बक्-ख़ोर

 

सौंसे बेल्ख़ा नूँ मुन्ता कुँड़ुख़ जल्ली अड्डा!

 
   

 

नीन ईसन् रअदय : मूद्ध पन्ना > कुँडूख़ कत्थूड़ा > देवनागरी > खीरी(कहानी)

निगनिगरका

खीरी

अँधरी पच्चो अरा कुबड़ा नतियस
करम खीरी (1)
बिति-डण्डा
मतवारस गही दसा
करम खीरी (2)
धरमुस बिट्ठी केरस
उला ता आलो गही मुल्ली
पचबा-आःलर
जुटुरना नूँ सवंग रई
भड़ा गही अड्डो
 
अउर बग्गे खीरी....

एन्नेम लेखा कड़ी
हिन्दी कत्थूड़ा
अँग्रजी कत्थूड़ा
ख़द्द कत्थूड़ा

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

       टूड़ा | पइत टूड़का | खीरी | डण्डी | नन्ना गुट्ठी | तोलोङ सिकि नू टूड़का कत्थूड़ा

 

करम-खीःरी

गोनसाई किस्पोट्टा, सुखन केरकेट्टा अर दरोगा मिंज, सरगुजा

हुल्लो परिया नूँ पुरखर ही तिंग्गका खीरी। सात भाई अरा सात गुतनी रहचर। आर ठसा-मंजा ही उज्जा-बिज्जा लगियर। तो करम ही तिहार अंड़सा लगिया। आ जबाना नूँ पैसा-कौड़ी ही मलका। तो आर सोच्चर करम राजा नम्है गुसना बरऊ रई। नमा गजे सार-समान खेंदना रई। तो भाई आर गुसन तीख़िल रहचा, मनी रहचा, मगहा रहचा। खेती गृहस्ती आःलार ही गा धन-दौलत आदिम हिके।

      तो आर सातो भाई तैयार मंज्जर, सार-समान खेंदा गजे अपन आःली गजे, अपन ख़द्द-ख़र्रर गजे। तो आर भाई लदनी लदचर। आ घड़ी बआ चा, गाड़ी-घोड़ो गही गा नामे दिम मल रहचा। आर अपन-अपन आःलिद बआ लगी, एंगे चुटकी ओंदरके चिअके, एंगागे मुदरी ओंदरके चिअके, एंगागे झिका ओंदोरके चिअके, एंगागे बिटला ओंदोरके चिअके, एंगागे किचरी डोड्डो ओंदोरके चिअके। ओर्मर भाई अपन-अपन तेंग्गा लगनर। ते चाड़ रहचा अदिन। तो सन्नी भाई सी आःली बआ लगी भाई, एंगा गा ख़द्द न ख़र्रर, एन्दरन एन बओन। तो आद सुपट आस ही गुसन केरा की बाचा, ख़ेबदा गुसानिम बाचा, एकन्नेती की आस अम्बन् मोधरअन। एंगागे अगिनझार किचरी नीन ओन्दोरके चिअके। तो भाईरो ओर्मर, अपन-अपन जो सामान खेंदागे आनियर अदिन दव एकन समझारअर-बुझुरअर। आर अक्कुन काला लगनर। तो कालते-कालते-कालते, दोन्दुआ-घाटी अपन-अपन अड्डो नू लच्चका हंसी-खुशी रिझ-रंग बेसे आर काला लगनर। बिदेस काला लगनर, परदेश काला लगनर, गेच्छा कालते-कालते-कालते अका खोह बिजबन कठरा नूँ अंड़िसयर केरार। न अइय्या ओःड़ा ही न ख़ाख़ो ही एन्देर सबद दिम मल्ला। एन्देर पता दिम मल्ला अन्ने आर जंगल नूँ कठरा नूँ आर-पार मना लगनर। तो कालते-कालते-कालते ऐसन भारी जंगल कंचा बाँस कचचियाय ता झूरा बांस ठाय करे। अन्ने कठरान आर कट्टा लगनर। एन्देर गे इकला मल इकला ता बांस ख़इका उर्रालका। आद गा खतरओ दिम, आद गा ठाय बओ दिम तो आर काला लगनर, काला लगनर, काला लगनर। ऊख़ा मनाली असन बेडरा लगनर, उल्ला अरा माख़ा एःका लगनर। कालते-कालते-कालते आर अंड़सा गा लगनर नहीनंग्गार। नहींनंग्गार सहर गही माने बेगर ईरका सहर, ने हों अयो-बबा मल्ला ईरका, न बाप देखल राजी न अयो देखल राजी। आ जगहा नूँ कालनर। आ जगहा नूँ अब अंड़िसयर केरार लइने-लइन सारे के तिलया महाजन, बनियर ही दोकान  लइक्का। तो भाई, आ बाजार नूँ आर गे समान खेंदना रहचा। तो तम्हैं, लदनी लदनान् उर्मीन एत्तआचर अरा भाव गुट्ठी हिसाब-किताब नंज्जर। भेद-भाव बाजार ता एकसन एकासे चिआ लगनर मेन्नम मनी। तो ई गेच्छा राजी ती आर केरका रहचर बआ। अरा अन्ने गेच्छा परदेश। तो तीख़िल, दाली, अड़सगा ही भाव गा आर मेंज्जर अरा सारे के तम्हैं राजी ती दुगुना आद ही ढिबा आ राजी नूँ। हाँ, तो आर गा भभरारर भाई। हाँ, मला अक्कु नम्हैं समान गजे मनो कालो। तो आर बीसयर गुट्ठी। बीसयर अपन-अपन समानन्। अरा आद ही बदली आर पैसा ख़क्खियर। तो अक्कु आर बाजार कुद्दा लगनर। अपन-अपन सामान खेंदा गजे भाई, ओर्मर दिम अपन-अपन जैसेन-जैसेन सामान रई, तैसेन-तैसेन-तैसेन आर अक्कु बेद्दा लगनर। तो ओर्मा भाईर गा अक्कु समान खिंद्दयर। ओर्मा भाईर गजे आद ख़क्खरा केरा। तो सन्नी भाईस गजे आ समान ख़क्खरअम मल ख़क्खरई। गोट्टा सहर नूँ बेद्दा एरदस तंग्है कोहा भाईर जंगारनर। एकासेन नीन बेद्दय दरा हो। निंग्गगेम माल ख़क्खरआ लगी का ढिबा माल मना लगी। आस कलेकन रअदस। आस हूँ आ समानन् मल तेंग्गादस। अपन मने-मने आस बेद्दा लगदस। तो कोंहा-कोंहा दोकान नूँ कादस। तो आस ही आली बाचकी रहचा दोकान तर मेंज्जर, "निंग्गन ने ख़ेंदा गे आनिया अंगिनझार किचरी एकसन मेंज्जकय रअदय?" तेकर भाई आस गे ककबकासी लग्गिया केरा। भाई, एन अक्कुन एकसन बेद्दोन अरा मल होओन ती कालोन अन्नू हूँ गा एन आःली बओ, "ओर्मर एकासे बाचकाचर अन्ने समान ओंदरर, नीन ओंदरकय का मल ओंदोरकय।" तो आ बीरिम ले ओंटा मालहेन पच्चो रहचा, बरगाही पच्चो तो आसिन ईरया की आस ही मंइय्या दया लग्गिया। ख़ने आद मेंज्जा, "अना बबु नीन एंदरा बेद्दा लगदय बबु?" आस बअदस, "ए अयो एन अगिनझार किचरी बेद्दा लगदन।" अगिनझार किचरी तो बआ लगी। "ई कोहा सहर नूँ पोल्लोय बेद्दा तो एन कटिक पता लगा बाचका रअदन। एन मालहेन पच्चो, इदा तो एन ओंटा साधुस गे फूल-पतर होअदन चिअदन। ख़ने कटि-कटि एंग्गा गजे सरवान ख़क्खरकी रई।" तो भाईरो, आस गे दम अउर दिलासा ख़क्खरा। आस आ साधुस गुसन कादस। आस ही ख़ेड्ड मूली खत्तरदस। अरा तंग्है दुक्ख अरा तपलीकन तेंग्गदस। ख़ने बअस आ साधुस, "खातिर नना बेटा, एन निंग्गा अगिनझार किचरी चिओन। मगर होआ गजे निंग्गागे अजम मस्किल मनो कालो। एकासे होओय? निकइम पता ननोर चिओर होले निंग्गन डहरे बाटे नूँ लओर ती बेड़तओर चिओर। अरा निंग्है समानन् बच्चोर की होओर कालोर।" ख़ने आस बअदस, "कम से कम एदआ तो भाई अगिनझार किचरी। एकासे रअई। एन हों तो एरोन।" तो आ साधुस आ अगिनझार किचरीन बांस गही ठुंढ़ही नूँ उइका रअदस। तो कटी कुना ओत्थरस। आद गजेम आ अगिनझार किचरी बिद्दुस आ भाईस भड़ास न खत्तरस कादस, सट्ट ने आ साधुस अदिन टुस्सइस चास फेर बांस ही ठुंढ़ही नूँ।

