बक्-ख़ोर

 

सौंसे बेल्ख़ा नूँ मुन्ता कुँड़ुख़ जल्ली अड्डा!

 
   

 

नीन ईसन् रअदय : मूद्ध पन्ना > कुँडूख़ कत्थूड़ा > देवनागरी > खीरी(कहानी)

निगनिगरका

खीरी

अँधरी पच्चो अरा कुबड़ा नतियस
करम खीरी (1)
बिति-डण्डा
मतवारस गही दसा
करम खीरी (2)
धरमुस बिट्ठी केरस
उला ता आलो गही मुल्ली
पचबा-आःलर
जुटुरना नूँ सवंग रई
भड़ा गही अड्डो
 
अउर बग्गे खीरी....

एन्नेम लेखा कड़ी
हिन्दी कत्थूड़ा
अँग्रजी कत्थूड़ा
ख़द्द कत्थूड़ा

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

       टूड़ा | पइत टूड़का | खीरी | डण्डी | नन्ना गुट्ठी | तोलोङ सिकि नू टूड़का कत्थूड़ा

 

धरमुस बिट्ठी केरस

मुँजुरका जुलियस तिग्गा

देवनाथ सायस गही समधियान कुकड़ो पद्दा रहचा। तंगदन ओन्द्रोआ गे गोल्लस धरमुसिन बिट्ठी धरचस। ई चान पैंया उर्खकन्ती आस तंगदा गने पुरी सहर तिरिथ काला गे मनमनरस। धरमुस मून्द गोटंग अउर कुँड़ख़ारिन बिद्दयस। देवनाथ गोल्लस गही तिरिथ उर्खना उल्ला पत्तरा एःरार की टिपिरकी रहचा। अवन्ती धरमुस तड़तड़ाय के कुक्को पद्दा केरस। पालकी नूँ बिजोली बीड़िन अर्गअर की धरमुस अरा संग्गियर हंफा-हंफी किर्रा लगियर। ओंटे दरंगन कट्टतोओ बीरी पालकी ओंटो टिलहा संग्गे धस्सरा केरा। दुक्खे नेका हों मला मंज्जा, न नेकइम खत्तरार न मुड्डियर, पालकी भइर ओन कोंड़ा नूँ ख़ज्जती धस्सरा। बिजोली एड़पा अंड़सरकी ई खीरिन तम्बस हेद्दे तिंग्गया। गोल्लस इबड़ा कत्थन मेनरकी थुपी अरा सोट्टक मौर चिड़उर मैंया बरसआचस। अन्ति ईदिम बिट्ठी गही मुल्ली रहचा। गोल्लस बाचस जे ढिबा निमागे चिओन बाचकन आ ढिबा अक्कु निमागे मला ख़क्खरओ। नेला पइरी तिरिथ कालागे सपड़ारआ। मेना ख़ेर चींख़ो किम इस्ते पालकी चोओ। डुगा, तिमड़, दुला गिट्ठियर गे हों काना मनो, आरिन पइरी इसन ओन्द्रोरके। एंड़ गोटंग पालकी चोओ।

      

धरमुसिन संग्गियर अड्डा ख़क्खरकी मेंज्जर अना ले, मुल्लिन गा गोल्लस चुकती मेनहा नंज्जस चिच्चस? धरमुस धीरेहेम फुसफुसरस गोल्लस गही ताव अक्कुन अर्गकी रई। इबड़ा कत्थन मेंज्जस होले अपहइत मनी दरा काली। नलख गही बेड़ा नूँ छछेम रआ।

      

      ख़ेर चींख़ा ख़नेम एंड़ो डुली चोचा। ओना मोंख़ा गे तीख़िल दाली, चिड़ऊ भरियर जुदम, हड़का बोक्सा संजगी गुट्ठी गे जुदम भरियर, मण्डी खटऊ, किचरी नूंड़ू, पान कमऊ गुट्ठी जुदा-जुदा आःलार, गोड़ ओन्द कुरी दोय झन दरघा नूँ मंज्जर।

      

       पलकिन एःको बीरी झलआ गे हों जोंख़र रहचर। नीकइम डहरे नूँ ई गोंहड़न एःकना एःरोर होले ठउकम बओर का ई दरघा गा नागपूर ती बरआ लगी। लोहाड़ा अरा ख़ुड़ती बीरी एकसन डेरा इजओ आ बीरी बिट्ठी आःलार गे ख़इका अलखड़ा अरा गुल्ले मोंख़ागे ख़क्खरओ। अदिन ओपअर की मोंख़ा गे भरियर हेद्दे छिप्पा मला रहचा। न गोल्लस गही जिया नूँ इदी खतरी तिहम रहचा।

