बक्-ख़ोर

 

सौंसे बेल्ख़ा नूँ मुन्ता कुँड़ुख़ जल्ली अड्डा!

 
   

 

नीन ईसन् रअदय : मूद्ध पन्ना > कुँडूख़ कत्थूड़ा > देवनागरी > खीरी(कहानी)

निगनिगरका

खीरी

अँधरी पच्चो अरा कुबड़ा नतियस
करम खीरी (1)
बिति-डण्डा
मतवारस गही दसा
करम खीरी (2)
धरमुस बिट्ठी केरस
उला ता आलो गही मुल्ली
पचबा-आःलर
जुटुरना नूँ सवंग रई
भड़ा गही अड्डो
 
अउर बग्गे खीरी....

एन्नेम लेखा कड़ी
हिन्दी कत्थूड़ा
अँग्रजी कत्थूड़ा
ख़द्द कत्थूड़ा

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

       टूड़ा | पइत टूड़का | खीरी | डण्डी | नन्ना गुट्ठी | तोलोङ सिकि नू टूड़का कत्थूड़ा

 

बिति-डंडा

प्रेमचन्दस गही नामजद्दी खीःरी गुली-डंडा गही कुँड़ख़ बिड़िदका

नेम्हस एक्का

नम्है अँग्रेज संगियर इंजिरओर चाहे मला एन गा इदिम बओन का बिति-डंडा उर्मी बेच(ना) गही बेल तली। अक्कुन हूँ एकअम बीरी चेंड़ा ख़द्दारिन बिति-डंडा बेचना एःरदन होले जिया आर गने कालर बेचागे उबकारआ हेलेरई। न टोंका गही चाड़े, न जरगा गही, न जल्ली गही अरा न फोटा(बल्ला)गही। रिझिरनुम एकअम मन्न ता ओन्टे चुन्दिन तारअर बिति कमआ चिआ अरा एंड़ झन आःलार ख़ोंड़रर होले बेच हेलेरआ।

      अँग्रेजी बेच नूँ ओंटा महबा इद रई, का अदी गही कमहड़ अजगड़ महंगा मनी। एवंदा गूटी जुक्की ती जुक्की ओन्द दयदोय ढिबा मल खरच ननोय, बेचुर गही जिया मल साली। बिति-डंडा बेगर खरचनुम अजगड़ रिझिरनन् चिई; अन्नु हूँ नाम अँग्रेजी आलो घी ख़ोख़ा एन्ने भोंगा लगदत का नम्है उर्मी आलो नूँ रिझ दिम मल एथेरई। लूरकुड़िया नूँ ओर्मा बंचऊ कुक्कोर गही ख़ोख़ा मूँद-नाख़ ढिबा, रोटओ बेचना गही मुल्ली चिअना मनी। नेक्खअय बुता हूँ नलख मल ननी, का आर हिन्दुस्तान ता बेच बोचतओर; एकदा बेगर ढिबा-मुल्ली गही बेचतारई। अँग्रेजी बेच गा आर गही तली, नेखअय गुसन खुर्जी पट्टी ख़ोपोरनिंगआ रई। कीड़र गही कुक्क नूँ एन्देर गे इ हेभेरनान थोपअर चिरखी चिआ लगदद्? ईद ठउकम रई, का बिति-डंडा ती कुक्क, ख़न्न ख़ोटोरना  गही इलिचका बनल रई। पहें एन्देर किरकेट तरू कुक्क ख़ोटोरना, पिपनी एटेरना अरा ख़ेड्ड एसेरना गही इलिचका मल्ला? अगर नम्है कपड़े नू बिति गही चिन्हाँ इन्ना गूटी बन्चकी रई, अवन्ती जोक्क नम्है संगियर एन्ने हूँ रअनर ने फोटन उदुरना गही डंडा कमचकर बेअनर। ईद गा तंगआ-तंगआ पसिंदआना गही कत्था  तली। पंहकन एंगा गे गा बिति-डंडा उर्मी बेच ती बग्गे दव लग्गी; अर सुमुरआदन होले ख़द्द परिया ता बिति दिम उर्मीन्ती एम्बा लग्गी।

