद् गा कोहा ले, पंहकन आःलार गा ने हूँ मल एत्थेरनर, अक्कु एन्देर ननोत?" तितरी पच्चोद् बाचा, "गुचा ईय्यम माख़ा बेडरोत।" आर बंगला उला कोरचर दरा बलिन मुच्चर अन्नु हुड़्कन ऊदयर चिच्चर। तरा माख़ा मंजा केरा, ख़ने ख़न्दरआ हेलेरनर।

    जोक गंहड़ी खंदरका ख़ोख़ा एड़पा ती बहरी कोहा-कोहा कच्छनखरना मेन्दरना ती ईर एज्जरार केरार। इबड़ा कच्छनखरना इ एड़पा नूँ रऊ राक्षस आःलार गही रहचा। राक्षस आःलार मांख़ा बीरी टोडंग तरा सेन्दरा बीचयर दरा किर्रयर बरचकर रहचर। ईर तम्है एड़पा ती बलिन मुचुरका अरा ऊदुरका ईरयर दरा अक्खर केरार का नेकईम मला नेकईम एड़पा नू कोरचरकर रअनर। राक्षस आःलार गही सरदारेस खींस ती चिचयारआ हेल्लरस, "एम्है एड़पा नूँ ने रअदर?" जुब्बीस तुरतेम आनाकिर्तआ बेद्दा लगियस का आस गही तंग अजिद् आस गही बईय्यन तंग्है ख़ेक्खा ती मुँदचा चिच्चा। तलेकुन तानिम बाचा, "एम निमहै अज्जो-अजी तलदम।" राक्षस आःलार तमनु भंगरारआ हेल्लरार का ईर मानिम ने तलनर होंतन्; एन्देर ईर मानिम नम्है अज्जो-अजी तलनर। इर एकेसते बरचर होंतन। ओन्टे राक्षस आःलस फिन चिल्लरदस, "अगर नीम एम्है अज्जो-अजी तलदर होले गा एम्है ती बग्गे संवगिया रअदर होंतन्, तनिक निम्है जुट्टिन् तो एःदआ?" तितरी पच्चोद् दिगहा ऐपन् एड़पा बहरी हेबड़ी चिई। आर अदिन एःरनर दरा तमनु बअनर, "अयु गयु.......इवंदा तिगहा चुट्टी गा एम इकला हूँ मल इरकम रहचकम। आर मने-मने एल्चा हेलेरनर। अन्नु हूँ ओन्टे राक्षस आःलस तंग्है मल पत्तआनन् कुदाबआ गे चिल्लारअर आनदस, "निम्है ख़ेबदा एकासे रई?" कुबड़स इदातो जुब्बीस तुरतेम केंतरन् बहरी हेबेड़दस चिअदस। इवंदा कोहा ख़ेबदन् एःरार ऱाक्षस आःलार हयकट मंज्जर केरार। कोहा सरदार राक्षस आःलस बअदस, "निम्है पल्ल एकासे रई? अगर नीम मानिम एम्है अज्जो-अजी तलदर होले गा निम्है पल्ल पन्नान् चबना बेसे रई होंतन?"  पच्चोद् ऊसंगिन् आर गही मुन्दभारे हेबड़ी चिई। राक्षसार ऊसंगिन ईरयर की हका-बका मंज्जर दरा इल्चका ती असरा हेल्लरार। ताम-ताम आना-नखरनर का,  "नेक्खअय पल्लद इवंदा कोहा रई,  तो नम्है अजस एकासे रअदस होंतन्! अन्नु हूँ ओन्टे राक्षस आःलास जियन् डीड ननर बअदस, "अगर नीम मानिम एम्है अज्जो-अजी तलदर, होले निम्है कत्थद् एन्देर गे एन्ने पतला मेन्देरई?"  "निम्है ख़ेबदाद एटेरओ कालो घोखअर रसे-रसे कच्छनखरदम, निमागे मेनम तुक्की होले ओंदा मेना।" आर आना किरताचर। एन्ने बअर तितरी पच्चोद् अकते गदहा गुसन केरा दरा अदि गही ख़ेबदन अयंठआ हेल्लरा। गदहद गा ढेंचूं-ढेचूं....... बआ हेल्लरा। राक्षस आःलार गही बई मुचरआ ख़च्चिया। आर गा तम्है ख़ोल्लन् ख़ोख़ा तरा नुड़अर भोंग्गा हेल्लरार।