      

       टीप अड्डा नूँ गोल्लस एत्ता मला बिद्दयस चहे पालकी नूँ ख़न्द्रस केरस होले पालकी कालो एका गूटी गोल्लस गही मने गही पता मल्ला। बेड़ा कुक्क चप्पो ती अड़ती मनन् चहे पुत्तबीरी का तरा मांख़ा मनन्। एन्ने घड़ी बेड़ा नूँ पालकी चिड़ऊर तोकनुम-तोकनुम अलखड़न फकआ लगियर। एकसन तले डेरा खतरओ होले ख़ड़िदका ततरका कुँड़ख़र गे ख़न्द्रना अरा तुंगुल संघरा सहाड़ा चिआ गे बरओ। गोल्लस गही ख़न्न मुन्धभारे कुँड़ख़र छिप्पा नूँ मण्डी ओन्ना जोक्खा आःलार मला रहचर। ओर मेदन सोभतआ गे धुति गा अत्तम पोल्ला लगियर।

      

       धरमुस कुँड़ुख़ भरियर गही मझी नूँ बुझुरका, गुनचका ओर्त रोटओ आःलास रहचस। आस संग्गे मला रहचका होले गा नन्ना भरियर गोल्लस गही एन्ने कचकचन् एन्देर सहओर। आर मझी टोड़ंग नूँ पालकिन अम्बर की झूंड़ तरा बोंग्गोर चिओर पहें। धरमुस संग्गियर गही जियन अख़आ लगियस। आस गही घोखना अरा सलहा रहचा का नलख गही मझी नूँ नेकन हों टोस अम्बा चिआ। जिया मला एम्बा सारई आ नलखन ओरेदिम अम्बा नना। न अन्ने नलखन नन्नर ती इंजिरआ। एन्नेम ओर्मर बुझा मता मन्नुम अरा बिट्ठी नलखन नन्नुम अधा डहरे गूटी केरर।

      

        पुरी सहर मुन्द चन्दो गही डहरे रहचा। डहरे नूँ अंज-खंज टोडंग पर्ता निन्दकी रहचा। लकड़ा अरा मेढ़ो पर्ता नूँ कोचकोचरका रहचा। ख़ोसरा नूँ तेर बिछी अरा ख़च्चु तिंगली अरा इड़बी सिड़बी डांस अरा डोन्डो बलबलरका। कुँड़ुख़र गही डिड्ड अरा संवग बुते गोल्लस तिरिथ का लगियस। दरघा आ टोडंग मझी नूँ अंड़िसया एक्सन संख ख़ाड़ कोइल गने बहिन जोड़ई। असन डेरा एंड़ मून्द गूटी इज्जा। ख़ाड़ जोड़ोरका अड्डन गोल्लस पका पत्तआ लगियस आस ख़ोसरा नूँ एमआ गे कालोस, एमओस दरा बरओस। पलैंथ ओक्कर की पूजा ननोस। बरमरोओस, ओनोस, मोंख़ोस। तले तंग्है मेद्दोन चमकआगे हेलरओस।

      

        डेरा चोदना मुन्द आस ओन्द पुत्तबीरी जमा भरियारिन तंग हेद्दे एड्डस। तान लोदलोदायके तकिया अट्टिका मंजी नूँ उक्कियस। चांदी हूका नूँ चिलम लिन्दअर की ओर्त सुसारिस हुका गही नरिचन गोल्लस गही बई सोझ नूँ नंज्जस दरा इज्जस। गोल्लस ओंद गड़गड़ हुकन टनचस। दरा धुंगन नंना तरा ऊरआ गे मलख़न किर्रताचस। अत्तरा धरमुस अरा तंग्है संग्गियर उक्कर रहचर। गोल्लस ओर्मारिन मेंज्जस एन एवंदा उल्ला ती निंम्है गोल्लन तलदन। नीम इदिन अख़दर। नीम अख़दर का एन नीम मैंया एकअम रकम गही बेनेवई नलख मला नंज्जकन बेएदन। धरमुस अरा नीम ओर्मर ई पत्त नूँ गोवाह चिआ ओंग्गदर। अउर जोक्क उल्ला नूँ नाम पुरी सहर अंड़सोत कालोत। नीम गा देवता गुसन अंड़सा पोल्लोर। देवतन एःरा अरा ओलग्गा गे अंहलस आःलारिन कोरआ मला चिअनर। जगरनाथ मन्दिर अजगुत नेम्हा अरा धरम अड्डा तली। एन एंग्गन सपड़आ लगदन का ओर्मर गही उइजी नूँ एन मन्दिर उला कालोन एंग्है एंगदा बिजोली संग्गे नूँ रोटओ कालो।