      आ पइरी एड़पा ती उर्खना काना, आ मन्न नूँ अरगर चुन्दीन तारना दरा बिता-डंडा कमना, आ रिझिरना, आ बेचुर गही खोंडोरका, आ गुड़ना अरा गुड़तआना, आ पछड़ा बेचना, आ लुदऊ चालो, एकन्नू छुतका मल रहचा, धनगर का कीड़र गही छिंड्डना-खंड्डना हूँ मल रहचा, अन्नू खुर्जी गही बड़गवारी, एःदना, इतरारना गुट्ठी गा रअम मल रहचा। इबड़ा याईद तबेम मोधोरतारओ जबे.....। एड़पा ता आःलार खिंतारआलनर, बबस खटी नूँ उक्कियस दरा असमा नूँ तंग्है खिंसन ओछोरआलदस, अयो गही बोंग्गना दुरा गेच्छा रोटओ रई; पहें अदी गही ओड़गना नूँ एंग्है बरऊ उज्जना, एसेरका डोंगा बेसे हिलो-डोलो मना ली, अरा एन रअदन का बेचना नुम लइक'क्कन रअदन, न एमना गही तिरहा, न मोंख़ना-ओन्नो गही। बिति गा रई सन्नीकुन, पहें अइय्या सौंसे ख़ेंख़ेल ता तीःनी रासी गही एम्बा अरा एःरना-एदना गही रिझिरना समसारकी रई।

       एंग्है संगियर नूँ ओन्टे गया नामें गही कुक्कोस रहचस। आस एंगती एंड़-मूँद चान कोगहा रहचस होंतन। खुया बंदरा बेसे दिगहा-दिगहा, चिरंगा-चिरंगा अँगली, बंदरा बेसे लम्बर-लुम्बुर मंना अरा कुन्दुर-मुन्दुरना। बिति संन्निम रओ, पहें एन्ने उछलारआ लगिया, एका लेक्खा टेटेंगा बोक्खोन एःरार उछलारई। एन्देर अख़ओय आस गही तंगयो तम्बर रहचर का मला, एकसन रआ लगियस, एन्दरन मोंख़ा-ओना लगियस, पंहकन एम्है बिति बेचू खोंड़हन्ता ओर्मारिन जितऊ(चैम्पियन) रहचस। एका चोक्ख आस रआ लगियस आर गही जीत उयकम रआ लगिया। एम ओर्मम् आस गही बरनन् एःरार बोंगनुम आसिन परिछआ लक्कम अरा आसिन चौगुड़दी घेरआ चिआ लक्कम।

      उन्दुल एन अरा गयास इर्बम् इकला बिति बेचा लक्कम. आस खेप बेचा लगियस। एन गुड़आ लक्कन, पहेंस ओन्टा अचरज कत्था रई, का एम खेप बेचना नूँ गोट्टे उल्ला लक्का लआ ओंगदम, गुड़आ गे ओन्द मिनिट हूँ मल साला लगिया। एन गुड़ना ती बछरआ गे अजगड़ चालो बीचकन; एकदा एन्ने बेड़ा नूँ धरम पुथि मल रअनु हूँ छेमा जोगे रई, पहें गयास तंग्है खेपन् बेगर पुराबाचका मल अम्बा लगियस।

     एन एड़पा तरा भोंकन। गोहरा बिनती गही एन्देर फरक हूँ मल मन्जा। गयास एंगन बोंगर धरचस अरा डंडन एःदनुम बाचस - "एंग्है खेपन पुराबआ चिआ तले कालोय। तंगआ खेप बेचो बीरी गा शूरबीरार बेसे मन्दय, गुड़ओ बीरी एन्देर गे भोंगदय।"

     "नीन गोट्टे उल्ला गुड़तओय होले गुड़नुम रओन का?"

     "हाँ, निंगा गोट्टो उल्ला गुड़नम मनो।"

     "ओना-मोंख़ा हूँ मल कालोन?"

     "हाँ, एंग्है गुड़त्आना मुन्जुरना ती मूँद एकसन हूँ काला पोलदय।"

     "एन निंग्है नोकर तलदन का?"