    पिसा संभड़ारदस ती "हाँ" ख़इक्कन बआ लगदस अक्कु। जो मनन् अक्कु ईसती एन होओनिम कोन। होओन किम रओन जैसेन दाम लग्गन ख़इक्का रअदन। तो अक्कु इदिन होओन निम। हाँ तो साधु सिन बअदस, "नीन जैसेन एंग्गन उपाय तेंग्गा आ उपायन एऩ मनओन अरा इदिन एंग्गा चिआ नीन अरा जे इदही दाम भाव रअई, इदिन नीन तेंग्गा तो भाई।" साधुस आसिन बाचस, "इदिन नीन नेकन हूँ अमके तेंग्गा, अउर एकसआनिम हूँ अमके एरा नीन, होले नीन होआ ओंग्गोय।" "हाँ" तो आर ओर्मर लदनी अड्डो नूँ कस्सर भिड़चर ती तैयार। तो आसिन अलखना अरा खुसमारना ईरयर ती बआ लगनर, "हाँ, हुदा बरआ लगदस अक्कु ख़क्खियस केन्हेर हो।" लगे अन्ती उसरआ अंती जल्दी। कै साल कै दिन बित्तरा केरा एड़पा तरा हूँ कोत जुनु। चाँड़े उसुरआ बाचर। "हाँ, उसुरआ लगदन बाचस।" आस गे खुशी रहचा भाई। खुशी लग्गो दिम। तो आस हूँ जल्दी-जल्दी भिड़चस मुँज्जियस। अक्कु ओर्मर काला लगनर अस्ते। कानुम-कानुम हंसी-खुशी, मजाक नन्नुम। हाँ, किर्रा लगनर तम्है एड़पा तरा अक्कु। अन्ती तम्हैं सौदा गा जमा मंज्जा केरा किर्रोर जुनु। भाई, कालो बीरी गा गेच्छम लग्गी। अक्कु उर्मी समान ख़िंदयर अरा किर्रनर ख़ने आर गे हइलका लग्गा लगी अरा अड्डो गुट्ठी बने एःका लगी,  खुशी लग्गा लगी ख़क्खियर तेकर। तो बरते, बरते, बरते ओंटा ख़ाड़ अंड़िसयर न। आ तम्हैं एड़पा ती ओन कोस गही अड्डा लेक्खा नूँ बआ चिआ। कोहा भाईस बआ लगदस, "ए हरो अक्कु गा अंइड़सकत। तो एःरा लगदत नाम एकअम उल्ला ओंडकत, एकअम उल्ला मल मोक्कत। नमहैं चेहरा-चंडी तनिक मड़ख़की केरकी रअई। तो उर्मीन इसानिम मढ़ाबओत अरा इसन कटिक ख़टओत ओनोत-तेकर दवले कालोत।" तो आर, उर्मी सार समानन् ओकताचर। तेकर अक्कु लोटा, छिप्पा, डुबहा-थरन ओथरआ लगनर। तीख़िल दाली ख़टआ गजे। तो बआ लगनर, "अयं......ग्गो चिच्च गा अक्कुन नाम एकसन बेद्दोत? आ जबाना ना माचिस, न सलई मल रहचा। "हाँ, तो खूड़ी हूँ ए मल ए गेच्छा कइट्टकत केरकत। अक्कु मझी नूँ एसन बेद्दोत इला। अक्कु नम्है खूड़ी दिम हेद्दे रअई। अक्कुन आद कुना गा एथरआ लगी। हेद्दे अंइड़सका रअदत।"

    तो सन्नी भाईसीन कोहाँ भाईस हुकुम चिआ लगदस, तइय्या लगदस। "तो, कला तो रे बाबु अक्कु एड़पातिम चिच्च ओंदरके अउर एड़पाता हालचालन उर्मीन ओंदोरके मेनके बरके। हाँ होन हो'आत अरा बअके उइके एम अक्कुन अंड़सोम। चाँड़ेम एम बरआ लगदम, उर्मीन नीम सपड़ाचका रअके। एड़पा-पलिन दवले परपन्द ननके उइके। हाँ, तो भाईरो, तो आसगे खुशी लग्गिय। सन्नी भाईसीन तइय्या लगनर ख़ने। आसगा तंग्है समान अगिनझार किचरीन ख़इक्का रअदस। तंग आःलीन ओरोस तेकर गा आस गे अउर खुशी लग्गो। हाँ, तो आस अजम रिज्झ-रिज्झ अक्कु इक्कयस चिच्चस रिझती गा काला लगदस। समान हूँ ख़क्खियस। हाँ, अरा बग्गे खुशी लग्गा लगी।