    नन्ना उल्ला पइरी बीरी मण्डी बीतना गही बेड़ा बरचा। जुब्बीस तंग अजी गही केप्पकन मल मोधोरकस रहचस। आस गही जिया नूँ रूसी अक्कु गूटी रहचा। आस इन्ना तंग अजी गे दव मण्डी मल चिअना गे ठनचस। आस मण्डी बितआ गे मदगिन पूख़आ हेल्लरस, अन्नु ढेर बग्गे बेःकन्, मरचन, अरा बोक्खो गुट्ठिन हूँ मेसचस। कट्टू नूँ अम्म  बत्ता हेल्लरा, ख़ने तंग अजिन चुल्हा किटआ गे आनियस दरा अम्म ओन्दरआ गे बहरी केरस। कट्टू नूँ अम्मद बत्तिया दरा मण्डिद् गा ओला हेल्ल्रा। पच्चोद् ओलना गही चंअना अरा चड्चड़रनान् मेंजा की कलछुर ती कट्टुन हंडरआ हेल्लरा। मदगी अरा बोक्खो गही ओलना ती कट्टुद गा धुंगयारआ हेल्लरा। पच्चो गही मुँहिद् कट्टू मैय्यम रहचा। हंडरओ बीरी धुंगयद् गा अदि गही ख़न्न नूँ कोरचा केरा। तितरी पच्चोद् तंग्है ख़न्न् निड़गाचा। आ बीरी ओन्टा हयकट नलख मंज्जा। अदि गही खंन्नद गा कोल्लरा केरा अरा कट्टू ता बीतना संजगी इदातो बोक्खोन, मिरचन, बेःकन अरा मदगिन आद ईरया चिच्चा। आद अक्खा केरा का ईद जुब्बीस गही दिम बदमासी तली। आद जुब्बीस मैय्या खिंसारा केरा। आ बीरिम जुब्बीस अम्म ओन्दोरदस की चुल्हा गुसन बरदस। पच्चोद गा खिंस ती आसिन केबा हेल्लरा, "अना को नतिया एंग्गन पिटोय का, एंग्गन एन्ने बोक्खो गही मण्डिन ओन्तआ बेःदय। इन्ना एन निंग्गन मलम अम्बोन।" एन्ने बाचा दरा तंग्है उदुरना डण्टा ती जुब्बीसिन पसआ हेल्लरा। आस गही मेदन् खुब पसआ हेल्लरा। पसनुम-पसनुम एन्देर मंज्जा का जुब्बीस गही कुबड़ा मेदाद् उजगो मंजा केरा। आस तंग अजी गही डण्टन बच्चियस चिच्चस। तलेकुन तंग्है उजगो मेदन् एःरार आस हयकट मंज्जस केरस। तितरीद् हूँ घोकआ हेल्लरा का, एन गा ठवका-ठवका मेदन नुम एःरा-एःरा पसआ लइक्कन; ईद एकासे मंज्जा। तले आद चाला पच्चो गही आ आनका कत्थन सुमराचा, एका बीरी चाला पच्चो आरिन मेर हेअर बाचकी रहचा का, आर गही दसा अक्कु बग्गे उल्ला एन्नेम मल रओ। आद जुब्बीसिन हूँ आ कत्थन सुमरआ गे बाचा। ईर बुझरार केरार का इबड़ा उर्मी नलख चालो पच्चो गही दिम रहचा। आर उर्मी बेड़हा जियन मोधरार की खुशमारना ती निन्दियर केरार।

    ई अचरज नलख ख़ोख़ा आर आ बंगला नुम निच्छन्द मनर दल एकन ओना मोंख़ा अरा उज्जा-बिज्जा हेल्लरार। आर गही उर्मी कूल-कीड़ा भोंगा केरा।

   टूड़ा | पइत टूड़का | खीरी | डण्डी | नन्ना गुट्ठी | तोलोङ सिकि नू टूड़का कत्थूड़ा

तंगआ कत्थन, उज्जना-पर्दनान, नेग-चारन् अरा अइनान जईपुईर गे ख़ोजा-पर्दआ।

   बखनी(विज्ञापन)

कुँड़ुख़ कत्था नूँ मुन्ता जल्ली अड्डा, एकन्नू अनइत बग्गे कुँड़ूख़ अरा नंना कत्थूड़ा(साहित्य) गुट्ठी चीतारकी रई। ई जल्ली अड्डा गही निस्ठा(लक्षय)) कुँड़ूख़ कत्था अरा उजपर्दन्(संसकृति) परदआना अरा सहजआना (प्रोत्साहन) तली।
कुँड़ुख़ कत्था नूँ एम्बा सारदय अरा नीन हूँ ई जल्ली  अड्डा नूँ तंगआ टूड़कन नन्ना कुँड़ख़र गुसन् चाँख़आ बेद्दय होले अक्कुनिम     पुथि नू नामे अर्गत'......?

आदिबासी कड़ी गुट्ठी

बेल्ख़ान्ता धरम्