     "हाँ, नीन एंग्है नोकर दिम तलदय।"

     "एन एड़पा कालदन, एःरदन एंग्गन एन्देर नना ओंग्गदय।"

     "एड़पा एकासे कओय, एन्देर हीहीकोकोर हीके; एंग्है खेप हीके, गुड़नम मनो।"

     "दव, चेरो निंग्गन टमरस मोख़ताचकन रहचकन; अदिन किरतआ चिआ।"

     "आद गा कूल नूँ कोरचा केरा।"

     "कूल ती ओथोरआ; नीन एन्देर गे एंग्है टमरसन् मोक्कय?"

     "टमरस नीन चिच्चकय, तबेम जुनु मोक्कन्। एन निंगती नेआ मल केरकन रहचकन।"

     "एंव गूटी नीन एंग्है टमरसन मल किरतओय, अवं गूटी एन निंगती मल गुड़ओन।"

एन घोकचकन नेवई एंगतरम रई। अखिर एन तंगआ फअदा गेम आसिन टमरस मोंख़ताचकन हुतय। ने बेगर फएदा नेकआगेम एन्देरइम ननी। तेम्बुर गे हूँ गा आःलार तंगआ नफन एःरार किम चिअनर। गयास एंग्है टमरस मोक्खस, इ चड्डे आस गे एंग्गन गुड़तअना गही एन्देर अदिया रई। घूस चिअर गा आःलार ख़ेंसन हूँ पचा बअनर चिअनर, इस एंग्है टमरसन् अएंधअम पचा बओस चिओस? टमरस पंचे पइसा गही रहचा, एकदा गयास गही तम्बस गे हूँ मल ख़क्खरआ ओंगो। ईद मानिम नेवई  मल रहचा।

गयास एंग्गन तंग्है तरा नतगनुम बाचस - "एंग्गन खेप बेचा चिआ, टमरस-फमरस एन बलदन।"

     एंगनु निसाब ख़क्खना गही सवंग रहचा। आस एंगन अरबना नूँ लक्कम रहचस। एन तंगआ ख़ेक्खन हिंचिड़आ बेद्दा लक्कन। आस एंगन काला मल चिआ लगियस। आसिन एन केप्पकन। आस एंगन अदी ती बग्गे केप्पस, अरा रोटओ मल केप्पस, ओन्द चटका हूँ ची लघचस।

     एन आसिन पल्ल ती परमकन चिच्चकन। आस एंग्है मेःदन डंडा ती लवचस। एन चिचयारआ हेलेरकन। एंग्है इ कमहड़ ती गयास पोल्लस जितआ। एन तपड़ेम ख़ंजलख़ोन चींचीरकन। डंडा गही नुंजनन् मोधोरकन अरा अल्खनुम एड़पा कालागे हुड़यारकन। एन दरोगास गही ख़द्दन ओन्टो सन्नी जइतस गही ख़द्दस ती मइर मोक्कन, ईद चिया नूँ मल सालिया। पहें एड़पा नूँ नेखअय गुसन हूँ गुन्हा मल ठेकाबाचकन।

      आ उल्ला नुम एम्बस गही बदली नंना अड्डा मन्जा केरा।  पुना राजी एःरना गही खुशमारना ती एन्ने फुलुरकन, का तंगआ संग्गेर ती छिंडिरना गही दुःखे हूँ मल लग्गिया। एम्बस दुःखे सारआ लगियस। आ अड्डा खुर्जी ख़ोंड़ना गही कोहा अड्डा रहचा। इंग्यो हूँ कोलम मना लगिया, एन्देर गे का उर्मी दिम असन जुक्किनुम ख़क्खरआ लगिया, अरबर-परबर ती घोरना बेसे मंज्जा केरा; पहें एन अजगड़ खुशमारआ लक्कन। एन कुक्कोर गुसन बड़गवारी कच्छनखरअर बआ लक्कन, असन एन्ने एड़पा थुड़ी रई। असन गा एन्ने-एन्ने मेच्छा पटोत एड़पा रई, एकदा लील बेल्ख़ा ती कछनखरई। असला अँग्रेजी लूरकुड़िया ता बंचतऊस कुक्कोरिन लओस, होले आस गे एड़ेख़ एड़पा नूँ काना मनो कालो। एंग्है संग्गेर गही कोहा-कोहा एःरना अरा अचरच मुँहटद् तेंगा लगिया, का आर गही एःरना नूँ एन एवंदा कोहा रहचकन। एन्ने लग्गा लगिया का आर बआ लगियर - "नीन झकमे तलदय भइयो, कला! एमागे गा इ लंगआ-तंगआ पद्दा नुम एकना-उज्जना रई।"