    तो अंड़सते-अंड़सते मेना लगदस ख़ेल अरा झांइझ ख़रख़ा लगी। तो इबड़ार ही बरना ती मुंध, आर ही तम्हैं सातो गुतनीर तम्हैं आःलार परदेस किर्रिम बिच्चयर ख़ने अजम उपवास नना लगनर, बरत नना लगनर, घोंख नना लगनर, एड़पा नूँ। भाई एम्हैं आःलार परदेस बिच्चयर। तो एम एड़पा-पलिन समढ़आदम दव से। तो सातो गुतनीर बने मेल-प्रेम ती रअचर। हाँ आर रिझ रंगन ओन्ना-मोंखनन् उर्मीन अम्बियर चार। हाँ आर ही फिकिर नूँ रअन कय-कय उल्ला, कय माख़ा, कय साल कट्टिया केरा। आ गूटी आर एड़पा-पली नूँ दवले रआ लगनर। नइहर मल्ला ईरका आर तो इदीनिम एःरर की धर्मेस आर गजे, मनाबआ गजे करम राजान आर ही एड़पा नुम आर ही चाली नूँ तइय्यासचस। तो आ ख़ेल झांइझ दिम अक्कुन  ख़रख़ा लगी। सारे के बओत सात सिकड़ी ही। नोचले नी नोचय। ओर्मारदिम बेचना अरा बेचना। ओरोत हूँ एःरू मला। रिज्झ ही मारे, खुशी ही मारे एन्देर बअना दिम मल्ला। तो, एन्देर गे हूँ फिकिर दिम मल्ला। हाँ, एन्देर गे दुक्ख अउर तकलीफ दिम मल्ला। तो आ सन्नी भाईस अक्कु अंइड़सयस केरस। तो आस हूँ  एःरा लगदस अइय्या गा रीझ रंग निन्दकी रअई। भाई आस भुल्लरस केरस एंग्है कोहा भाईर, एंग्गन एन्देर अइनकानर। तो, आसिन पाब एःरा लगनर, अक्कुन बरओस, पिसा बरओस, अक्कु बेड़ा गा टगरआ लगी। तो आसिन ती सन्नी भाईस सिन बआदस कोहा भाईस, "कला तो ले नीन हूँ एःरके बरके दे एन्देर मंज्जस हू सारे गदहस। अक्कुन गूटी मल अंड़सा लगदस।" तो आस हूँ बरचस। एड़पा अंड़सदस ती एःरदस ख़ेल, झांइझ, टिमकी, नगेड़ा गही सड्डना ही मारे अरा ओर्मा ख़द्दर बेचानर, ओर्मर बेचानर। ओर्मर बेचना अरा बेचना। रीझ अरा रीझ झुमुक झुमा बआ चा। तो आस हूँ भुल्लरस केरस आस एन्देर किर्रोस का चिच्च होओस। आसिन्ती फेर सन्नी भाईसिन तइदस। "कला तो ले, एन्देर मंज्जर केरर, ई सारेर दे मल बरआलनर।" ओरतोस होले जुनु छव बआ चिआ ओरोत हूँ मल किर्रयर। भाई, एकासे किर्रोर आर भाई, रिझ अड्डा नूँ आर हूँ गा भुल्लरार केरार बेचते-बेचते-बेचते। हाँ, आरगे एन्देर गे फिकिर मल्ला, एन्देर गे हूँ सोच मल्ला। एन्देर तपलीफ मना लगी। होंस दिम मल्ला।

     तो ई कोहां भाईस गे जे अक्कु अजम कोहां, तपलीफ मना लगी। अक्कु एन कादन, होले समानन् ने एःरो?  हांई? मुसकिल कत्था। ई बग्गे आःलो गुट्ठी रअई। तो इदिन एकासे एन ननोन? अरा आस कीड़ा ती छटपटरआ लगदस। आस गे कैर गा अर्गिया केरा। हाँ चिच्च लेक्खा आस गे कैर लग्गिया केरा। मुरूक गोसा मंज्जस केरस। तो बआ लगदस, "एन्देर मंज्जर केरार ई आःलार भाई? ओर्तओ केम हूँ तो किर्रोर दने।"  तो ओन्टा बल्लु, कोहम बल्लुन धरचस ती चल्लरस। हो न हो, इंगड़ी बगारिन इन्दरईम छिकचकी रअई। इंदिरईम बिपइत मंज्जा तबे तो मल बरआ लगनर। ओर्तओम के एकासे मल बरपओर दने। एकासे मल बरओर दने।" तो आस हूँ बरदस तेकेल एःरदस अइय्या गा ओर्मर दिम बेचा लगनर। झुमुक झुमा अउर आस गे गा खींस लग्गा लगी। एंड़िक रीस तरूवा में चईढ़ जाय, बअना लेक्खा। कैरारका रअदस आस। खन्नद् ख़ेंसो मंज्जकी केरकी रअई। किंदरार आ लगदस, एःरा लगदस, एन्दरा ईरिन लोभा बाचकी रअई अरा एकासे नूँ ईर एन्ने कोड़हे बेचा लगनर? एन्देर रिझती बेचा लगनर?  भाई आस ही जिया नूँ एन्देर होस दिम मल बरआ लगी। सोचअम पोल्लादस कैर ही मारे। हाँ, तो एःरा लगदस मझी नूँ करम राजन्। हाँ, करम गही डहुड़ा गड़काचर अदिन अरा आद ही ओन भंवरी बेचा लगनर। हाँ तो बाचस, "ईदिम लोभा बाचकी रअई, हाँ! ईदिम ई बग्गे आःलारिन किर्रा मल चिच्चा तै झनरीन। लोभोरकानर अरा ईदिम ईर गे रिझ रंग नना लगी।" बाचस तेकर कैर ती रीस ती सकत बोंगा बांचइस चास हो। हाँ सात बोंगा बोंगचइस चास, मलम संभड़ारा। तो भाई करम राजा गजे गोसा लग्ग्या, अक्कु नराज मंज्जा केरा। तो आ बेचू तोकुर गे हूँ बआ चिआ न किसिम गही तपलीफ मंज्जा केरा आर हूँ अकबक्करार केरार। एन्देर गे ई आःलास एन्ने नंज्जस? हाँ, हंसी-खुशी ती बेचा लइक्कत। हाँ रंग नू भंग नंज्जइस चास।

     तो भाई आस गजे गा तंग्है समान मइय्या चिंता रहचा। हांई? आ बग्गे-बग्गे अड्डो आ बग्गे चीज बाचस ती आस किर्रयस, तंग्है समान गुसन। तो समानन् एःरा लगदस गा उर्मी अक्कु पखना उलटारा केरा। आस ही किस्मत बिगड़ारा दिम केरा। जमा समान अड्डोद् हूँ पखना मंज्जा केरा बआ चिआ। बोरा बिस्तरद् हूँ पखना मंज्जा केरा बआ चिआ। उर्मी दिम पखना उलटारा केरा। आस अक्कु अकबक्करस केरस। भाई अकबकरओस तिम जुनु इला? अकबक्करस केरस भाई आ बग्गे चीज रहचा हाँ! जम्मैच दिम पखना मंज्जा केरा।

    तो आस बाचस, "होह, एंग्है बिगड़ाचका दिम हिके। एन कैरन् संभड़आ पोलकन अरा आ करम राजन् एन खंइडकइन चकन अरा नाराज मंज्जा केरा। हो न हो ईदिम एंग्गन ई कोड़हे दुक्ख अरा तपलीफ तइय्या।" बाचस ती आ बीरिम कुक्कन कप्पियस अरा बआ लगदस, "हाय करम! हाय करम! हाय करम!" एन्ने बाच-बाच पसतारआ लगदस। अक्कु एन एकसन कालोन एकासे ननोन? अरा एन्दरन ओनोन मोंख़ोन?  तो आस सोच्चस एंग्है किस्मत दिम बिगड़ारा केरा। हाँ! ते अक्कुन हाय करम, हाय करम बअनुम आस सोचआ लगदस। अक्कु  एन अदिन बेद्दा कादन। एकअम अन्ने मनो, दुक्ख मनान् तपलीफ मनान पहें अदिन एन बेद्देनिम।