      

        कत्थन मेनर की अधअध आःलार गही जिया रोपओ मंज्जा केरा। ओर्तोस जिया नूँ बाचस का इंवदा बिट्ठी खटचका गही होले एन्देर ख़ंजपा मंज्जा? नन्नस बाचस एन गा मन्दिर गही देवतन एःरना गही लोभेती बरआ लगदन। एन्नेन् अख़ना होले ठेपा हों मला बरओन पंहे अउर ओर्तोस बाचस हू गोल्लस तान भइर धर्मी हंकदारदस। चिइना ख़ट्टना नूँ तानिम गा साढ़े बईस। ओतोख़ तान कादस नेकआ। धरमे आस गे एन्नेम ओक्का गे कण्डो चिओ। धरमुस कत्थन तय तबड़ा नन्नुतिम बुझा बाचस का मझी डहरे नूँ इड़दी-बिड़दी कछनखरना ती नमागे मला फलओ। नलखन मुन्ध मुन्जा तले एःरा। नलख मला खंजा होले हाड़ी गे ख़ेबदन तंगआ धरआ अरआ अरा सीख ओत्थोरआ।

      

        नन्ना उल्ला डेरा चोःचा। आःलार उड़िसा राजी नूँ कोरचर। एरचेर भफर भरियर डहरेन सराबअनर। ओर्त भरियस ओन्द अड्डा बहरी कालागे तीरयस। आःलास पतड़ा उला ओन्टे खुदखुदी तरा केरस। अत्तरम लकड़ा आसिन पेत्ता की ले होच्चा। गोल्लस जिया नूँ एंड़ बखरा मंज्जस, आस घोखदस का एन डहरेन एःरोन का लासन बेद्दागे कालोन? तले भरियारिन पेसस का गुचा डहरेन धरआ। धरम नलख नूँ ओट्टा गा मनीदिम। पालकी हाड़ी बढ़र्रा।

      

        खतरनुम चोअनुम आःलार दिघा डहरे करने दरमरा लेक्खा मंज्जर। ओन्द अठवारी मंज्जा, अन्नु हों डहरे बकियम रहचा। एकअम लेक्खा हपता उल्ला रेंगेट-रेंगेट मन्नुम आःलार पुरी सहर अंड़िसयर। अंड़सरकी गोल्लस फरक फन्द अड्डा नूँ मन्दिर ती गेच्छम डेरा फन्दचस। ओर्मर डेरा नूँ ओन्ट अठवारी गूटी ख़न्न ईख़यर। आःलार गही ख़ेसेर ती ओत्था इत्तिया। उल्ला-मांख़ा एकना गही बखनी अम्बरा। जिया दव सलसंत मंज्जा। मन्दिर एःरागे जोक्क गेच्छा नूँ इज्जकी रहचा।

 

        गोल्लस अरा तंगदा मन्दिर नूँ देवतन दरसन नना गे कोरचर। देवतन ओ-लग्गियर। दान-पून नंज्जर। जिया नूँ पका खुसमारर। परसाद ओन्ड्डर मोक्खर। तले आर किर्रयर। मन्दिर नूँ रोक छेक मला रहचा। ईद गोल्लस गही तंग्है कूल ती सिरजाचका कत्था। गोल्लस कम चरपट मला रहचस। आस तंग्है पसिन्द लेक्खा ओरोत-ओरोत चाजरका जोंख़ारिन मन्दिर ओच्चस; एदाचस दरा भोग मण्डिन हों ओन्ताचस। ओर्मर गही पाली मंज्जा। ओतोख़ बच्छरस धरमुस। नेकन गोल्लस एदआ गे ओच्चस आसिन एन्ने हों पोसस का ई कत्थन नेकन हों नन्नारिन अमके तेंग्गा। पंड्डर आनकर रअनर का जिया नूँ आनका कत्थन ने मला उइयो आर मैंया जगरनाथ देवता बगड़ारओ कालो आर गही कोहा नोकसान मनो अंवती धरमुस गे ई फहम मना पोल्ला का ओर्मर देवतन ईरयर अरा एन्नेम रोटओ बछरका आःलन तलदन। ओन्द मांख़ा गोल्लस डेरा नूँ तिंग्गयस का खरचा अक्कु घटरआ लगी। अक्कु किर्रा गे नम्है डेरा मला पहें नेलबेंजा चोओ ओर्मर सपड़ारकर रअके। ई कत्थन मेनर की धरमुस गही जिया हौंड-बौंड़ मंज्जा केरा। आस जिया उला ई आसेन गथरअर की उइकस रहचस का मन्दिर उला कोरना अरा देवतन दरसन नन्ना गही मोका एकअम अन्ने कोलोरओ किम रओ। आस गही आसे अक्कुन तुंगुल लेक्खा उढ़ियारा केरा। बकिया संग्गेर खुस रहचर  का धरमुस गही आनका लेक्खा मुंज्जा नूँ गोल्लस आर मैंया मया  नंज्जस। फोकारस गा धरमुसिम।