      एनदोय बखर बीतचा केरा। एन इंजिनियरिंग पास नंज्जकन दरा आ जिला गही दिम सरकारी बहरा कुद्दनुम आ पद्दम् अंड़िसकन। अरा असला डाक बंगला नूँ ठार होच्चकन। आ अड्डन एःरार किम ख़द्द परियन सुमुरआ हेलेरकन। तलेकन टेम्पन चोदअर पद्दा नूँ कुद्दा-नुंग्गा हेलेरकन। एंग्है ख़न्न एकअम ओनका सारका डहरे ईकुस बेसे ख़द्द परिया ता आ बेचना अड्डन् एःरागे अंधवारआ हेल्लरा। पहें असन आ चिन्हर नामे ती नंना एन्दरा हूँ चिन्हर मल लग्गया। एकसन ढसरका खंदहा गुट्ठी रहचा। असन पका एड़पा ठिमठिम इज्जकी रहचा। अड्डा चुड़चुड़ बिड़दिर ख़च्चकी रहचा। एंग गुसन असला अड्डा घी नामे अरा नक्सा मल रहचका होले गा एन अदिन चिन्अम पोल्लोन पंहेस। खद्द परिया ता पटाबाचका अरा उर्मी उल्ला गे ख़ोपोरख़ोला याईद, ख़ेक्खन कोल्लर तंगआ पच्चा संग्गेर गने ख़ेंवचरआ गे उफड़ारआ लगिया। एन्ने लग्गा लगिया का आ ख़ेंख़ेलन ख़ेवचर चिंख़ोन दरा बओन, नीन एंगन मोधोरकी किरकी। एन गा निंग्है आ मुँहटन दिम एःरा बेद्दन।

     अचक्का एन ओंटे फाँक अड्डा नूँ एंड़-मूँद कुक्को रिन बिति-डंडा बेचना ईरकन। जोक्क गंहड़ी गा एन तंगअन दिम मोधोरकन केरकन। मोधोरकन केरकन का एन ओंटा कोहा ओफिसर तलदन, ओफिसरी अत्तना-पुन्दुरना नूँ, हुकुम तिगाबअना नूँ अरा कोहा अदिया ख़क्खका आःल तलदन। हेद्दे अंड़सर ओंटे चेंड़ा कुक्कोसिन मेंज्जकन - "अन् ख़द्दय, इसन नेकइम गया नामे घी आःलस रअदस का?" ओंटे कुक्कोस बिति-डंडन् ख़ोजनुम एल्चा-एल्चा बरचस, तले आनियस - "एका गयास? आ गया चमारस?" एंग्है बई ती अएंधअम उर्खा केरा - "हाँ आसिम। गया नामे गही अगर नेकइम रअदस होले? आसिम तइलदस होंतन।"

    "हाँ, रअस गा।"

    "एन्देर नीम आसिन मेंख़ा ओंग्गोर?"

कुक्कोस भोंगनुम केरस अरा ओंटे पंचे ख़ेक्खा दिगहा मोख़ारो गोसाईं सिन ओन्दोरनुम बरऊ एत्थरस। एन गेच्छातिम आसिन चिन्हचकन। एन आस गही छती नूँ ख़ेंओचरअर दरा चींख़ोन बेसे लग्गा लगिया; पहें जोक ओड़कअर छछेम रहय केरकन। बाचकन - "बआ गया एंग्गन चिन्हआलदय?"

    गयास नेओख़रअर एंग्गन मोंजरा नंज्जस - "हाँ, उर्बय, एन्देर गे मल चिन्ओन का!"

    "नीन दव ले रअदय?"

    "अजगुत दव! नीन निंग्हैन तेंगा।"

    "डिप्टी सहेबस गही ससरन तलदन।"

    "मतई, मोहन अरा दुर्गा गुट्ठीयर एकसन रअनर? एन्देरइम खबइर रई?"

    "मतईस गा केच्चस केरस, दुर्गास अरा मोहनस इर्बर चिट्ठी ख़ट्टू मंज्जकर बेएनर। नीन?"