     तो हाय करम, हाय करम, हाय करम बअनुम, बअनुम, बअनुम आस अक्कु काला लगदस बेद्द गजे।  बेद्दागे कादस तो राय करम, हाय करम, हाय करम बअनुम, बअनुम, बअनुम आस बेद्दा काला लगदस। तो ओंटा पद्दा ता आःलार मेनोर की उरखोर दिम। भाई एका ओरतास हकदस। एन्देरना हाय हाय बअदस, एन्देर बिपत मंज्जा केरा दरा हाय सोह मनादस। तो कालते, कालते अन्नुम काला लगदस। तेकर ओंटा मुक्का उर्खा। मुक्का मेंज्जा हाय, हाय बअनान। तो अदि ही कुक्क नूँ बड़ा भारी बिरनी भुचड़ा कुंद्दकी रअई। बिरनी ही भुचड़ा! मुक्का ही कुक्क नूँ! तो बिरनी ही भुचड़ा कुंद्दकी रअई बआ। तो आद गा उर्खा जट्टा मट्टा। कुंद्का बीरी। आ भाई आद गा एकअम उल्ला हूँ संच मल्ला न बागरआ लगी, न खांसरआ लगी। बिरनी भुचड़ा संग्गे न नेखअय गुनेम एथरआ नखरआ लगी। भाई अदही किस्मत हूँ टेड़हा मंज्जकी रअई। लज्जे मंज्जा केरा। तो आद उर्खा ती मेना लगी आसीन, "नीन इकया कादय बआ लगी।" "एन करम राजन् बेद्दा कादन।" बआ लगदस। "एग्है किस्मत टेड़हा मंजा केरा।" अँवगे एन करम राजन बेद्दा कादन। तो आद हूँ बआ लगी, "एंग्है खभरन् हूँ कटिक मेनके बरके। एंग्गन हूँ एःरा लगदय एंग्है कुक्क मंइय्या, बिरनी ही भुचड़ा बड़ा भारी। कय साल मंज्जा केरा, एन अनैत बिपइत नूँ रअदन, " कुंद्दका मुक्का बआ लगी। तो 'हव' बाचस आस, "मेनोन बरओन।" तो फेर असतेक काला लगदस हाय करम, हाय करम, हाय करम बअनुम। तो फेर, ओंटा पद्दा अंड़िसयस। आ पद्दा नूँ ओंटा मुक्का ही लिंड्डी नूँ कोहम कंड्डो अइसगका। ना अदि गे ओक्का गेम संच न इजआगेम संच। कंडो असिगकी रअई। खरा मसकिल कत्था। हाँ, तो आद गजे एन्देर हूँ संच मल ख़क्खरआ ली। उर्मीन ती कोहा बिपत मंज्जा केरा। एसन ओक्को!  तो आद आसिन बआ लगी, "एन्देर काला लगदय नीन।" आस बअदस एन करम राजा गही खोजार काला लगदन। एंग्है किस्मत टेढ़ा मंज्जा केरा, बिगड़ारा केरा। तो आद हूँ आना लगी बेचारिद्, " ए बाबू, बआ लगी। "एंगहैन हूँ तो नीन मेनके बरके अंती नीन बेद्दा काला लगदय। ख़क्खोय होले, एंग्हैन हूँ, एंग्है खभरन हूँ तेंग्गके चिअके दिम।" बआ लगी आद, "एन हूँ अनैत दुक्खे नूँ रअदन, चिन्ता नूँ रअदन। तपलीक नूँ रअदन। एःरा लगदय, एंग्है लिंड्डी नूँ एकासे कन्डोद् असिगया केरा। लज्जे मंज्जा केरा।" तो फेर काला लगदस। कालते, कालते, कालते, कालते आस गे अम्म ओन्का लग्गा लगी। कीड़ा लग्गा लगी। आस अकबकरआ का लगदस, परेसान मना लगदस। ओन अड्डा ओंटा अहिरस ख़क्खरदस आस ही गाय भैंस ही सही मला जात। अनलेख सात ठू डंडा नूँ हूँ ख़ापा पोल्ला लगदस। अन्ने डंडा ही, अन्ने बग्गे। बेहिसाब आस संभड़आ पोल्ला लगदस। तो ईस हाय करम, राय करम बअनुम कादस ख़ने, आस हूँ भेटारस। तो आस बअदस, "इक्या कादय ले।" एन करम राजन् बेद्दा कादन्।" तो एंग्है खभरन हूँ तो बआ लगदस, "एन सम्भड़आ पोल्ला लगदन आ गूटी धर्मेस एंग्गा गजे चीज बतुस नीदते काला लगदस। निदआ  चिआलदस। "इदानिम तो मेनके बरके इदिन आस होओस का चिओस औरेम। एंग्गा गजे मसकिल मना काला लगी सम्भड़आ गजे।" हाँ, अच्छा मेनोन बरओन" बाचस। तो हाय करम, हाय करम, हाय करम बअनुम कालते, कालते ओंटा छिरकासीन ख़क्खदस। आ छिरकस गुसन बओय ओनिम बित्ता ही कमड़ा, ओनिम बित्ता ही। हाँ, दिगहा हूँ मला न पुड्डा मला, आद चोआ हूँ मल बनई। मांख़ा बीरी झपरआ गे हूँ मल बनई। एन्देर नूँ हूँ मल्ला काम। तो उल्ला अरा मांख़ा आ एकअम कोड़हे ननोस आस गजे आरूच दिम। हाँ, तो आस बआ लगदस। "भाई ई बग्गे ती एन बढ़रदन न ई बग्गे ती घटरदन। तो एंग्है खभरन हूँ तो मेनके चिअके, ओन बित्ता जो रअई एंग्है, अदिन करम राजा होओ का चिओ। हाँ। तो ईद ही खभरन नीन कटिक मेनके बरके अउर किर्रो बीरी तेंग्गके।" तो "हव" बाचस आस, तेंग्गोन।