    

       धरमुस डेरा ख़ापा लगियस। अन्ति ख़न्न एःरागे संग्गियर पहर तरा केरार। गोल्लस तंगदा गने पुरी सहर गही ओंटे नमूद ख़ेंदागे दोकान-दोकान कुद्ददस पुत्तबीरी गहड़ी गूटी धरमुस जिया नूँ गुनदस का देवता एकन्ने रई, भोग एकन्ने लग्गी।

      

       ख़ने गा एःरदस ओंटे आःलास ढिबरिन धरअर की बरचस। आस गही ख़ेक्खा नूँ कोहा बड़े थड़िया? थड़िया नूँ भोग रे, मिठाई रे,  ख़ंजपा रे निन्दका। आःलास धरमुसिन बाचस ओना मोंख़ा अरा थड़ियन हेद्देन्ता गड्डी गही अम्म नूँ उइके चिइके। आःलास किर्ररका चला केरस। कीड़ा गही चक्चका धरमुस मुन्धगा हबर-हबर ओन्डस। तले एका गड्डी नूँ उइय्या गे बाचस बअर की आ आःलासिन बेद्दा हेल्लरस। पहें असन गा ने हों मला ख़क्खरर। घ़ने धरमुस कप्पनुम-कप्पनुम गड्डिन थिथाबाचस अरा अम्म नूँ आ थड़ियन गड्डस चिच्चस।

     

       अधा-अधी मांख़ा बीरी गोल्लस अरा भरियर डेरा अड्डा नूँ किर्रयर। आर गा मन्दिर तरम भोग मण्डी ओनरकी एन्ने मांख़ा नन्ताचर। गोल्लस डेरा किर्ररकी बाचस नेलागे लगे ओर्मर सपड़ारआ। पइरी नास्ता अम्म ननोत दरा उर्खोत।

      

       नन्ना पइरिम मन्दिर नूँ डहोडह मंज्जा का सोना गही थड़ियन मन्दिर ती ने ओत्थरा? परसादी गही थड़ियन? देवता मुन्धभारेन्ता थड़ियन? मन्दिरता आःलार डेरा-डेरा नूँ दरसन ननुरिन छांड़आ बींड़आ हेल्लरार। धरमु डेरा तरा हो चंजआ गे आःलार बरचर। ख़ने धरमुस तंग्है गोल्लासिन केरका मांख़ा एन्देर मंज्जा आ खीरीन तिंग्गयस। आःलार बेद्दा केरर ख़ने गोल्लस मन्दिर ती बरचका पुजारी गुट्ठिरिन ई बारे नूँ खबर चिच्चस। थड़िया आ हेद्देन्ता लेवड़ा गड्डी ती उर्खा ईदिम। सोना गही थड़िया रहचा। ईदिम देवता गही थड़िया रहचा। धरमेदिम थड़ियन ओन्दोरऊ रहचा। धरमुसिन भेंट ननागे देवता बरचा।

   टूड़ा | पइत टूड़का | खीरी | डण्डी | नन्ना गुट्ठी | तोलोङ सिकि नू टूड़का कत्थूड़ा

तंगआ कत्थन, उज्जना-पर्दनान, नेग-चारन् अरा अइनान जईपुईर गे ख़ोजा-पर्दआ।

   बखनी(विज्ञापन)

कुँड़ुख़ कत्था नूँ मुन्ता जल्ली अड्डा, एकन्नू अनइत बग्गे कुँड़ूख़ अरा नंना कत्थूड़ा(साहित्य) गुट्ठी चीतारकी रई। ई जल्ली अड्डा गही निस्ठा(लक्षय)) कुँड़ूख़ कत्था अरा उजपर्दन्(संसकृति) परदआना अरा सहजआना (प्रोत्साहन) तली।
कुँड़ुख़ कत्था नूँ एम्बा सारदय अरा नीन हूँ ई जल्ली  अड्डा नूँ तंगआ टूड़कन नन्ना कुँड़ख़र गुसन् चाँख़आ बेद्दय होले अक्कुनिम     पुथि नू नामे अर्गत'......?

आदिबासी कड़ी गुट्ठी

बेल्ख़ान्ता धरम्