    "एन गा जिला इंजिनियर तलदन।"

    "सरकारस, गा मूँद तिम कोहा आःल रहचस?"

    "अक्कु एकअम बीरी बिति-डंडा बेचदय?"

गयास एंग्है तरा मेंञ्ज निन्दका ख़न्न ती ईरयस - "अक्कु बिति-डंडा एन्देर बेचो सरकार, अक्कु गा अनआ-मनआ धतम ती अवसान मल ख़क्खरई।"

    "बरा, इन्ना नीन-एन बेचोत, नीन बेचा एन गुड़ओन, निंग्है ओन्टो  खेप एंगनु बछरकी रई।"

गयास एकअम बेसे बेचा गे सपड़ारस। आस हीकदस ओन्द टका गही बनिस, एन ओंटे कोहा ओफिसर। एंग्है अरा आस गही एन्देर मेल? बेचारस लजरना ती कोकड़ारआ लगियस। पहें एंगा हूँ कोकड़ारना जुक्की मल रहचा, ईगे मला का एन  गयास ती बेचा काला लक्कन, पहें ईगे का आःलार इ बेचनान अचरज बुझुरअर एदऊ(तमाशा) कमओर चिओर अरा अनइत झूँड़ मनो कालो। आ झूँड़ नूँ अन्ने रिझ एकसन ख़क्खरओ, पहें बेगर बेचम गा एकसन रआ ओंगतारओ। मुन्जा नूँ रोजोट नंज्जकम का इर्बम पद्दा ती ढेर गेच्छा बेचोम अरा ख़द्द परिया ता आ एम्बन् खूब चीपा-चीपा मोंख़ोम। एन गयासिन डाक बंगला नूँ ओन्दोरअर बरचकन अरा फटफटिया नूँ ओक्कर इर्बम टोंका तरा काला हेलेरकम। संगे-संगे ओंटो टोंगए ले होच्चकम। एन परता लेक्खा घोख नूँ कोरोच ख़च्चकन। पहें गयास अक्कु गूटी इदिन हेलहेलेम समझारआ लगियस। अन्नु हूँ आस गही मुँही नूँ खुशमारना अरा रिझिरना गही एन्देर चिन्हाँ मल एथेरआ लगिया। मना ऊंगी आस एम्है मजही नूँ जे फरक मंजकी रहचा अदिनिम घोकआ लगियस होंतन।

    एन मेंञ्जकन - "नीन एकलअम एंग्गन सुमुरआ लक्कय गया? सचेम बअके।"

गयास कोकड़ारनुम बाचस - "एन निंग्गन एन्देर सुमुरओन उर्बय, एःरा एका बेसे रअदन? एंग्है कपड़े नूँ निंग संग्गे जोक्क उल्ला बेचना टुड़ुरकी रहचा, मला होले एंग्है एन्देर गिनती रई का?"

    एन कटिक कोलम मनर बाचकन - "पहें एन गा निंगन याईद नन्नुम रआ लक्कन। निंग्है आ डंडा एकत्ती नीन एंग्गन नतग्गकय दरा पस्सकय रहचकय, सुमुरआदय का मला?"

गयास पसतारनुम आनियस - "आद गा ख़द्द परिया रहचा उर्बय, अदी गही याईद अम्बा नन्तआ।"

     "बाह! आद एंग्है ख़द्द परिया ता उर्मिन्ती उमदा एम्बा सुमुरआना तली। निंग्है आ डंडा नूँ जे एम्बा रहचा, अदिन गा न मईन-मरयाद नूँ ख़क्खदन अउर न खुर्जी पट्टी नूँ।"