     तो भैई आस  गे कीड़ा, चटा लवआ लगी, अम्म ओनका लग्गा लगी। एरचरना ती आस लथपथ मंज्जस केरस। तो ओन अड्डा गाय दुदही ओंतआलिया। तो आस बाचस, "हाँ, अक्कुन गा गाय  दुदहिन ओनोन तले काओन मलता पोल्लोन काला।" तो, अंड़िसयस ती मुंध तरा कादस ख़ने कुस्सी ख़ोख़ा तरा कादस ख़ने लथई, तो आस दुदही हूँ ओना पोलदस। बड़ा मसकिल मंज्जा केरा, बडा आफत मंज्जा केरा। फिन असते कालते-कालते हाय करम, हाय करम, हाय करम बअनुम, तो ओन अड्डा एःरा लगदस मासी गदा। बआ लगदस अक्कुन गा एन कूल उड़आ मोख़ोन तबेच कओन। आखिर गा बेद्दा कालम लगदन कीड़ा हूँ लग्गा लगी, गदान ती तो कूलन उड़तओन बआ लगदस। तो, मासी गदा गुसन अंड़िसयस तेकर फोकलआदस, माने तुड़ख़दस आद हूँ पोचगो अइय्या पोचगो फेर नन्नान चोख़दस ती तुड़ख़दस अइय्या हूँ पोचगो। आस बिहनी ख़क्खम ख़क्खियस तो मोंख़ोस एन्दरन? पोचगो! आस गे बड़ा आफत मंज्जा केरा। आस गे कीड़द हूँ जितआ लगी। तो फिर कालते-कालते-कालते अन्नु हूँ आस जोर मल हारआ लगदस। एकअम अन्ने मनो बआ लगदस। जोर दिम नना लगदस। चाहे जे मनन्। एःरना मनो कालते-कालते-कालते, हाय करम, हाय करम, हाय करम बअनुम आस ख़ड़दा लगदस। अक्कु एन्देर ननोस तो ओन अड्डा ख़ाड ख़क्खियस तो बआ लगदस, "हाँ अक्कुन ई अम्मन हूँ तो ओनोन। हाँ, हाँ ओनका हूँ बोंगतओन, ओन ढोक केम अम्मन तो ओनोन" बाचस। तो अंड़िसयस आ ख़ाड़ गुसन तो ओन पसती ओनोन बाचस ती होच्चस ती, अदिन गा एःरादस ख़ेंसो मंज्जा केरा। ख़ेंसो होहो! बअदस, एंग्है करम किस्मत टेढ़ारका! बआ लगदस, "एंग्है गलती दिम हिके हाँ, अम्मद हूँ ख़ेंस मंज्जा केरा। तो बआ की आस ही करम किस्मत एवंदा टेढ़ा मंज्जा केरा।  ढेरेम टेढ़ा मंज्जा केरा। आस गे करम, हाय करम, हाय करम बअनुम आस फेर काला लगदस। सात समुन्दर सोरा धार, गंगा-जमुना, बईस धार अन्नेम जगहा अंड़िसयस केरस। तो,  पक्खे एःरा लगदस, अक्कु करम बेलासिन। एकदन जे आस खंइड्डका रहचस, एथरा लगी। पहें एन अक्कुन एकासे कट्टोन? ई कोहां समुन्दर नूँ।" तो असानिम आस चींख़ा लगदस, कलपारआ लगदस, गोहरारआ लगदस। पसतारआ लगदस। तंग्है बलका गजे, हव, तंग्है बलका गजे। ख़ंजलख़ो चुरूख़आ लगदस। हाँ, अनइत जोर जींख़ा लगदस। हाँ कलपार कलपार। तो भाई आद एकसन रओ?  धर्मेस गही कोरा नूँ बआ चआ धर्मे सी चाली नूँ। हाँ, आ करम बेलस। धर्मेस तंग्है चाली नूँ गड्डकाचस बआ। हाँ! भाई धर्मेस दिम गा दान हिके, आसी दिम गा उर्मी ई दुनियाँ बआ चिआ। हाँ तो असानिम आद रओ। चाली नूँ रहचा। तो, धर्मेस आसी कलपारनान् गोहरारनान् पसतारनान् ईरयस की आसी मंइय्या सोग्गे लग्गिया। तो बआ चिआ समुन्दर चाहे ख़ाड़ ता कोहा चीज बआ चिआ ओंटा मंग्गर हूँ मनी। मंग्गर? हाँ, हाँ, ख़ाड़ नूँ हूँ मनी। तो अदि निम धर्मेस तैय्यस। कला तो नीन आ कुक्को सीन आ आःलासीन ओंदरआ बरा। आसी अक्कु ई जियाद् कटिक गा सोझ मंज्जकी रअई। चींख़ा ओलख़ा लगदस। दया लग्गिया। तो मंग्गर आसी गुसन बरचा केरा। तो मंग्गर ही बरनान ईरयस ती आ बीरी हूँ इलिचयस नेहअन। पहें जे मनन् बाचस। परमान मोंख़न हाँ, हाँ। तो इंदरईम हूँ मनन् बाचस ती अंड़िसया केरा आसी गुसन समुन्दर गही धरीचनुम गा उक्का रअदस। तो आ मंग्गर बाचा, "बरा इन्ना निंग्गन कट्टओन चिओन, हाँ, हाँ, मंग्गर बआ लगी।" तो आद मेंज्जा, "नीन न्देर काला लगदय?" "एन करम बेलासिन बेद्दा काला लगदन। पहें इय्या कट्टा गे मसकिल मंज्जकी किरकी रअई। ई समुन्दर नूँ।"  हाँ तो मंग्गर बाचा, "बरा एन अंड़सतआदन चिअदन निंग्गन।"  तो अदही मंइय्यम आस अरगियस। सल, सल, सल, सलस सल, सल आद कट्टआचा चिच्चा। होच्चा केरा। आ करम बेलस गुसानिम। एन्देर हरजा हूँ मल मंज्जा। तइका रहचा तो एन्देर गे हरजा मना काओ। तो अंड़िसयस केरस। आस ख़ेड्ड मूली खत्तरस आ करम बेलासिन धरचीम ख़च्चियस। अंड़िसयस तेकर। हाँ, चींख़ा लगदस, ओलखा लगदस, पसतारआ लगदस, तंग्है गुन्हा कसूर गजे।  अदिन अम्बा हूँ मल अम्बा लगदस। तो आ बीरिम धर्मेस बअदस, "एःरा बबु, निंग्है बलका गही ख़ंजपा, निग्गा गजे ई बग्गे तपलीफ मंज्जा, निंग्ग गे सहना मंज्जा।" हाँ तो बाचस, "दव ले नंज्जकय, बरचकय केरकय। निंग्है पसतारनन् ईरकन। एंगागे हूँ सोग्गे लग्गिया।" धर्मेस बआ लगदस। " तो एन बरदनान नेआ लगदन बआ लगदस। एंग्है किस्मतन नीन बौरआ चिआ तबे एन इसतेक कओन" बआ हेल्लरस। तो धर्मेस बाचस, "दव रअई जिया अक्कु उजगो मंज्जा केरा तो ई कोड़हे तपलीफ करने नीन इसन अंड़िसकय केरकय तो निंग्गन एन  एकासे मल सहओन?  हव एकासे दव मल ननोन।" धर्मेस बाचस, "कला अक्कु निंग्है उर्मीदिम निन्दका मंज्जा केरा अक्कु निंग्गा एन्देर गे हूँ तपलीफ मल मनो।" आस बआ लगदस आ केरका आःलस "अना अंती धर्मे ओंटो घोड़ो रहचा।" बआ लगदस। "एन आ घोड़ो नूँ अरगा गे मंज्जकन ख़ने आद परमा-परमा मंज्जा। आद अरगा मल चिच्चा अउर एन ख़इड़दका आःलन ऱअदन, तो एकासे अन्ने गेच्छा कओन?  ख़ने धर्मेस बआदस, " कला आद निंगहै दिम हिके।" अक्कुन निंग्गन एःरो की आद अरगा चिओ, निंग्है करम बरओ" तो आसी गुस्ते कटी कुना कगरारदस ती फिन समझारदस! "हे धर्में" बआ लगदस, "अउरेच ओंटा खभइर रअई! डहरे नूँ मासी गदा रहचा, अदिन एन मोख़ागे नंज्जकन ख़ने बिहनीद् उर्मी दिम टुड़ुख़कन खी ईरकन, पोचगो अउर पोचगो जमादिम पोचगो मंज्जा केर। ईद एन्देर गे एन्ने मंज्जा?" तो धर्मेस बाचस आसिन, "एरा बअनर आःलर बरही-बहरी गा धर्मे-धर्मे भितरी ख़ोल्ला-कन्तो। मला? हाँ, तो नीन हूँ बरआ लइक्कय आ बीरी अदिन ईरकय। तो निंग्है जिया लग्ग्या। हाँ अक्कुन गा उड़ओन कओन। हाँ, अउर बई ती बआ लगदय हाय करम, हाय करम। पहें भितरी जिया नूँ निंग्है गा लग्गिया अक्कु गा उड़ओन कओन। ईसन अक्कुन मोंख़ोन इदिन। बड़ियर मनो कओन। नेखै मासी गदा रहचा, अदही फिकिर मल्ला हरजा मनो सोंच  दिम मल्ला जियान एरा लइक्कय।" तो फेर आसते कगरारस। ती फेर समझारआ लगदस, "ओन्टा गाय रहचा आ गाय हूँ दुदहीन मल ओना चिच्चा तो ईद एन्देर गे मंज्जा धर्मे? बआ लगदस। "हाँ, कला, आद निंग्है दिम हिके। उड़ुचलिंघआ ओनके। हाँ, द निंग्गन एन्देर हूँ मल ननो। ना चिओ।" तेकर फेर असते कादस, अदहा गेच्छा बरदस ती फेरेम समझारदस, "अउर ओंटा कत्था रअई बआ लगदस न। ओंटा छिरकस बाचका रहचस, नीन करम बेलस गुसन कादय, होले एंग्है खभरन हूँ तो तेंग्गके। ओन बित्ता कमड़ा रअई आद न घटरई न बढ़रई। हाँ, तो इदिन धर्मेस होओस का चिओस? हाँ, बेपरवाह रअदस नन्नर ही खेती गुट्ठीन हूँ मोख़दआदस। हाँ, मल बुझरदस कला बअके चिअके" बाचस, "अक्कुन गा रअई अदिन हूँ धर्मेस होओस कओस एन्दरा हूँ मल बछरओ।" तो "अच्छा" बाचस।  अक्कु धर्मेस गुसते चोचस। फेर अदहा गेच्छा बरदस की फेर समझकरदस, "अरे" बअदस। "अउर ओंटा आःलस खभइर तइकाचस। भाई आस हूँ डहरे नूँ एंग्गन मेनोस होले एन्दरन तेंग्गोन? फेरेच धर्मेस गुसन किर्रदस अरा बअदस, "हे धर्मे अउर ओन्टा खभइर रअई, तेंग्गोय होले गा बनओ। उव मेनोस हले एसे एन जबाब चिओन? एकासे आसीन तेंग्गोन?" "अच्छा तेंग्गा" बाचस। तो "ओंटा अहिरस रअदस बाचस की आसी गुसन एन्ने बग्गे बआ माल मवेसी रअई की आसी सही-बही मल्ला। गाय, बछरू, भैंस, हाँ, हाँ, जमा जात।"  तो "हाँ" बाचस धर्मेस "तेग्गोन आसीन हूँ आनके तो कला आसीन बअके" बाचस, "अक्कुन गा जुक्किम चिच्चका रआदस धर्मेस, बअके अउर निंग्गा गे चिओस। अउरेम चिओस, न्देर गे चिओन" धर्मेस बाचस, "आस दव आःलस रअदस। दान दच्छिना ननू आःलास हिकदस। आसी दिल साफ रअई। हाँ, आ बग्गे मना हूँ लगी आ गूटी आःलस दच्छिना चिआ लगदस, अन्नु हूँ आस ही परदा लगी। हाँ, तो आस ही गजे अउरेम चिओन" बाचस हाँ! तो फीन चोचस धर्मेस गुस्ते। फेरेच बआ लगदस फेरेच याद मंज्जा आसगे तो, अरे बआ लगदस, "ओटा मुक्का ही गा लिंडी नू कोहम कंडो असिगकी रअई। आद हूँ बाचकी रहचा की एंग्है खभरन हूँ होअके चिअके मेनके बरके। बिपत मंज्जा केरा।" तो बाचस धर्मेस गुसन फेरेच किर्रयस ती, "हे धर्मे" बआ लगदस, "अउरेच ओंटा कत्था रअई तो ईद एन्देर गे एन्ने मंज्जा? तो धर्मेस बआ लगदस, "नीन अदिन बअके" बाचस, " नीन ससुरन-भसुरन, कोहारिन, सन्नीरिन, बल्ला लक्की बअके ती ओन लाथ लथके।" मेंज्जस की आस कालगदस। ख़ने अउर याइद मंज्जा। अँवगे किर्रयस की फेरेम बआ लगदस, "की ओंटा खभइर अउरेच रहचा दने धर्मे, तो इदिन हूँ तिंग्गकय हले अजम दव मनो दने" तो धर्मेस बआ लगदस, "हाँ, तेंग्गा।" "तो ओरेत आःली अउरेच बाचकी रहचा आद ही कुक्क नूँ कोंहा बिरनी भुजड़ा कुन्दकी रअई, तो एंग्है खभरन हूँ मेनके बरके बाचकी रअई तो इदिन हूँ तेंग्गोय होले अनेत दव मनो दने" धर्मेस बआ लगदस, "हाँ, तेंग्गोन, तो अदिन बअके, "अँड़सके तेकर की नीन बने मल बागरदी-ख़ाँसरदी, छेतका नन्दी चुट्टिन, मने मल बेमरदी एन्देरगे? निंग्है कोहर रअनर, ससुरार रअनर, भसुरार रअनर, सुघड़ हेओय दने। बने कुलकुठरओय दने, बअके ती अदिन हूँ ओन लाथ लथके हले आ बिरनी भुचड़ाद हूँ हेबड़र्रओ कालो।" हाँ, बआदस, "अन्नेम ननोन" तो फेर धर्मेस गुसन बरदान नेआ लगदस। "अच्छा, ई बग्गे ननोन धर्मे पहें अकिल हूँ तेंग्गा करम बेलस एंग्है गुस्ते बोंग्गस केरस तो इदिन एन एकासे ननोन? तो बाचस, "कला साल भइर नूँ ओंगहोन, नीन ई करम डाड़न गड़के, पूजा ननके अउर खूड़ी ता आःलारिन हूँ ओंतआके-मोख़तआके। ओर्मा ख़द्द-खर्रर गने दव मेल अउर प्रेम ती रअके" समझआदस धर्मेस। हाँ, तो आस बाचस, "हाँ, धर्मे ननोन इन्ना नीन एंग्गागे एते कोहां बरदान चिच्चकय" बाचस। तो आस अक्कु उर्खस असते खुशी-राजी ती, रिझ ती एन्देर गजे गे आसी उर्मी गा अक्कु दव मना लगी, मेट्टरा केरा, हाँ तो आ मंग्गरदिम सल, सल, सल सल, सल, सल, सल पार नंज्जा चिच्चा। आ मंग्गरदिम हाँ, तो आसगे गा किर्रदस ख़ने रिझ लग्गा लगी। खुसमारआ लगदस ख़क्खरा केरा धर्मेस गही बरदान, ख़इक्कन बआदस।" भाई सात समुन्दर पार, सोरा धार, गॉगी-जमुना बईस धारन, आस कट्टियस अउर फिन बरआ लगदस, तो आस गे खुसी मल लग्गो?  हाँ तो पार मंज्जस ती आ मंग्गर तिम बआ लगी, "ओंटा पखना बेद्दा हाँ, अरा आ पखना ती एंग्है कुक्कन पसआ बाचा।" हाँ, हाँ, तो अन्नेम नंज्जस। आस ओंटा पखना बिद्दयस, आ पखनान धरचस ती आद ही कुक्कन पस्सस। आ बीरी एन्देर बओय, हिरा अउर चाँदी, सोना उर मोती, आद ही कुक्क ती उर्खा केरा। अदिन ईरयस ती गा आसी गजे अनइत कोड़हे खुशी मंज्जा केरा। हाँ खुशी निन्दिया केरा। अक्कुगा ख़इक्कन एंग्है जीज-मुट्ठिन धन-दौलत। तो आ बीरिम मंग्गरद् बआ लगी, "कला, निंग्गा गे उर्मी ख़क्खरओ, निंग्है ख़ल्ल उखड़ी रअई, उइके-ख़ोतके, ढेला-ढेलीन पसके, एकासे एंग्गन पस्सकय अन्नेम अरा ख़ेस्से चाँख़के। निंग्ग धन-खुर्जी खरा बग्गे ख़क्खरओ काओ" जको जात अरा नन्नारीन हूँ अन्नेम सिखाबअके।" हाँ बाचस, "अन्नेम ननोन" बाचस।