इवंदा गंहड़ी नूँ एम पद्दा ती अंड़सा-अंड़सी मूँद मील उरखकम केरकम। चौगुड़दी संति छाहचकी रहचा। उटुरनी तरा कोस गेच्छा पोखारी पसरारकी रई; एकसन एम बरअर कमला पूँप तोक्खा बरआ लइक्कम अरा अदी गही झुम्पा कमअर ख़ेबदा नूँ खोसोरआ लक्कम। जेट्ठे घली ता बीःड़ी पुत्तना, बीड़ीद् केंसारी नूँ मुलुख़की बरआ लगी। एन उछलारकन् दरा ओन्टे मन्न नूँ अरगकन अरा ओंटे चुन्दिन तारिकन। चाँड़े बिति-डंडा कमतारा केरा। बेःचना ओरे मंजा। बेचना एनिम ओरे नंज्जकन। एन गुचु नूँ बिति उयकन दरा  टेफए नंज्जकन। बिति गयास गही मूँदभारेन्ती उर्खा केरा। आस ख़ेक्खन लपकाचस, एकासे का इन्जो धरओ बीरी लपकारनर। बिति आस गही ख़ोख़ा केरा खत्तरा। ईस आ गयास दिम तलदस नेखअय ख़ेक्खा नूँ बिति तान-तानिम बरआ कोरआ लगिया। तीना-डेब्बा एकअम तरती कालो बिति आस गही ख़ेक्खा नुम कोरआ लगिया। एकासे का बितिन साधचका रहचा। पुना बिति, पच्चा बिति,  सन्नी बिति, कोहा बिति, सुंईतु बिति, समतर बिति, उर्मी बिति आस गही ख़ेक्खा नुम काला लगिया। एन्ने लग्गा लगिया का आस गही ख़ेक्खा नूँ एकअम नतगु-मंक्खु रआ लगिया, अरा आद बितिन् नतगा चिआ लगिया। पहें अक्कुन आस गही, बिति नूँ अवंदा चोन्हा मल्ला। बेचो बीरी एन आसिन अनआ-रितआ किसिम ती छकाबआ लक्कन। बेचना गही चिंहुट एन गेजआ-गेजआ पराबआ लक्कन। हुस(हुच) मंना ती हूँ डंडन लेई होआ लक्कन। अइन लेखा गयास गही खेप बरना रहचा। बिति नूँ गेजा लवरआ लगिया अरा आद तनिक गेच्छम खतरआ लगिया, एन गा झपटारअर पेसा चिआ लक्कन अरा फिन टेफए नंना लक्कन। गयास इबड़ा उर्मी गेजा बेचनान एःरा लगियस, पहें एन्देर हूँ मल बआ लगियस। एन्ने लग्गा लगिया का आस बेचना गही उर्मी अइनान मोधरस केरस। आस गही निसठा एवंदा सोझ रहचा का बिति आस गही ख़ेक्खा ती उर्खर टन सन् डंडा ती लग्गा लगिया। आस गही ख़ेक्खा ती उर्खर अदी गही धतम् रहचा डंडा ती बजड़ारना, पहें इन्ना आ बिति डंडा नूँ लग्गम मल लग्गा लगिया। एकअम बीरी डेब्बा तो एकअम बीरी मूँदभारे, तो ख़ोख़ा काला लगिया।

     अदहा ख़रख़ना(बजे) गूटी बेचना ख़ोख़ा ओंटे बिति डंडा नूँ बरचा दरा लग्गिय। एन गेजा नंज्जकन - "बिति डंडा नूँ मल लग्ग्या। चुड़चुड़ हेद्दे दी केरा, पहें पोल्ला लग्गा।

    गयास फिन एन्देर हूँ मल बाचस। आस इवंरम बाचस - "मल लग्गिया होंतन।"

    "डंडा नूँ लग्गना होले एन गेजओन पहंकन?"

    "मला भईयो, नीन एन्देर गे गेजओय?"

ख़द्द परिया नूँ हेलहेले रहचा का एन एन्ने गेजा बेचोन दरा उज्जा ओंगोन पहें। इ गयास दिम एंग्है घेचा नूँ अरगोस कालोस दने, पहें इन्ना एन आसिन एवंदा सेब्बा नुम गेजनुम काला लक्कन। गदहा रअदस। उर्मीन मोद्धरस केरस।

    अचका फिन बिति डंडा ती लग्गिया अरा इवंदा जोर से लग्गिया, एकासे का बन्दूक ती बिति छुटरई होले ख़रख़ी। इ सबूती घी मूँदभारे अक्कु एकअम किसिम गही गेजा नंना गही सवंग एंग गुसन मल रहचा, पहें फिन ओंगहोन एन्देर गे गेजा बेचर मल एरोन? इन्नु एन्देर नोकसान मनो। मनओस कालोस होले दव-दव, मला होले एंड़-नाख़ बेर गुड़नम जुनु मनो। ऊख़ा गही बहना ननर चाँड़ेम छोड़ाबओन चिओन। फिन ने खेप चिआ बरओ।

    गयास जितिचका गही खुशी ती चिच्यारस - "लग्गिया केरा, लग्गिया केरा। टन बाःचा।"

एन बलना मंना गही चिहुंट नंज्जकन दरा बाचकन - "नीन लग्गनन् ईरकय? एन गा मल ईरकन।"

    "टन बाचा, उर्बय।"

    "अउर मानिम इट्टा ती बजड़ारा हुतय तो?"