     तो काला हेल्लरस, घोड़ोद क्कु हिन-हिनरआ लगी। जी, हों, हों, हों, हों, हों, बआ लगी, आसी तरा बरआ लगी न? तो भाई धर्मेस बाचकाचस आद गा उर्मी अन्न्म मना लगिया। खुशी लग्गा लगी। हाँ, खुशी लग्गा लगी तो अक्कु अर्गियस केरस, अइय्या न? घोड़ो नूँ। तो ख़ाड गुसन गा अंड़िसयस। हाँ, ती आ उल्ला ती मल ओंड्डका आःलस, हाई कीड़ा ओनका हाँ, तो बाचस, "हाँ, अक्कु एंगहै नसीब मंज्जा बआ लगदस, एऩ मुरूक अम्म ओनोन बआ लगदस। हाँ, हाँ,हाँ, " तन हो सुन्दर," बआ लगदस, "मन हो सुंदर" बआदस। "शरीर का अंग-अंग हो सुन्दर" बआ लगदस। "घर का कोना-कोना सुन्दर" बआदस। हाँ उर्मीदिम सुदेर बआ लगदस मला? हाँ तो आस अम्म ओंड्स, अच्छा इसन छिटआ चिआ कटिक मला? "हाँ हरी गंगा फरी पानी, "बआ लगदस हाँ मुरूक ओंडस कूल उड़आ ती अस्ते अक्कु आस काला लगदस। आस गे दम दिलासा उर्मी बरचा केरा अक्कु आसी जिया नू सलसंत मंज्जा केरा बआ। तो अक्कु अंड़िसयस केरस मासी गदा गुसन अउला ती गा अउर बग्गे हरीयर। कोंहा-कोंहा गदा ख़ंजपा। हाँ, तो असन आस अंडिसयस अदिन मोंख़ा लगदस बआ नगद कूल उड़आ। मोक्खस की उड़चस केरस। अच्छा आसी खोराक हूँ पूरा मंज्जा केरा। छिटआ चिआ कटिक करम बेलस गुसन आस गे नसीबबहुरारआ लगी तो अस्ते कानुम-कगानुम, आ गाय गुसन अंड़सा लगदस। तो मुंदहूं तिम आ गायद गा ओंतआ लगी बछरून। बआ लगदस, "हाँ अक्कु बनचा केन्दोर, हाँ मासी गदनान हूँ मोक्कन अत्तु हूँ उड़चकादन। तो इदिन हूँ ओन्दन।" अत्ती आचास तो आद बआ लगी, "बरा बछरू बआ लगी, बासीन। एंग्है बछरूदिम हकदय। नीन हले एन्देर गे निंग्है जिया अक्कु बछरू लेक्खा मंज्जा केरा।" तो अदिन हूँ ओंड्डस अक्कु कूल उड़आ हाँ, बीनयस ती, अच्छा इसन, हूँ छिटआ चिआ। कटिक करम बेलासिन, तीख़िल बी छिटआ चिआ। तो असते केरस कालते-कालते-कालते-कालते आ एड़ा ख़ापुस गुसन अंड़िसयस। हाँ, तो आसीन बरना ईरयस, गेच्छातिम बआ लगदस, "हाँ, अक्कु अंड़सा लगदस। एंग्है खभरगा ओंदरआ लगदस।" आस गे हूँ आ बीरी गा लग्गा लगी, हाँ आसरा हूँ लग्गा लगी, ओंदरअम लगदस तो अंड़सयस ती आस मेना लगदस, "अना ले एकासे खभइर ओंदरकय ले? हाँ ले, ओंदोरकन ले? बआ लगदस, "ओंदरआ गा ओंदरकन पहें एकासे बओय? अरे जे ओंदरकय, तेंग्गा तो, "बआ लगदस, "दुक्ख चाहे सुख!" तो बआ लगदस, "धर्मेस तिंग्गयस की निंग्गा गजे जे रअई अदिन अउर होओन बाचका रअदस। एन्देर गे निंग्है जिया उजगो मल्ला, नीन जम जंहड़ी आःलय तलदय, मल समझारदय, निंग्है मनेनुम नीन रअदय। हाँ निंग्है जहड़ी नू रअदय" बाचस। "ओहो बआ लगदस। ईद गा अनइत कोहां बिपाइत मंज्जा केरा अरा बिगड़ारा केरा" बआ लगदस।