ई कत्था एंग्है बई ती एकासे फुटचा अदिन एऩ हूँ बलदन, इदी गही अचरज एंगा खुदेम रई। इ सत्तेन ठकना अन्नेम रहचा, एकासे उल्लन् मांख़ा बअना। एम इर्बस बितिन डंडा ती जोर से लग्गनन् ईरकम, पहें एंग्है कत्थन इंजिरस केरस।

    आस बाचस - "हाँ, एकअम ईट्टा नुम लग्गिया होंतन, उर्बय। डंडा नूँ लग्गना होले गा इवंदा मल सड्डो दने।"

एन फिन बिति बेचा हेलेरकन, पहें इवंदा सोजहे गेजा नंना गही ख़ोख़ा गयास गही अड्डोन ईरकन तले एंगा आस मईया सोग्गे लग्गा हेल्लरा। अँवगे एका बीरी मूँद खेंवाँ बिति डंडा नूँ लग्गिया, ख़ने एन सहजेम दुलार संगे आस गे बेचा गे चिअना ओड़गकन।

    गयास बाचस - "अक्कु गा ऊःख़ा मंजा केर भईया, अक्कु नेला बोचो।

एन घोकचक्न, नेला ढेर बेड़ा ख़खरओ, एन्देर अख़ओय नेला ईस एंगन एवंदा गंहड़ी गुड़तओस। अँवगे अक्कुनिम फरियआना चिअना दव मनो।

    "मला, मला। अक्कुन ढेर बिल्ली रई। नीन निंग्है खेपन् होआ।"

    "बिति मल एथेरओ।"

    "एन्देर दन्द हूँ मल्ला।"

गयास बेचा घुड़ियारस. पहें अक्कु आस ओंटा हूँ हेभेरका मल रहचस। आस एंड़ खेप टेफए नंना बिद्दयस, पहें एंड़ो बेर आस दव ले टेफए पोल्लस नना। ओन्दे मिनिट नूँ आस तंग्है खेपन् बुड़ाबाचस चिच्चस। एन जियन कोहा ननर आसिन बाचकन - "ओन्द खेप फिन बेचा।"

       "मला भईयो, अक्कु ऊख़ा मंजा केरा।"

        "निंग्है हेबेरका अम्बरा केरा, एकदम मल बेचदय का एकासे?"

        बेचा गे बेड़ा एकसन ख़क्खरई भईयो।"

एम इर्बम फटफटिया नूँ उक्कम अरा एड़पा नूँ बिल्ली लघरनुम-लघरनुम ठार गूटी अंड़सकम केरकम। गयास कानुम-कानुम बाचस - "नेला इसन बिति-डंडा मनो। ओर्मा पच्चा बेचुर बेचोर। नीन हूँ बरके? एका बीरी निंगा बेड़ा ख़क्खरओ आ बीरिम ओर्मा रिन मेख़ोन।