     हाँ, तो आसीन तिंग्गयस की फेरकाला लगदस कालते-कालते-कालते-कालते अक्कु अंड़िसयस केरस आ अहीरस गुसन। गाय ख़ापू, भैंस ख़ापू अहीरस गुसन अंड़िसयस। हाँ, अक्कु घोड़ो नूँ नगद सपड़ारस, पखड़ारस ती मुरूक दव, अउला गा धुंधुरमुंहां काला लियस न? इन्ना गा मुरूक बिलचा लगदस। हाँ अजम रिझ जिया ती बरआ लगदस ती बआ लगदस, "अना ले एंग्है खभरन हूँ ओंदरकय ले" बआ लगदस, "हाँ" ओंदरकन। तो एकासे बाचस? एकासे ओंदरकय ले? तो धर्मेस बाचस, "निंग्गा गजे अउर चिओन" बाचस। "अक्कुन गा जुक्कम रअई" बाचस, "अउरेम चिओन दू-तीन गुना।" ख़ने गड़ियस समझारदस "ठउकम बाचकय ले" हाँ भगवान देता है, इदानिम बअनर बाचस मला? नेकागे धर्मेस चिअदस आसगे मेसगन चलखदस की चिअदस! हाँ एःरा ओरतोस हीन होच्चस केरस अउर इसगे अउरेच चिआ लगदस, हाँ, एन्देर गै, ईस सोझहा आःलस रहचस दान तकछिना ननु आःलस रहचस। अँवगे धर्मेस ईस गजे, अउर बरदान चिच्चस। तो छिटआ चिआ करम बेलस इत्तका रअदस इन्ना ओर्मर गे एन्नेम बरदान चिअन नेकअन मला? हाँ, तो असते फेरप काला लगदस, कालते-कालते-कालते अंड़िसयस एकसन अक्कु। अ जटा-मटा मुक्का गुसन? हाँ, तो आद हूँ हाय सोह, हाय सोह, हाय सोह मना लगी तब।  हाँ, एका उल्ला बरओस बआ लगी। एन्देर खभइर ओंदरओस आद गजे गा आफत मंज्जकी रअई। उर्मीन्ती कोंहा जटा-मटा रहचा बआ रटपटरआ। माने की बआ चिआ न बली नूँ उर्खा ओंग्गी न ओक्का गजे सल्ल रअई न चूता गजेम सल्ल एन्देरनूँ हूँ मल्ला। तो आद बग्गे फिकिर नना लगी। हाँ घोंखनुम रअचा की का उल्ला ई आःलस बरओस दने, एंगहै खभरन तेंग्गोस दने। तो अंड़िसयस, आद हूँ सुपट भेंटारा। हाँ एःरा लगी आस अंड़सा गा लगदस, एन्देर खभर ईस गा तेंग्गोस बआ लगी। अंड़िसयस तो बआ लगी आद, "अना बबु एंग्है खभरन ओंदरआदय बबु? "हाँ" बाचस, "ओंदरआ लगदन। हाँ, तेंग्ग अंती, हाँ तेंग्गोन, बाचस, "सन्नीतिम कोंहारिन बलदी नीन, एका बारी कंडो ख़क्खरा कंडो नुम ओकदी, मंचिला ख़कखरा, मंचिलानुम ओक्कदी, ख़ी ख़क्खरा ख़ी नुम ओक्कदी। हाँ, तो नीन मल मनआ लगदी न जइतारिन मनआ लगदी, न परजातन।

    हाँ, होन्ने बाचस ती ले लिंडी गुसानिम लथचस ले! फटाक के हेबड़रा केरा कंडोद दे! उर्खा दरा केरा आद ही दुक्ख तपलीफ गा बोंग्गा केरा बआ। हाँ, तो अच्छा छिटआ चिआ। हाँ आद हूँ बंचम केरा ना। हाँ, तो असते फेर चल्लरस। कालते-कालते-कालते अउर ओंटा रटापटा मुक्का गुसन, अंड़िसयस न। अंड़सा लगदस तो आद हूँ गेच्छातिम पाब एःरा लगी अक्कुन अंड़सा लगदस जटा-मटा मुक्का गुसन आदही कुक्क नूँ एन्देर गे बिरनी भुचड़ा रअई। हाँ, इदा एन्देर गे हूँ आद गेसंच मल्ला कय साल, कय दिन आद मल बागरकीचा, मल खांसरकीचा। हाँ, अउर आद आःलर गुसन हूँ इजआ न ओक्का मल लगिया। एन्देर गे जे आद गे लज्जे मना लिया तो अंड़िसया की बआ लगी आद, "अना बबु एंगहै खबरन ओंदरकय बबु? हाँ, बआ लगदस, "ओंदोरकन।" तो तेंग्गा तो एकासे खभर ओंदोरकय रअदय। हाँ, बाचस, "तेंग्गोन" तो बआ लगदस अदिन, "एराय, नीन ससुरारिन बल्ला लगदी भसुरारिन बल्ला लगदी, हाँ, निंग्है चुट्टी गुट्ठिन मल बने बेमरदी, मल नीन खोपा संइतआदी। हाँ, अरा नीन मल कुलकुठुरदी, हाँस सन्नी कोंहांरिन बलदी" बआ लगदस। हाँ, तो एन्नेम बाचस ती ले एसा लथनी लथचस हेबेड़रा केरा बिरनी भुचड़ाद् हेबेड़रा केरा। आ मुक्का गा बेड़रा काला लिया। ळथचइसचास बेड़रोदिम दुरू! बिरनी भुचड़ा इकला एस्ता धरचका! हाँ लथनी लथचस हेबड़रा केरा बिरनी भुचड़ा आद गे हइलका मंज्जा केरा। नेबमबा मंज्जा केरा। "हाँ" बबु बआ लगी कमचकय केंदहोर?" हाँ चेमचेम न मंज्जा केरा कुक्कद् "हाँ बबु बआ लगी, कमचकय केंदरहोर बबु हाँ" तो भाई अस्ते चल्लरस अक्कु न? अक्कु गा आद गे रिझ लग्गा लगी, हाँ होले इदही नामे ती कटिक तीख़िल छिटआ चिआ इन्ना? हाँ, तीख़िल! हाँ आद गे कोड़हेम तपलीफ रहचा, हाँ लेगा हाँ करम बेलस इत्तका रअदस छिटआ चिआ, हाँ, हाँ। तो अस्ते चल्लरदस हाँ, एड़पा पली मल केरस भाई आस गही बग्गे फिकिर तंग्है समान नूँ रहचा। हाँ अउर आदिम आसगे फिकिर रहचा।

     तो तंग्है आलोद् गुसन अंड़िसयस केरस आस। तो एःरा लगदस, जइस का तस! अन्नेम मंज्जा केरा हाँ, बदलारा केरा। हाँ अड्डो गुट्ठी पखना मंज्जकीचा, बोरा बिस्तरा पखना मंज्जकीचा, छिप्पा लोटा उरमी दिम आद अक्कु जइस का तस मंज्जा केरा। अड्डो हूँ उज्जिया केरा। हाँ अड्डो मंज्जा केरा। बोर बिस्तरा मंज्जा केरा। हाँ, तो आसगे खुशी लग्गा लगी। हाँ, तो आस बाचस, "इन्ना एंगहै करम बहुरारा किर्रया" बाचस। हाँ, तो करम गजे कटिक तीख़िल ठिटआ चिआ। मला ईद हों जबर कोंहा धर्मेस ही दया मंज्जा। तेकर एड़पा अंड़सदस हाँ. एड़पा अंड़सदस तेकर धर्मेस ही बाचका लेक्खा आस करम बेलासिन तंग्है गुसन गड़दस अरा आसही सेवा नंदस पूजा नंदस अरा ओरम भाईर बंधुर अरा सात गुतनीर, मेल अरा प्रेम ती करम बेलस गही सेवा अरा पूजा नना लगनर, अरा आर खुशी ती उज्जा अरा बिज्जा लगनर। हाँ, तो धर्मेस जे आसीन बाचका रहचस आद उर्मी अक्कु किर्रया केरा। पूरा मंज्जा अरा करम बेलस हूँ इत्तियस केरस। बहुरारा केरा तो इसन तीख़िल, बी, कटिक ओर्मर छिटआ चिआ मला। हाँ, करम बेलस अक्कु इत्तियस केरस। हाँ, र्मर अक्कु खुशी मना बआ लगनर। अरा जे समान रहचा अबड़ानिम ओर्मर गे ख़टिटियस अरा बेचा लगनर तोका लगनर अरा रिझ-रंग मना बआ लगनर।

     हे करम बेलय ओर्मर गे एन बरदान नेआ लगदन, ओरमर ही लरदान नीन पूरा ननके, नेका गजे धन दौलत मल्ला, आरगे धन दौलत चिअके। नेका गजे ख़द्द-खर्रर मल्लर आर गजे ख़द्द-ख़र्रा चिअके। इली नूँ कुची नूँ गली नूँ बाटे नूँ ख़ल्ल नूँ उखड़ी नूँ एड़पा नूँ पाली नूँ, हाँ चिअके करम बेलय निंगहै जय जय मना नेकआ।

   टूड़ा | पइत टूड़का | खीरी | डण्डी | नन्ना गुट्ठी | तोलोङ सिकि नू टूड़का कत्थूड़ा

तंगआ कत्थन, उज्जना-पर्दनान, नेग-चारन् अरा अइनान जईपुईर गे ख़ोजा-पर्दआ।

 

   बखनी(विज्ञापन)

कुँड़ुख़ कत्था नूँ मुन्ता जल्ली अड्डा, एकन्नू अनइत बग्गे कुँड़ूख़ अरा नंना कत्थूड़ा(साहित्य) गुट्ठी चीतारकी रई। ई जल्ली अड्डा गही निस्ठा(लक्षय)) कुँड़ूख़ कत्था अरा उजपर्दन्(संसकृति) परदआना अरा सहजआना (प्रोत्साहन) तली।
कुँड़ुख़ कत्था नूँ एम्बा सारदय अरा नीन हूँ ई जल्ली  अड्डा नूँ तंगआ टूड़कन नन्ना कुँड़ख़र गुसन् चाँख़आ बेद्दय होले अक्कुनिम     पुथि नू नामे अर्गत'......?

आदिबासी कड़ी गुट्ठी

बेल्ख़ान्ता धरम्