     एन मांख़ा गही बेड़ा चिच्चकन अरा नंना उल्ला मैच एःरा केरकन। दोय-दोय आःलार गही खोंड़हा रहचा। अन्नु अनइतर गा एंग्है संग्गेर उरखर। बग्गे कुक्कोर रहचर. नेकन एऩ पोलकन चिन्आ। बेचना ओरे मन्जा। एऩ फटफटिया नूँ ओक्कर एःरा हेलेरकन। इन्ना गयास गही बेचनन्, आस गही नवतुन एःरार एऩ हयकटरकन केरकन। टेफए नन्दस होले बिति लील बेल्ख़ा नूँ एथेरई। चोरता बेसे लजरना, कोकड़ारना अरा सकसुकुरना आस नूँ मल रहचा। कुक्को नूँ जे मना लगिया अन्नेम आस नूँ नवतून एःरारएन हयकटरनकन केरकन। टेफए नन्दस  होले बिति लील बेल्खा नूँ एथेरई। चेरता बेसे लजरना, कोकड़ारना अरा सकसुकुरना आस नूँ मल रहचा। कुक्को नूँ जो मना लगिया। अन्नेम आस नूँ नवतून कि किर्रर चाईल बरचा। अगर चेरो इस एन्ने एंगन गुड़ाताचकस हरचस होले गा मानिम एऩ जींख़ोन ख़च्चोन पहें। आस गही डंडा गड्डी मईर मोंख़र बिति एंड़ दयदोय गज गूटी ता खबइर ओंदोरआ लगिया।

     खेप बेचूर नूँ ओन्टे कुक्कोस गेजा नंज्जस। आस तंग्है घोखना नूँ बितन लपकाचस चिच्चकस रहचस। गयास बआ लगियस - "बिति ख़ेंख़ेल नूँ टभकारा की उछलारकी रहचा। इन्नु ती एंड़ोर मजही एःरा नखरना गही कत्था अंड़िसया केरा। पहें कुक्कोस अरबरस। आस गयास गही तमतमरका मुँहिन एःरार इलिचयस केरस। आनिम आ कुक्कोस मल इलिचका होले अरबा-नखरना मनो कालो दने।

      एन मल बेचा लक्कन, पहें नंनर गही बेचना नूँ एंगा आ कुक्को बेड़ा ता रिझिरना बरआ लगिया। एका बीरी एम उर्मिन मोधोरअर बेचना नूँ लक्का रआ लक्कम। अक्कु एन अख़चकन का गयास एन्देर गे चेरो एग्संगे मल बिच्चियस, रोटओ बेचना गही पेखना नंज्जस। आस एंग्गन सोग्गे गही थड़िया बुज्झरस। एन आस ती गेजा नंज्जकन, बे-नेत नंज्जकन, पहें अन्नु हूँ आस एंग ती मल खिंसार। एन्देर गे का आस बेचम मल लगियस, आस एंगन बेचतआ लगियस, एंग्है जियन उय्या लगियस। आस एंगन गुड़तअर पेदख़आ मल बेद्दियस। एन अक्कु ओंटो ओफिसर रअदन। इ ओफिसरी एंग्है अरा आस गही मजही नूँ पचरी मंजा केरा। अक्कु एन आस गही मईन मरयाद ख़क्खा ओंगदन, महबा ख़क्खा ओंगदन, संग्गे पोलदन ख़क्खा। कुक्को परिया रहचा, आ बीरी एन आस गने ओरासरी रहचकन। अक्कु इ ओहदा ख़क्खर एन नीःदी आस गही सोग्गे एरःरना जोगेम रअदन, आस एंगन तंग्है ओरासरी मल बुज्झरस। आस कोहा मंज्जस केरस, एन आस ती सन्नी मंज्जकन केरकन।

   टूड़ा | पइत टूड़का | खीरी | डण्डी | नन्ना गुट्ठी | तोलोङ सिकि नू टूड़का कत्थूड़ा

तंगआ कत्थन, उज्जना-पर्दनान, नेग-चारन् अरा अइनान जईपुईर गे ख़ोजा-पर्दआ।

   बखनी(विज्ञापन)

कुँड़ुख़ कत्था नूँ मुन्ता जल्ली अड्डा, एकन्नू अनइत बग्गे कुँड़ूख़ अरा नंना कत्थूड़ा(साहित्य) गुट्ठी चीतारकी रई। ई जल्ली अड्डा गही निस्ठा(लक्षय)) कुँड़ूख़ कत्था अरा उजपर्दन्(संसकृति) परदआना अरा सहजआना (प्रोत्साहन) तली।
कुँड़ुख़ कत्था नूँ एम्बा सारदय अरा नीन हूँ ई जल्ली  अड्डा नूँ तंगआ टूड़कन नन्ना कुँड़ख़र गुसन् चाँख़आ बेद्दय होले अक्कुनिम     पुथि नू नामे अर्गत'......?

आदिबासी कड़ी गुट्ठी

बेल्ख़ान्ता धरम्